14 سؤالا أجاب عنهم الرئيس السيسي في مبادرة "اسأل الرئيس".. (نص كامل)
إيمان مندور – أحمد حسين صوان
ينشر موقع إعلام دوت أورج النص الكامل لجلسة “اسأل الرئيس” التي عقدت مساء أمس الاثنين، ضمن فعاليات المؤتمر الوطني الرابع للشباب، المقام في الإسكندرية، وأدارته الإعلامية خلود زهران، وأجاب خلاله الرئيس السيسي على العديد من أسئلة المواطنين، وجاءت كالتالي:
1- خلود زهران: موقف مصر ضد الدول الداعمة للإرهاب.. هل سنشهد في القريب الضغط على دولة قطر لتلبية تنفيذ الـ 13 مطلبًا؟
الرئيس السيسي: إحنا خلال السبع سنوات الماضية واجهنا مشكلات كتير معاهم، سببها التدخل في شئون الدول ودعم الجماعات المتطرفة، وبالتالي أدى إلى تدهور أوضاع المنطقة، ومصر مكنتش بعيدة عن كده.. والدليل إن إحنا عايشين في مواجهة مع هذا الفكر آخر 4 سنوات.
الحكومة المصرية قالت لن نتدخل في شئون الدول أخرى والتآمر ضدها، لأن ثوابت السياسية المصرية لا تتوافق مع هذا التفسير، وإن وجدت خلافات سوف تُحل بالحوار، التآمر والتدخل سبب تدمير بعض الدول وجعل مستقبلهم على المحك.
قلنا من أول يوم، من الضروري التصدي للدول الداعمة للإرهاب، وهنستمر على الموقف ده، لن نسمح بالتدخل في شئون الدولة المصرية بدون تمييز، لازم الدول الداعمة للإرهاب تتوقف عن سياساتها.
أسماء الجماعات الإرهابية المُختلفة هي أصحاب فكر متطرف واحد، ولازم على المصريين أن ينتبهوا لأبنائهم ووطنهم، لن تكون مصر ضد الدين، لكننا نريد الدين الحقيقي بكرمه وطيبته، فالدين لا يعذب ويقتل الناس.
موقفنا ثابت تجاه الدول الداعمة للإرهاب، بدون تمييز، وعليهم التوقف تمامًا عن دعم الإرهاب بدون استخدام أساليب مختلفة، الفكر اللي بنواجهه في مصر غير قابل للحياة، هذه الأفكار تصطدم مع التطور البشري، يجب إعادة صياغة فهمنا لديننا وحياتنا دون المساس بالثوابت.
إحنا مستمرين على موقفنا مع الدول الداعمة للإرهاب، والاستمرار في المقاطعة ده ضغط في حد ذاته، لأن المطالب مشروعة، إحنا عارفين ومعانا دليل على دعم هذه الدول للإرهاب، وقدمنا جزءا من هذه الأدلة، مصر لن تتراجع في التنازل عن حقوقها تجاه الدول الداعمة للإرهاب.
2 خلود زهران: هل هناك إرادة حقيقية من جميع الرؤساء في محاربة الإرهاب؟
الرئيس السيسي: أنا أتصور خلال الأربع سنوات الماضية، انكشفت وجوه عديدة من البعض، تجاه دعم الإرهاب، حيث إن العمليات الإرهابية انتقلت إلى بعض الدول الأجنبية، الإرهاب ليس له تأثير محلي فقط لكن من الممكن أن يتخطى الحدود الدولية، ومع الجهد وتوضيح الأمور لمسئولي الدول الأخرى، وأن أوروبا لن تنعم بالاستقرار إن لم يتم مواجهة الإرهاب.
