عبد الله غلوش يكتب: غلوشيات رمضانية (19)
– بإستثناء حلاوة الدنيا ، لو لغيت حلقة النهارده من كل المسلسلات ، مكنش هايحصل اي حاجة.
– حلاوة الدنيا .. اقولك ايه واعيدلك ايه يا هند صبري .. خلصت فيكي كل الكلام يا بنتي والله ، بصوت مدحت شلبي.
– من بعد فاطمة كشري وعبد الغفور البرعي ، مفيش قصة حب اثرت في الواحد كده زي قصة سليم وأمينة.
– حلاوة الدنيا .. في مشهدين لظافر العابدين وهند صبري في حلقة النهارده ، هيتركب عليهم شويه أغاني حب وكآبه محترمين الفترة الجايه ع اليوتيوب.
– الحالة ج .. لو المسلسل كان اتأجل عرضه لبعد رمضان ، مكنش حد هايشوفه برضه.
– اعلانات الاوت دور اللي معموله في الشوارع لمسلسل “شاش في قطن” اكتر من عدد الناس اللي بتتفرج عليه.
نرشح لك : عبد الله غلوش يكتب: غلوشيات رمضانية (7)
– لأعلي سعر .. زينة جابت داده وطباخ وسواق جداد ، ومي كساب عايزه تعمل عملية شفط .. ملخص حلقة اليوم.
– لأعلي سعر .. البنت عندها ربو ونازله الكباريه عشان اكل عيشها .. جملة مدحت العدل اوي.
– لأعلي سعر .. هروب سالي حماد من ورا زينة بالطريقة الكوميدية دي .. مشهد مدحت العدل اوي.
– اخر حاجة كنت ممكن اتوقعها ان عارفه عبد الرسول ورجاء الجداوي يبقي دمهم اخف من ياسمين عبد العزيز ودنيا سمير غانم.
– السنة اللي فاتت الاردني وائل نجم كان مكسر الدنيا مع محمد رمضان في الاسطورة ، السنة دي قليلين اللي يعرفوا ان اخوه عامل دور في “طاقة نور” .
– زووو .. انك تعيد حلقات مسلسل أطفال قديم ، احسن بكتير من انك تعمل نسخة مشوهه منه .
– لا تطفئ الشمس .. شيرين رضا بتثبت كل حلقة ان ميرفت أمين نسيت التمثيل خلاص.
– بالمناسبة هي سوسن بدر اعتزلت ولا ايه؟
– الوجوه الجديدة في “الحساب يجمع” الأفضل وفي “أرض جو” الأسوأ.
– كفر دلهاب .. الست روايح مشغوله في المسلسل وناسيه انه ناقص اسبوعين بس لو محدثتش بطاقة التموين بتاعتها ، مش هاتعرف تصرف الشهر الجاي.
نرشح لك :عبد الله غلوش يكتب: غلوشيات رمضانية (4)
– الحصان الأسود .. مشهد شيري عادل مع والدتها في دار المسنين ، واحد من اجمل المشاهد في المسلسلات اليوم.
– عشم ابليس .. ياريت حد يقول لعمرو يوسف ان تمثيل دور السكران بالطريقة الاوفر دي اتلغت بقالها فترة حلوة.
– هذا المساء .. لغاية امبارح بس كانت نورا “روقة في فيلم العار” افضل وأشهر من جسد دور الزوجة التانيه الشعبية سواء في السينما او الدراما ، قبل ما تيجي حنان مطاوع وتسحب منها اللقب.
– ظل الرئيس .. ياسر جلال معروف انه بيمثل حلو من زمان ، هنا شيحة هي اللي مفاجأة الحقيقة.
– عفاريت عدلي علام اكبر دليل علي ان كمال أبو رية لا يبرع الا في حضور الاستاذ احمد عبد العزيز فقط.
نرشح لك :عبد الله غلوش يكتب: غلوشيات رمضانية (1)
– عفاريت عدلي علام .. محمد ثروت متقمص شخصية محمود الليثي في افلام السبكي .. طالع ياخد على قفاه وخلاص.
– الحب اخطر حاجة في الوجود بيخلي الانسان يلغي عقله و ما يعرفش يفكر .. “كفر دلهاب”.
– لو فاضلي يوم واحد ، بكل الانانية اللي في الدنيا ، بكل الحب اللي جوايا ليكي ، عايز اليوم دة يبقى ليكي ، يبقى بتاعنا .. ظافر العابدين “حلاوة الدنيا”.
– ومين النهاردة بيخاف على سمعته، كل ما سمعتك تبقى زفت أكثر، كل ماتبقى نجم ومشهور ..محمد حاتم “لأعلى سعر”.
– ربنا يرحمك يا أمي ويرحم امهاتنا جميعًا ويخلي امهاتكم يارب.
نرشح لك : عبد الله غلوش يكتب: غلوشيات رمضانية عن “لا تطفئ الشمس”