عبد الله غلوش يكتب: غلوشيات رمضانية (23)
– الحساب يجمع .. يسرا قررت تنافس صبحي كابر والبرنس.
– عشم ابليس.. اطول مشهد في دراما السنة دي ، قعد اكتر من 13 دقيقة لدرجة ان عمرو يوسف في نهايته قال للراجل اللي كان بيمثل معاه : انا متشكر جدا على وقت حضرتك.
– لا تطفئ الشمس .. ميرفت أمين : أقسم بالله ما ولادي.
– أرض جو .. نهلة سلامة ومحمد كريم أكتر couple لايق علي بعض في دراما السنة دي.
– أرض جو .. لسه كنت بقول امبارح ازاي يمر 20 حلقة من المسلسل من غير ما عبد الرحمن أبو زهرة يموت او يدخل المستشفي ، النهارده جت له جلطة في القلب.
– أرض جو .. بيري تالت واحدة تتف على وش محمد كريم من بداية المسلسل.
– في نفس اليوم اللي مي الغيطي عرفت فيه انها حامل “لا تطفئ الشمس”، ريهام عبد الغفور تعرضت للأجهاض في “الزيبق”.
– اللي أحمد مجدي بيعمله في فيدرا “لأعلي سعر” أمينة خليل بتطلعه عليه في “لا تطفئ الشمس”.. كما تدين تدان.
– عفاريت عدلي علام .. عادل إمام أول مرة في مجلس النواب بعد مرجان أحمد مرجان.
– عفاريت عدلي علام .. هو محدش قال ليوسف معاطي ان جلسات مجلس النواب مبقتش تتذاع ع الهوا.
– هذا المساء .. مهما خبيت جوازك التاني ع الناس كلها، هاتتقفش هاتتقفش .. الدرس المستفاد من حلقة النهاردة.
– هذا المساء .. في حب ريأكشنات حنان مطاوع وهي قاعدة على كرسي المساج.
– كفر دلهاب .. عم كنعاني قعد 22 حلقة يقول كداب نصاب لعنة وحلت على كفر دلهاب، والنهاردة اكتشفنا ان هو اللي طلع كداب ونصاب.
– ظل الرئيس .. المسلسل لو كان اسمه الحاسة السابعة كان هايبقي لايق أكتر.
– هشام ماجد اتريق على باسم مرسي من اسبوعين “خلصانة بشياكة” ، وأحمد فهمي اتريق عليه امبارح “ريح المدام”
– كلبش .. أول مرة أحب فيها محمد لطفي من ساعة فيلم “كابوريا”.
– كلبش .. امتي تعرف ان المسلسل نجح ؟ .. لما الحكومة تقرر تقفل معهد أمناء الشرطة.
– هربانة منها .. على التتر في 3 مؤلفين مشتركين في كتابة المسلسل ، وفي بداية كل حلقة يتكتب عليها اسم مؤلف تاني غيرهم.
– تامر حبيب طلق مراته “الحساب يجمع” ، وجميلة عوض اتفقت مع جوزها ع الطلاق “لا تطفئ الشمس”.
– الحصان الأسود .. الممثلين كلهم متهمين بالقتل، والممثلين كلهم بيدوروا على دليل براءتهم.
– محمود حافظ قرر يسيب حبيبته القديمة “دينا الشربيني” لعمرو يوسف “عشم ابليس” ، ومش راضي يسيب مراته القديمة “حنان مطاوع” لإياد نصار “هذا المساء”.
– سلوى محمد علي أول امبارح عملت كوسه ومحشي بتنجان في “رمضان كريم” وامبارح عملت ممبار في “٣٠ يوم”.
– حلو اوي انك تبقى شايف انت فين كمان خمس سنين، بس الاهم انك تبقى شايف انت فين دلوقتي وتتبسط وتستمتع باللي في ايدك .. هند صبري “حلاوة الدنيا”.
– اللي بيدور علي حقه في البلد دي ، يبقي هو الغلطان .. صلاح عبد الله “وضع أمني”
– مفيش حد مناسب أو لأ ، في حد بنحبه فبنعرف نستحمل معاه اللي مايناسبناش فيه .. إياد نصار “هذا المساء”.
– لو بتحبني ادعيلي ان ربنا ياخدني في ليلة القدر .. انعام سالوسة “رمضان كريم”.
– كلنا محتاجين دكتور نفسي .. أحمد عزمي “30 يوم”.
– قلب الأخت زي قلب الأم، مابيكدبش .. هبة عبد الغني “الحصان الأسود”.
– الراجل قبل الجواز بيروح ع التلاجة مش بيلاقي الحاجة اللي بيحبها فايروح ع السرير ينام .. بعد الجواز بيروح ع السرير مش بيلاقي الحاجة اللي بيحبها فايروح على التلاجة ياكل ، من هنا جت فكرة الكرش.. أحمد فهمي “ريح المدام”.
– الراجل لما بيزهق ، بيطفش .. ظافر العابدين “حلاوة الدنيا”.
– الست وقت الاهانة تمضغك زي اللبانة .. دينا الشربيني “خلصانة بشياكة”.
– لما بتلعب فيه كتير بيزيت ..شريف مدكور متحدثا عن الشعر في برنامجه ” شارع شريف”.
– ربنا يرحمك يا أمي ويرحم امهاتنا جميعًا ويخلي امهاتكم يارب.
نرشح لك : عبد الله غلوش يكتب: غلوشيات رمضانية (22)