3- خلود زهران: إجراءات الإصلاح الاقتصادي كانت قاسية، لكن بعض المواطنين لا يشعرون بهذا التحسن.. ما هو تقييم الرئاسة للإجراءات الاجتماعية التي تتخذها الحكومة لتخفيف الأحمال على المواطنين؟.. أنت وعدتنا بتحسن الأمور بعد 6 شهور والوضع ثابت.. وبعدها قلت إدوني سنتين ومفيش تحسن برضه، إمتى الوضع هيتحسن؟
هو دواء مر وقاسي، لكن النتائج ستكون جيدة، الحكومة في نقاش مستمر تجاه أي إجراءات، لتخفيف الضغوط على المواطنين.
هل الأول كان يوجد بديل للإجراءات الإصلاحية من عدمه؟ مكنش فيه أي إجراءات بديلة للإصلاح الاقتصادي، هذا الإجراء كان حتميا اتخاذه، لكن بقدر الإمكان نحاول التخفيف على المواطنين.
فمثلا بطاقة التموين تضم حوالي 75 مليون شخص، كان الدعم من 21 لـ50 جنيها.
بالنسبة للمعاشات، كان حديثهم قاسيا في بداية الأمر، لكن تم زيادة الحد الأدني للمعاشات حوالي 650 جنيهًا، عدد المستفيدين من المعاشات حوالي 9 مليون شخص.
بالإضافة إلى علاوة استثنائية لأصحاب قانون الخدمة المدنية، الحد الأدنى للعلاوة وصل 130 جنيه تقريبًا، أما معاش تكافل وكرامة فيخدم مليون أسرة تقريبًا، والمشروعات القومية وفرت 3 مليون فرصة عمل تقريبًا.
منظومة الكهرباء كانت تواجه أزمات عديدة قبل 3 سنوات، وكانت هناك شكاوى عديدة من المواطنين، لكن حاليًا تم مواجهة هذه الأزمة تمامًا، وجاري تطوير شبكات الكهرباء بهدف عدم انفصال التيار الكهربائي.
تجربتنا في مقاومة فيروس c تُعد تجربة فريدة، نتمنى أن نصل إلى معدل أفضل من المعدلات العالمية، ونجحنا في القضاء على قواعد الانتظار لمرضى فيروس c، بعد أن كانت تضم مئات الآلاف.
لازم نحط في الاعتبار هل يا ترى الحكومة تحسن من ظروف الناس ولا لأ؟.. هسألكم لو عندك ابن راح يقدم في التجيند ولما كشف قالوله مش هتدخل الجيش لأنك عندمك فيروس c، تخيلوا الأسرة دي هتعيش إزاي والابن ده بيبقا محبط إزاي!! .. دلوقت ما حدش بيدخل تعبان.
كذلك شبكة الطرق القومية تكلفتها 100 مليار جنيه تقريبًا.. أنتم طبعا في كل افتتاح لشبكة طرق تلاقي اللي يقولك أنا كنت باخد ساعتين في الطريق دلوقتي ربع ساعة بالكتير.. هل ده ماحسنش من حالنا؟.. ممكن أكون ما وصلتلكش حاجة بشكل مباشر بس لو وصلتها لأخوك أو جارك فده لازم تاخد بالك منه وتعتبره إنجاز.
شبكة الطرق القومية اللي اتكلفت تقريبًا 100 مليار جنيه، اللي اتعمل بعد التعويم لو اتعمل قبله كان بقى أضعاف.. ده كان توفيق من ربنا إننا أخدنا القرار وضغطنا على نفسنا إننا نعمل مشاريع تشغل الناس وتخدمهم.. مثلا عندك العلمين والإسماعيلية الجديدة وغيرهم مدن كتير.. إحنا عاملين المدن دي في وقت غير مسبوق.
أنا مطمن على بكرة، والأوضاع جيدة، والعالم يُدرك أن الأوضاع المصرية جيدة، لكن الشعب في حاجة إلى رؤية ذلك بشكل واضح.
قديما كانت تُجرى “قرعة” على وحدات الإسكان الاجتماعي، لكن حاليًا من يرغب في الحصول على وحدة سكنية يتم الموافقة عليها.
