فطروني (3).. مصطفى حمدي يكتب: النساء من on والرجال من dmc
• “قلم” نيللي كريم على وش أحمد فهمي أقوى انتصار للست المصرية في دراما رمضان.
• كوني له سمية الخشاب في “الحلال” يكون لكي خالد النبوي في “واحة الغروب” .
• كل أزواج هيفاء وهبي مقضيينها كلام في ليلة الدخلة .. يابختك المايل يا “حرباية” .
• غرام إياد نصار بحنان مطاوع في “هذا المساء” تأكيد لنظرية أن الراجل أحيانًا بيزهق من الجاتوه ويقوم يضرب ايده في طبق المخلل عادي جدا.
• مضيفات “أرض جو” لما شافوا عباس أبو الحسن اتعاملوا بمنطق مضيفات السوبر جيت والبولمان .
• الناس تتجوز للمرة الثانية عشان تتبسط ، مش عشان تخلف وتدي العيل للزوجة الأولى تربيه .. آسر يس بوظ المنطق في 30 يوم فقط .
• ليه يابنتي بتحبيه بعد كل اللي عمله فيكي ؟
هو انت شفت معاملة أمير كرارة لريم مصطفى في “كلبش” عشان تسألني السؤال ده ؟!
• “ماهو يا أما هتقوليلي مالك ، ياهديكي بضهر إيدي على وشك ” .. باسل خياط لخص كل حاجة.
• يوسف الشريف في “كفر دلهاب” .. لابيحب ولا بيتحب ، ولا بيفكر في الستات ولا الستات بتفكر فيه ، تقريبًا العفريت اللي راكبه “سنجل” .
• نيللي كريم في “لأعلى سعر” .. اللي أوله بسطرمة بالليل أخرته خُلع ان شاء الله .
• إلى شيرين رضا بعد ” لاتطفيء الشمس” .. كفاية عيال بقى مش عارف أشوف عينيكي .
• بعد اللي بتعمله سارة سلامة ده ، الرجالة هتشك في صوابع إيديها .
• في “واحة الغروب” .. اذا كان السمار نص الجمال ، فالمشمشي “الحزلقومي” مش كل الجمال ولا حاجة .
• جوه كل راجل مصري “سوني” صغير مبيظهرش إلا مع الشخص الشمال .. من وحي شخصية محمد فراج في “هذا المساء” .
• “واللي حصل بينا ده كان اسمه إيه ؟ محسن ، على اسم خالو ” .. شيرين رضا تُعلمك كيف تنهي علاقة في 20 ثانية .
• اللي يتجوز واحدة زي انجي المقدم في “30 يوم” أو “لاتطفيء الشمس” لازم يعمل زي إياد نصار في “هذا المساء” .
• روجينا في “كفر دلهاب” تؤكد : الست لما تحط عينها على راجل بتاخده حتى لو هو مش عايز .
• أروى جودة في “هذا المساء”.. لسان حال كل ست مصرية قالت لجوزها طلقني وكانت مستنياه يقول لا بس هو طلع ناصح وقالها المأذون فين ؟