غلوشيات العيد (1).. عنتر ابن ابن ابن ابن شداد

عبد الله غلوش

– الفيلم حلو للناس اللي دماغها تعبت من قصص مسلسلات رمضان المعقدة او من الحياة الملخبطة اللي عايشينها ومحتاج يفصل ويقضي وقت حلو من غير ما يرهق دماغه بالتفكير او عينه بالأكشن.

– للسبب اللي فات تقريبا ، حاول لو دخلت الفيلم متستغربش لو لقيت الناس او لقيتك انت شخصيا بتضحك علي افيهات هي في العادي مش بتضحك اصلا.

– كل ضيوف الشرف في الفيلم مكتوب قبلهم لقب ضيف شرف ، باستثناء درة مكتوب قبلها بطولة.

– اللي يشوف درة في الفيلم ، هيلاقى نفسه لا اراديا بيبوس ايده وش وضهر ويحمد ربنا لانها كانت غايبه عن مسلسلات رمضان السنة دي.

– مش عارف ازاي فات علي المخرج ينبه درة ان اللهجة التونسية حاجه والعربية الفصحى حاجة تانية.

نرشح لك: أندرو محسن عن فيلم هنيدي الجديد: بخيل جدًا

– النص الاول للفيلم احلي بكتير من النص التاني.

– الفيلم نوعا ما طويل ، اكتر من ساعتين وده الي حد ما جديد علي النوع ده من افلام العيد وغير مستحب في نفس الوقت.

– مشهد الاستعداد للمعركة بين فريق هنيدي وخالد سرحان ضد رجالة تميم عبده ، طويل وممل واتنفذ وحش ولو كان اتحذف من المونتاج كان هايفرق كتير في ايقاع الفيلم.

– هاتخرج من الفيلم في اكتر من لازمه معلقه معاك زي ، طياره مياره وابكي علي الممبره.

– علاء مرسي ومحمود حافظ ضحكوني اكتر من هنيدي ، ومحمود تحديدا اعتبره اجمل مفاجآت الفيلم بالنسبة لي.

– كاركتر باسم سمره متطابق تقريبا مع اللي عمله مع هنيدي قبل كده في تيته رهيبه.

– مشهد بلاي استيشن القبيلة وستار بكس القبيلة من اجمل مشاهد الفيلم.

– كل افيهات هنيدي عجبتني باستثناء افيه “لما نخلف عيل بطريقة اطفال الانابيب ، هايكون انتماءه لينا ولا للأنبوبة” ، حسيته صعب وقاسي خاصة علي اللي بيلجأوا للنوع ده من العمليات عشان يخلفوا.

– دخلنا حفلة ميدنايت في سينما فوكس مول مصر ، والقاعة تقريبا كان نصها فاضي كما هو حال باقي افلام العيد التانية باستثناء هروب اضطراري.

– بالمناسبة النظام شبه منعدم والنضافة مش موجودة والاستاذ المسئول عن قطع الفيلم وقت البريك ، قرر يقطعه بعد مرور ساعه بالتمام والكمال ، مش مهم ينتظر لنهاية المشهد او حتي يستنى هنيدي لما يخلص جملته.

– نفس الموظف لما رجع من البريك ، ساب الصوت مقطوع لمدة دقيقة كاملة.

– اغنية الفيلم حلوه ومبهجة اكتر من اعلان اورانج اللي عمله هنيدي في رمضان.

– بشكل عام فيلم حلو دمه خفيف حدودته سهله وبسيطة ، تقدر تدخله مع اسرتك او اولادك من غير ما تخاف من لقطة صعبة او لفظ خارج، هتضحك فيه كتير لكن مش هتوصل لمرحلة الصريخ.

– مبروك هنيدي .. مبروك ايمن بهجت قمر .. مبروك شريف اسماعيل.

–ربنا يرحمك يا امي ويرحم امهاتنا جميعا ويخلي امهاتكم يارب.