هناك 180 ألف أسرة تعيش في مناطق خطرة ونعمل على توفير سكن لهم، وفي 2018 سيتم توفير 1180 ألف شقة لنقل سكان المناطق الخطرة.
بالمناسبة ده بيئة لا تصل بالإنسان للتطرف ولا للإرهاب.. طب البرنامج ده كان ممكن يتعمل في 10 سنين، بس إحنا قلنا 30 يونيه 2018 نكون مسلمينهم ونخلي منهم بس حاجة للتاريخ عشان الناس تعرف كنا فين وبقينا فين.. مش عارف إحنا كده شوفنا تحسن ولا مشوفناش هسيب الحكم ليكم.
4- خلود زهران: هل هناك منظومة دعم صحي تصل بشكل صحيح؟ وهناك قواعد بيانات؟
الرئيس السيسي: شغالين فيها منذ عامين، بهدف الحصول على معلومات بشكل صحيح ودقيق، بطاقة التموين هي أكثر آلية بجدارة نستطيع من خلالها الوصول إلى مستحقيه، نعمل حاليا على استكمال قواعد البيانات لاتخاذ القرارات بصورة دقيقة، عملية إنشاء قواعد بيانات دقيقة، تستغرق وقتًا كبيرًا، لأن مدى دقة هذه البيانات، يتم اتخاذ الإجراءات.
5- خلود زهران: هل هناك إجراءات حماية اجتماعية في المستقبل؟
الرئيس السيسي: بالطبع، وهناك إجراءات للحماية في الفترة المقبلة.. الحزمة اللي فاتت اتكلفت 85 مليار جنيه.. لو مكناش قدرنا بإجراءات تسمحلنا ناخد أموال نضخها وننظم الدعم للناس.. وكل ما الموقف يتحسن هنحسن أحوال الناس أكتر.
6- خلود زهران: ما رأيك فيما حدث في أزمة جزيرة الوراق.. يرضيك إن الناس تطرد من بيوتها اللي عايشين فيها من سنين؟
الرئيس السيسي: شوفوا مصر خلال السنين اللي فاتت كان في تجاوزات كتير أوي أوي.. ولما أعلنا حملة إزالة التعديات حجم التعديات على الأراضي الزراعية وصل 2 مليون فدان.. وحجم التعدي على أراضي المباني وصل لـ 160 مليون متر.. مين ياخد دول بأي حق وياخدهم ليه؟
الدولة كانت غايبة والقانون كان غايب، سواء في الأراضي الزراعية أو المباني.. عاوز أقولكم حاجة الوراق كمثال 1400 فدان لو اتبنوا بشكل عشوائي قولولي الصرف بتاعهم هيبقى فين.. في النيل.. بعد كده تقولي تعالي شوف أولادنا عندهم أمراض كبد وكلى بسبب المياه الملوثة ونعمل محطات صرف وو إلخ.
الوراق كجزيرة أكبر من الزمالك في أرضها، شوفوا الأرض لما اتخططت واتعملت بقت الزمالك.. ولما ما اتخططتش بقت إيه دلوقت؟
في الإسكندرية شايفين الأراضي اللي اتبنى عليها بشكل غير مخطط، شارع عرضه أقل من 7 متر وتلاقي فيه أبراج 20 دور..إحنا عايزين الدولة تبقى دولة ولا هنفضل نتمدد بشكل عشوائي عليها دون سيطرة!
في دول ما تقدرش تشيل شجرة أو تزرعها غير لما الدولة توافق وتسمحلك بـ ده.. إحنا كنا غايبين وبالتالي حجم التجاوز اللي تم كان كبير أوي علينا.
يا مصريين انتبهوا إحنا عندنا من 10 أو 11 بحيرة محتاجين نستعيد كفائتهم مرة أخرى، مثل بحيرة المنزلة.. لما مخدناش بالنا منها الـ 50 سنة اللي فاتت.. حجم التعدي وتجفيفها أخد كمية كبيرة، طب الصرف فين في البحيرة، أهالينا استخدموا المصارف الزراعية كمصارف صحية.
