عبد الله غلوش يكتب: غلوشيات رمضانية (9)

– حتي الآن ، هشام ماجد اتكرع ٣ مرات ومكي مرتين و شيكو اطلق ٤ بومبات .. الكوميديا علي طريقة “خلصانة بشياكة”.

– في نفس الشهر اللي أحمد عز عمل فيه فورمة الساحل ، زينة عملت دور عمرها في “لأعلي سعر”.

– خلصانة بشياكة .. بعد “الحرب العالمية التالتة” ، هشام ماجد تاني مره يألش على ادمان بهاء سلطان.

– وضع أمني .. مشهد استقبال ضرارير ريهام حجاج لأمها وأبوها يوم الصباحية كفيل انه يقفلك من المسلسل كله.

– محمد صلاح في ليفربول .. افتكر اني قلت لك بلاش.

– أجمل ما في عفاريت عدلي علام، انك مهما تفوت منه اكتر من حلقة ولما ترجع تحس انه مفاتكش أي حاجة.

– أكيد ياسمين عبد العزيز لما أختارت أسم “هربانة منها” مكنتش متوقعة انه هايهرب منها للدرجة دي.

– في نفس الوقت اللي نيللي كريم بتفكر تقلع فيه النقاب ، بوسي لبسته عشان تسرق الست اللي شغالة عندها “الحساب يجمع” وأحمد فهمي لبسه عشان يهرب الغوريلا اللي بيحبها “ريح المدام”.

– حلاوة الدنيا .. خايف يعدي على مرحلة الحشو.

شاهد الحلقة الثامنة من المسلسل الرومانسي الكوميدي (الحب الحب)

– حمزة العيلي في يوم واحد ، هيفا قتلته في “الحرباية” و سقط في أختبارات الخارجية في “طاقة نور”.

– واحة الغروب .. الصورة الحلوة لوحدها مش كفاية.

– يا ويتر يا ويتر هاتلي اي سامسينج اشربه.

– كلابش .. سليم الأنصاري بقى اشهر من أمير كرارة.

– كلابش .. شكرا للمخرج أكرم فريد اللي أكتشف ان عندنا ممثل مهم اسمه دياب.

– كلابش .. نفسي مرة محمود البزاوي يلحق يطفي سجارته قبل ما الطفي يقع علي الأرض.

– للسنة التانية على التوالي ، جيهان خليل “طاقة نور” .. الحسنة الوحيدة لبرنامج “آراب كاستينج”.

– 30 يوم .. بقيت لما بقع في أي مشكلة بحس أن باسل الخياط هو اللي مدبرها.

– 30 يوم .. كل يوم آسر ياسين بيثبت ان اعلان كونكريت هو أفضل أعماله.

– لا تطفئ الشمس .. ريهام عبدالغفور أول مرة makeup.

– لا تطفئ الشمس .. فتحي عبدالوهاب مفهوم جديد للمراهقة المتأخرة.

– الثانوية العامة .. وزارة التعليم 1- شاومينج صفر.

– مراد مكرم في برنامج “لكل أكله حكاية” على نجوم fm، أفضل من مراد مكرم “أرض جو “و”الحساب يجمع”.

– النهاردة حنان مطاوع كانت بتتفرج على “حريم السلطان” مع عمها في “هذا المساء” ، وامبارح بعتت كل حلقاته لهند صبري عشان يسليها في المستشفي  “حلاوة الدنيا”.

– ريح المدام .. اعتذار أسرة المسلسل عن الافيه العنصري تجاه لون بشرة فريق بلاك تيما .. يستحق الإشادة.

–  الحساب يجمع يخوفك من الشغالات .. عشم ابليس يخوفك من أمك .. الحصان الأسود يخوفك من الكراش .. 30 يوم يخوفك من نفسك .. حلاوة الدنيا يخوفك من المرض .. وضع أمني يخوفك من البلد .. هذا المساء يخوفك من الموبايلات .. كفر دلهاب يخوفك من العفاريت .. الزيبق يخوفك من إسرائيل .. الجماعة يخوفك من الإخوان .. قصر العشاق يخوفك من غدر الزمن .. الحرباية يخوفك من أخواتك .. كلابش يخوفك من الظلم .. لا تطفئ الشمس يخوفك من الحب .. في الـ لالا لاند يخوفك من الطيارات .. لأعلي سعر يخوفك من الدنيا وما فيها.. أرض جو يخوفك علي مرارتك من محمد كريم.

– مش العيون بس اللي بتبكي الإيدين والرجلين والقلب كمان .. وقلبك كل ما يبكي بيتطهر ويبقى أقوي .. نبيل الحلفاوي “لأعلى سعر”.

– أوعي حد يحس انك ضعيف ، لو اللي حواليك حسوا انك ضعيف هياكلوك .. أحمد السقا “الحصان الأسود”.

– هي الناس ملط كده ليه استغفر الله العظيم .. صدق اللي قال الستره حلوة .. هيفاء وهبي “الحرباية”.

– كنوز الدنيا متساويش حاجة، لو مفيش ناس تحبهم ويحبوك، ناس تخاف عليهم ويخافو عليك ، ناس تتمنى تعيش حياتك معاهم بحلوها ومرها.. روجينا “كفر دلهاب”.

– الناس لما بتاخد بالجزمة بتخاف وتكش .. غادة عبدالرازق “أرض جو.

– كلنا بنبقى اشرار لما بنكون عايزين مصلحتنا .. رحمة حسن “لأعلى سعر”.

– ربنا يرحمك يا أمي ويرحم أمهاتنا جميعًا ويخلي أمهاتكم يارب.

نرشح لك : عبد الله غلوش يكتب: غلوشيات رمضانية (8)