غلوشيات العيد (2).. تصبح على خير
عبد الله غلوش
– مبدئيًا كده رقم التليفون اللي اتبنت عليه قصة الفيلم مش رقم مي عمر ولكن رقم مساعد مخرج اسمه ضياء سيف.
– بسهوله بعد ما تتفرج ع الفيلم هاتكتشف ان بطله الاساسي مش تامر حسني بقدر ما هو المخرج وصاحب القصة محمد سامي .
– تقريبا الفيلم هو الوحيد من بين جميع افلام العيد اللي بيجمع بين الكوميديا والأكشن والرومانسي والـsuspense.
– الفيلم افضل من اخر ٣ افلام لـ تامر ” نور عيني ، عمر وسلمي 3 ، اهواك”.
– تتفق او تختلف على تامر حسني ، بس متقدرش تنكر انه اشطر وانجح مطرب اتجه للتمثيل من ايام عبد الحليم وحتى الآن.
– على غير العادة عجبني دور درة في الفيلم يمكن لانها كانت بتمثل شخصية واحدة بتمثل.
– نور اللبنانية لا اضافت للفيلم واعتقد ان الفيلم كمان معملهاش اي اضافة.
– محمود البزاوي اول مرة يضحكني من ايام فيلم همام في امستردام.
– النص الاول للفيلم يديك انطباع انك بتتفرج على جزء تاني من فيلم طير انت.
– تقريبا مسمعتش موسيقى تصويرية للفيلم وبالتالي محستش بدور عادل حقي.
– دور الاستايلست عبير الانصاري ظهر بوضوح في الفيلم وتحديدا مع مي عمر.
– بالمناسبة اللي يشوف مي عمر في عفاريت عدلي علام وريح المدام ، ويشوفها بعد كده في الفيلم ، يكتشف ان ٩٠٪ من موهبتها لا تظهر بعيدا عن زوجها محمد سامي.
– حتي الان ، مفهمتش ليه المأذون رمى نفسه في الميه وايه الافيه من حركة زي دي.
– ولا فهمت كمان ايه القيمة من ظهور تامر بشخصية الشبوكشي غير انه يظهر علي الافيش وهو متقمص شخصية جوني ديب في Pirates of the Caribbean .
– كمان مفهمتش افيه عربيات تامر اللي بتحمل ارقام ح 1 ، ح 2 ، ح 3 ، ولا قدرت اعرف محمد سامي كان يقصد منها ايه؟
– عموما شخصية الشبوكشي تحديدا اكبر نقطة ضعف في الفيلم لدرجة ان محمد سامي شخصيًا فشل في تفسير ظهورها للمشاهدين ولا الطريقة اللي تامر نام بيها ودخلوه بعدها في مركب في نص البحر.
– اهم سؤال خرجت بيه من الفيلم ، هو فعلا اللي اخترع اللبوس تعب اد ايه لغايه ما قدر يقنع الناس بالفكره؟
– الفيلم ساعتين الا ربع وهي المدة مناسبة للنوعية دي من افلام العيد.
– الفيلم هاتضحك فيه كتير ، لكن زي فيلم هنيدي برضه مش هتوصل فيه لمرحلة صريخ الضحك.
– دخلت الفيلم في امريكانا بلازا حفلة ٩ وتقريبا مكنش فيه غير كرسيين بس اللي فاضيين.
– قبل عرض الفيلم ، اتفرجت في الاعلانات علي برومو فيلم الخلية لأحمد عز وبغض النظر انه عجبني اكتر من كل بروموهات افلام عيد الفطر ، لكن محستش للحظه انه في اي شبه بينه وبين مسلسل كلبش غير ان عز وكراره عاملين دور ضابط شرطة.
– ٧٥٪ من اللي كانوا في القاعة بنات من سن ١٢ لـ ٢٠ سنة ، وكمان كان فيه اكتر من اسرة خليجية.
– هو تامر عمل عمليه ازاله شعر صدر ؟ .. سؤال وجهته بنت قاعدة جنبي لصاحبتها اول ما تامر ظهر بالفانلة الحملات الداخلية في شخصية اللالي.
– بوجه عام “تصبح على خير” ، فيلم حلو ومسلي وهاتخرج منه مبسوط ومش زعلان على تمن التذكرة اللي دفعتها.
– مبروك تامر حسني .. مبروك محمد سامي .. مبروك وليد منصور.
– ربنا يرحمك يا امي ويرحم امهاتنا جميعًا ويخلي امهاتكم يارب.