بدون مبالغة عشان أستعيد كفاءة بحيرة المنزلة محتاج 100 مليار جنيه عشان أخليها بحيرة زي ما كانت من 50 سنة.. يبقى إحنا إذا ما كناش هنسيطر على أنشطة الدولة سواء على طرق أو مساكن أو سكك حديد والدولة ترجع مرة تانيه يبقا إحنا بنحرت في الميه.
الأخت اللي بتقول هيخرجوني من بيتي لا مش هيخرجوكي من بيتك.. هنعملك بيت بس ما حدش يتوقع إن الدولة ضدك ماتخليش رؤيتك للأمر على مصلحتك الشخصية فقط.. إذا ماخدناش بالنا بلدنا هتضيع.
ياريت نخلي المصلحة العامة لينا أكبر كتير من المصلحة الخاصة.. هيبة الدولة وسلطان الدولة محدش يمسه.. محدش يتصدى للشرطة هو مفيش قانون!! فيه قانون يجيبلك حقك..إحنا مش رايحين ناخد حقك.
إحنا عندنا التمويل ونقدر نعمل كل حاجة.. عايزين بس الفكرة وإدارتها.. هل تبقى كلها عشوائيات كده ولا الزمالك الجديد؟.. إنت حقك محفوظ ومش على حسابك.. مش هنرمي حد في الشارع بس دي بلدنا كلنا.
7- خلود زهران: هناك بعض المطالبات بمساحة من تجاوز القانون من أجل الفقراء.. هل تؤيد ذلك؟
الرئيس السيسي: يعني “إتاحة الأراضي من أجل الفقراء”.. ده عنوان شكله جميل بس هيعمل فينا إيه؟.. أنا مؤمن في المرحلة دي بالعمل المركزي.
في نقاشي مع وزير الإسكان قلت له أنا مش عايز أبيع الأراضي أنا عايز أبيع منشآت خالصة.. لو عملنا مخطط مناسب يرضي أذواق الناس وبنسب التسديد، يبقى اشتغلنا ورجعنا مرة تانيه التطور العمراني المناسب.. إنما نطرح أراضي كده ونسيبها للناس يبقى كل واحد هيعملها ويبنيها على مزاجه.
هيقولوا ما إنت بتطلع رخص.. أقولكم حتى في الأماكن الراقية في تجاوز.. التجاوز عادة مصرية.. لحد ما نرجع ونعمل حالة من الانضباط لازم يبقى الإدارة والتصرف مركزي.
8- خلود زهران: مواطنة تسأل.. ليه دايما لما تتكلم بحس إنك زعلان مننا كمصريين ونبرتك عصبية معانا؟
الرئيس السيسي: لا والله عمري ما أزعل منكم.. أنا زعلان على حالنا.. حد يزعل من أهله!.. لكن صعبانين عليا.. إنتم تستاهلوا أكتر من كده بكتير.. أصل أنا بحب الحاجة الحلوة الصح أوي ربنا خلقني كده وأحب الكمال.. فعايزكم كده وعايز بلدي مفيهاش غلطة.. فمش متعصب ولا حاجة.. كل ده وبتعصب!.
ببقى عايز ابني او بنتي لما يجي يتكلم في موضوع يبقى عارفه.. زي مطلب الصبح لما ابننا قال التعليم والمرتبات.. طب انت بتطرح وفاكر إننا نقدر ندي وماديناش!
لو بنتكلم على أموال صعب لكن لو بنتكلم على مواطن عايز يدي بغض النظر عن إن أنا بديله إيه هيبقى أمر مختلف.. لو قلت المدرس والطبيب فاللي بيعملوه لا يقدر بثمن والدولة مقصرة مش قادرة تديله دلوقتي.. لكن لو المدرس عرف وعاش القناعة دي ..ده أنا بديه 10 أو 20 طالب هما مستقبل مصر.. عارف إنك عاوز تعيش وتتجوز.. وإحنا بنحاول نساعد.
