مصطفى حمدي يكتب: دراما رمضان.. تأديب وإصلاح

• الموبايل اللي يبوظ ميتصلحش، يا تحرقه يا تشيله في حتة أمان.. درس “هذا المساء”.

• لو فاكر نفسك صايع في اللي أصيع منك وهيطلع على جتتك القديم والجديد.. حكمة “30 يوم”.

• اللي بيصبر ينول، وفي رواية أخرى اللي أمه بتدعيله أحسن من اللي أمه بتديله .. موعظة ياسر جلال في “ظل الرئيس”.

• اللي يشوف بلوة غيره تهون عليه بلوته.. الدرس الذي سيتعلمه أي فنان يشاهد يسرا في مسلسل “الحساب يجمع”.

• أن تكون غائبًا حاضرًا خير من أن تكون حاضرًا والناس بتقولك اتفضل امشي.. حكمة “عفاريت عدلي علام”.

• عارف العيال اللي بيقولوا “إنت متعرفش أنا ابن مين في مصر؟”.. متتريقش عليهم عشان بيسلكوا على فكرة.. “لمعي القط”.

• لو معندكش حاجة تعملها خليك قاعد في بيتكم.. حكمة “إزي الصحة”.

• ريح دماغك قدام أي ست، لإنك لو فكرت تريحها هي عمرك ماهترتاح.. درس “ريح المدام”.

• خليك دوغري حتى لو الشمال مغري.. ده مش درس دي تكتبها على توكتوك وتعدي قدام أي حد بيتفرج على “الحرباية”.

• اللهم لا تؤاخذنا بما فعل السفهاء منا، بس أنا عارف إن هينولنا من الحب جانب برضه.. مش إسقاط سياسي، ده تأثير “كفر دلهاب”.

• أقرب طريق لقلب جوزك مصلحته، وأقرب واحدة هتخطفه صاحبتك.. اتعلمي من “لأعلى سعر”.

• متأمنش لأي ست ياخلف، حتى أمك لو أبوك طلقها متآمنلهاش.. موعظة “عشم إبليس”.

• القلب يحب عشرة ميحبش مرتين.. عشان كده “لاتطفئ الشمس”.

• الرزق بتاع ربنا مش شطارة ولا موهبة ولا أي حاجة.. الحكم النورانية من الفرجة على “اللهم إني صائم” وأي مسلسل لمصطفى شعبان.

• ماترميش فلوسك على واحدة “هربانة منه”.. يارب المنتج يتعلم بس.

• أسوأ تاني حاجة ممكن تشوفها بعد أحمد موسى هو مسلسل “قصر العشاق”.. درس ملوش علاقة بأي حاجة.

• وليه تتجوز مصرية مدام تقدر تصاحب أجنبية وبرضه هتطلع عينها عادي، بس هتعاملك باحترام وممكن تسافر بلدها وتتجوزها في الآخر وتاخد الجنسية.. درس “واحة الغروب”.

• أي حاجة تبدأ “بوضع أمني” آخرها وضع مُحرج.. هذا الدرس برعاية عمرو سعد.

• الجواب بيبان من عنوانة.. درس “في اللا لا لاند”.

• مدام مصري وجاسوس الستات هتحبك حتى لو كنت فني كاميرات.. نظرية “الزيبق”.

• الناس أقدام.. درس “أرض جو” لغادة عبد الرازق لو فكرت تجيب محمد كريم تاني.

• وسيحكم التاريخ بما لنا وما علينا.. درس الأيام السودة.