عبد الله غلوش يكتب: غلوشيات رمضانية (18)
– اذكر اسم مسلسل واحد مافيهوش واحدة نامت مع واحد في الحرام؟
– اكاد اجزم ان ياسمين عبد العزيز ذات نفسها بطلت تتفرج على “هربانة منها” من يوم 5 رمضان.
– طاقة قدر .. لما تتابع المسلسل هايصعب عليك حمادة هلال أكتر من الواد أوفا بتاع اعلانات EGBANK.
– 30 يوم .. رغم اعجابي بالمسلسل في بداية رمضان، لكن بمنتهى الامانة من بعد الحلقة رقم 10 زهقت من فكرة اني اتفرج كل يوم علي واحد بيقتل حد وبعدها يتصل بواحد يقوله ازيك يا دجتكور ويضحك ضحكته الشهيرة ، فالدكتور يعمل انه مرتبك ومتعصب ، فـ وليد فواز يقوله متقلقش وبعدها إنجي المقدم ونجلاء بدر يقعدوا يعيطوا.
– ما لو حضرتك بعد ما شفت اعلان سميرة سعيد “57357” ، لسه مقتنع ان اعلان حلمي ودنيا مبهج وجميل ، يبقي المشكلة فيك الحقيقة.
– “وضع أمني” الماكيير بتاع المسلسل المفروض يتحاكم بتهمة الاساءة للمهنة واهدار المخزون القومي للميكروكروم.
– انت الوحيدة اللي فيكي الدهون اللي اي راجل يتمناها .. نفس الجمله قالها أوس أوس لـ “ويزو” أول امبارح في “خلصانة بشياكة” .. ومحمد عبد الرحمن قالها لها امبارح في “ولاد التيتة” ع الراديو ٩٠٩٠.
– كاسونجو بتشيرت الزمالك كارف علي مايوكا.
– لو لسه عندك وقت وطاقة تسمع مقدمات أغاني أم كلثوم ، أو تتفرج علي اعادة الاهداف بطريقة السلو موشن ، يبقي أكيد انت لسه بتتابع “واحة الغروب” لغاية النهاردة.
– سبحان الله “خلصانة بشياكة ” و “لالا لاند” في نفس ذات الوقت، جايبين واحد ياباني بيتكلم مصري علي اعتبار انه افيه وكده.
– هالة صدقي غيرت باروكتها “عفاريت عدلي علام” وهند صبري غيرت باروكتها “حلاوة الدنيا”.
– رمضان كريم .. الحلقة 17 المفروض انها بتتكلم عن يوم 16 رمضان الحالي ، يبقي طبيعي ان عمرو عبد العزيز لما يفتح dmc على الفطار يشوف الحلقة رقم 16 من “خلصانة بشياكة” مش الحلقة السادسة.
– حلاوة الدنيا .. نهى عابدين وسلمى أبوضيف مابيحبوش يحطوا مشروم مع الأكل .. أبرز حدث في حلقة اليوم.
– أحمد فؤاد سليم اتعرض لمحاولة قتل فاشلة “أرض جو” وحنان مطاوع اتعرضت لمحاولة قتل فاشلة برضه في “طاقة نور”.
– في نفس اليوم اللي ريهام عبد الغفور عرفت انها حامل “الزيبق” ، ريم مصطفى اجهضت حملها في”عشم إبليس” وسارة منصور اجهضت حملها في “وضع أمني” ، وسارة سلامة في الطريق “لأعلي سعر”.
– محمد كريم خان مراته “أرض جو” ، وتامر حبيب بيفكر يخون مراته “الحساب يجمع”.
– عادل إمام دخل مستشفي المجانين “عفاريت عدلي علام” ونيللي كريم دخلت السجن “لأعلي سعر” .. أحمد السقا هرب مرة تانية “الحصان الأسود” و ظافر عابدين صحي من النوم لقي نفسه مع رانيا سيد علي السرير “حلاوة الدنيا”.
– سهر الصايغ رفضت تتخطب لمحمد مهران “رمضان كريم” ، وديانا “بنت يسرا” رفضت تتخطب لحازم إيهاب “الحساب يجمع”.
– مراد مكرم طرد ايمان العاصي من مكتبه “الحساب يجمع” وعباس ابو الحسن طرده من المستشفي “أرض جو”.
– كفر دلهاب .. تقريبًا حواجب روجينا هي اللي جابت اللعنة للكفر.
– كفر دلهاب .. اللي بيتفرج علي game of thrones هايكتشف بسهولة ان في مشاهد من المسلسل منقولة بالنص والديكور والافيهات كمان.
– لا تطفئ الشمس .. بإستثناء محمد ممدوح وريهام عبدالغفور، ريأكشانات باقي الأسرة علي عودة أحمد مالك fake ومصطنعه وتحديدا ميرفت أمين.
– لا تطفئ الشمس .. أمينة خليل تعرف ان اخوها لسه عايش ، تقوم حاضنه باسم مغنية ، يقوم جوزها شايفها وهي بتحضنه فايشُك فيهم .. فيلم هندي.
– لا تطفئ الشمس .. عمرو صالح احدث شاذ في الدراما المصرية.
– مكنتش أتوقع أن في حد ممكن يتفوق على خالد صالح في دور أمين الشرطة الفاسد .. دياب قدر يعمل كده في “كلبش”.
– اغلب الرجالة اللي اتجننوا موجودين في مستشفي الأمراض العقلية بسبب الستات .. لطفي لبيب “عفاريت عدلي علام”.
– إحنا بنضبش .. عاملين زي اللي ماشيين في العتمة ومش شايفين حاجة .. اي نقطة نور بتظهر لنا بنمشي وراها وإحنا ساكتين عشان مقدمناش غيرها .. “ظل الرئيس”.
– أي حد بيتكلم عن المصالحة مع الإخوان تعرف إنه خاين .. عبدالناصر “الجماعة 2”.
– الراجل اللي مراته تطلب منه الطلاق أكتر من مرة وميطلقهاش ، يبقي عايزها تخونه .. سلوى محمد علي “لأعلي سعر”.
– كل ما لسه قلوب بتشارك ووشوش بيها بنتبارك ، ممكن يحصل تغيير.. سميرة سعيد “57357”.
– ربنا يرحمك يا أمي ويرحم أمهاتنا جميعًا ويخلي أمهاتكم يارب.
نرشح لك : عبد الله غلوش يكتب: غلوشيات رمضانية (17)