عارفين اللي قاعد فوق وبيبقى شايف كل حاجة!.. أهو أنا قاعد فوق وشايف كل حاجة.. وبحب الحلو والصح أوي والكمال.. شوف المفارقة إحنا عاوزين اليمين لكن الحال في الشمال.
9- خلود زهران: هل قررت الترشح لفترة رئاسية ثانية؟
الرئيس السيسي: أنا مش هجاوب السؤال كده.. أنا هقول للمصريين اوعوا في أي انتخابات لأي رئيس.. اوعوا ما تنزلوش.. ده يوم بيتحدد فيه مصير مصر.. فما تستخسرش يوم في مصر ولو هتقف 10 ساعات.. لازم العالم يشوف إن إرادتنا في إيدينا.. زي ما قالوا إزاي إحنا مستحملين الإجراءات والوضع دلوقتي.. فده يدل إنهم متابعين وراصدين الموقف.
أيا ما كان الانتخابات وأيا ما كان اللي نازلين فيها كمرشحين.. أنا اقول لناسي انزلوا عشان تقولوا إحنا اللي جبنا ده.. مين اللي تجيبوه؟ ده قراركم وتتحملوه عشان ما تقولوش إيه ده ما نزلناش كلنا.. وما اخترناش ده.. انزلوا وهاتوا اللي انتم عايزينه.
اللي كاتبه ربنا هيكون ..أنا لو مؤمن بالله صحيح وبمارس أيماني هرضى بكل تواضع شكرا سلاموا عليكوا.. إحنا بنتكلم على دولة عايزين نطمن عليها لأودلانا.. الأساس فيها إنكم تختاروا.. وروا الدنيا كلها إنكم بتختاروا اللي هيقود وبعد كده ربنا يولي من يصلح.
10- خلود زهران: توجيهات الدائمة للقائمين على هذا المؤتمر لتطويره، فكان هناك تطوير لهذه الفقرة، لذا نعرض تقريرا مصورا للناس بتسأل حضرتك بنفسها وقول رأيك وإجاباتك؟
الرئيس السيسي: أنا هرد على اللي سأل عن تفويض الإرهاب لأن ناس كتير سألت.. يا مصريين إنتم اللي رحتوا الساحل وسبتوا الانتخابات وحصل اللي حصل فلما جات النتيجة كده قلتوا لا مش هنكمل.. إنتم تحديتوا أقوى تنظيم في العالم.
ساعات الواحد يعمل حاجة يبقى ردود أفعالها أقل من المتوقع.. المسؤولين لازم يقولوا للناس خلوا بالكم اللي جاي صعب. .كان لابد يبقى فيه رسالة مباشرة ومكنش في حل غير إني اطلب تفويض مباشر.
نتائج اللي عملناه سوا ده هنشوفها سوا برضو.. حد يقود ناس ويحكمهم غصب عنهم!! ايه ده.. أنا أقعد على الكرسي ده يوم ضد رغبتكم!! والله ما يكون.
أنا مستغرب من رد الفعل عشان كده قلتلكم في الأول إدوني تفويض.. المواجهة اللي بدأت من بعدها هل يا ترى معدلاتها بالنسبة لمصر طالعة كده؟!.. الإرهاب بيتصاعد ولا بيتناقص؟.. إنت عايز كأنك قفلت التليفزيون يعني بضغطة الإرهاب خلاص خلص!.. هو مؤلم لينا لكن إحنا كل يوم بنحقق نتائج أفضل والضربة اللي ما بتموتناش بتقوينا.
إحنا موجودين وشغالين دلوقتي وإحنا بنتكلم كده.. في شغل ف سينا بقاله 15 يوم المفروض إن الاعلام يغطي ده.. مش عشان الإعلام أو حاجة.. كل يوم في 10 أو 11 عربية جايين من الحدود الغربية بيتفجروا متخيلين لو دخلوا عندنا بالأسلحة دي؟
الناس اللي في سوريا والعراق هتيجي على ليبيا ومنها لفين؟.. أتصور إننا بنتحسن وهما هيفضلوا كده لفترة طويلة.. إحنا مستعدين نقاتلهم.. أنا لا أتردد ثانية في المواجهة بمنتهى الحسم لأن اللي بيحصل منهم ده ما يرضش ربنا.
الأخ اللي قالي إحنا اديناك تفويض أقوله إحنا بنتقدم وكل حاجة بنوجد لها حل.. لكن ولادنا جيش وشرطة وشعب واللي بيتعرضوله كل ده محاولة لاضعاف روحك المعنوية.. نخلي بالنا وأي حاجة مش طبيعية نبلغ ونوعي ولادنا.
النقطة الثانية.. حد بيقول اديت معاش للأسر المحدودة طب فين الأسر المتوسطة؟
إنتم فاكرين الموضوع ده هيستمر قد إيه؟ اوعوا حد يقول 10 سنين أو حاجة.. تفتكروا الاحتياطي بتاع البنك المركزي الشهر ده عامل كام؟.. حد كان يتصور انه النهاردة هيبقى 35 مليار؟
بيقولولي مش سعيد انهم 35 مليار؟.. قولتلهم لأ.. أنا عايز 350 مليار احتياطي وهبقا مطمن.. الحالة الصعبة دي كانت أقصى ما يمكن إنكم تقابلوه.. النتايج لينا كلنا دولة قوية للجميع.
فيما يخص عودة الجماهير للملاعب.. لما ناقشنا ده قلت مش هقدر آخد قرار غير لما الأجهزة الأمنية ووزارة الشباب يكونوا مطمنين بدل ما تحصل حاجة تؤلمنا.. قلت كل حاجة تتحل بفكرة قابلة للتنفيذ.
بقول تاني في جزء إحنا بنستعيد حالة الانضباط للدولة بس دي بتاخد وقت.. حالة الانفلات من 4 أو 5 سنين هل موجودة دلوقت؟.. لا طبعأ.. بس في جزء كبير مرتبط بينا إحنا كمصريين.. ما هو اللي بيروح الماتش ده ابني وابنك.. يا ترى إنت مجهزه إزاي.. في جزء كبير جدا على المجتمع.. وفي الموضوع ده ماقدرش آخد قرار فوقي لأ.
أما عن عودة السياحة.. أنا قريب من ملف السياحة منذ أكثر من 50 عامًا، وعرفت إن السياحة تشهد تطورًا عندما يكون هناك استقرار أمني مدة زمنية طويلة، ومن الضروري أن يكون الشعب مُدركا إن في حال وجود شخص يرغب في سقوط مصر، يبحث عن نقاط القوة، مصر لديها أحسن شواطئ ومناخ جيد.. هنعمل مدن ساحلية ع البحر المتوسطة ماحدش شافها غيرنا.. والعمل جاري حاليا.. إحنا جاهزين لكن لا نوجد شركات تستطيع تنفيذ المطلوب..
لا توجد مشكلات مادية.. أوعدكم بحل أزمة السياحة.. الأماكن الجديدة ستعيش فيها كل الطبقات وليس للأغنياء فقط، ستشهد المدن الساحلية الجديدة تأمينًا شديدًا، بالإضافة إلى توفير فرص عمل للشباب.
إحنا بنحاول نزود الإجراءات الأمنية ونحمي على الاقل المقاصد السياحية بشكل اكبر..إنما الجديد هيبقى ليه إجراءات امنية نسب اختراقها صعبه جداا.
11- خلود زهران: ما الخطة المتكاملة لدعم الشباب سواء من خلال القروض؟
الرئيس السيسي: القطاع المصرفي مؤهل، لكن هل نحن كشباب لدينا مكاتب ومشاريع لها دراسات جدوى؟.. القطاع المصرفي لدينا كويس جدا.. حجم الأموال التي أخذت من الـ 200 مليار رقم كويس.. الموضوع ماشي كويس.. لأن الارقام بتتكلم والنتايج هي اللي بتحكم..
12- خلود زهران: ذكرت أن الإرهاب يتزايد.. متى يمكن أن نقول أن مصر تغلبت على الإرهاب بشكل نهائي؟
الرئيس السيسي: سؤال صعب.. لأن هل إحنا نجحنا في مواجهة الفكر الارهابي الكبير ده.. لسه مش كله.. الإرادة السياسية وحدها لا تكفي.. طالما لا توجد إرادة من كل الجهات.. هناك خطة ليست ناجحة بالشكل المطلوب حتى الآن.
فكر الخوارج ده موجود من مئات السنين وبينموا وينكمش ويتقلص.. ده زرعة شر اتزرعت وهتاخد وقت كبير أوي عشان تنتهي.. يمكن تاخد عشرات السنين .. ده عصر من العصور اللي بتعيشها الأمم للفهم الخاطئ للأديان.. الدين عمره ما كان كده غلظة وعنف.. ربنا خلقنا مختلفين فلازم نحترم اختيار الآخرين.. ده مش إنسانية وتحضر ده دين.. لكن في المجمل إحنا ماشيين بشكل كويس.
13- خلود زهران: ما موقفكم من الأحداث الأخيرة في القدس؟
الرئيس السيسي: أحداث مؤسفة وتستدعي حالة ليس لها لازمة، لذت أوجه حديثي للشعب الإسرائيلي والقيادة هناك.. هذا الأمر يجب أن يتوقف.. يجب أن نحترم مشاعر المسلمين تجاه مقدساتهم، أمر هام ألا نستدعي موضوعات وتجاوزات تستفز المسلمين سواء داخل فلسطين أو خارجها.. يجب أن نحترم بعضنا.. وبوجه حديثي للقيادة الإسرائيلية والشعب تاني أرجو ألا يكون هناك أي عمل يترتب عليه أي غليان موجود في المنطقة.
بالمناسبة نحن لا نستغل هذه الأحداث لكي نزايد ونقول نحن حماه.. لا لازم نقول إننا عايزين نعيش مع بعض ونحافظ عليه.. ده اللي بتمنى إن القيادة الاسرائيلية والشعب الفلسطيني يتجاوبوا معاه.
14- خلود زهران: هل من كلمة أخيرة للمصريين في الإسكندرية؟
الرئيس السيسي: المؤتمر يغطي شريحة جغرافية أكبر من مكانه.. لذا أوجه حديثي للجميع.. أنا قلتلكم عمري ما هبيعلكم الوهم.. تقديري إننا ماشيين كويس أوي.. ما تقيسهوش بأسعار بس.. أنا مش هسيبها.. لا ده لازم هيزيد حجم المعروض وآليات التسويق تتحسن، ويكون في المنافسة عامل يرجح تخفيض الأسعار.
بالمناسبة.. حد سألني ليه ما دخلتش في مواجهة مع رجال الأعمال. طب ليه!.
أنا مش ساكت بس في حاجات معروفة للناس وحاجات لأ.. قلت ميعادنا في يناير وفبراير الجايين بكشف حساب بكل شيء.
والأخت اللي سألت على موضوع الكورنيش في الإسكندرية.. الحلول لأشياء كثيرة موجودة، لكنها تحتاج إلى وقت.. كل الأخطاء التي ارتكبت لازم مكان جديد، الأماكن الجديدة مش هيكون فيها مشكلة لا دلوقت ولا مستقبلا.
مفيش حتة ف مصر إحنا سايبينها.. كان عندهم مشاكل كتير ف مطروح زي مشكلة المية واتحلت.. عشان كده بشكركم على مجهودكم وبطمنكم على المستقبل طول ما إحنا ماشيين نحو هدفنا.