محمود رضوان يرد على مقال “أوعي تتجوزي مصري”
ليه تتجوزي واحد أكبر طموحه إنه هياكل محشي على الغداء؟
غلبانة يابنتى.. اللى يشوفك وانتى شايلة الكرمبة وراجعة م السوق ما يشوفكيش وانتى بتطلبى المحشي جاهز يدوب هتحطيه فى الحلة وتحطى الشربة وتولعي النار وغالباً هيطلع ماسخ لانك لبخة ومش هتعرفي تسوية عدل بالإضافة لأن الرز بتاعه بايش من ركنة الفريزر.
ليه تتجوزي واحد مفهومه عن الرياضة لا يتعدى متابعة نتائج ماتشات كرة القدم؟
فعلا الراجل المصري مابيعملش رياضة غير الجري ورا الاوتوبيس والنط من الميكروباص وهو بيجري وتسلية أوقات فراغه في المرور قفزا مابين السيارات لانه بيحب لعب الاكروبات ويهوى العاب السيرك.. أقولك خليكى في العيال بتوع الجيم وعاش.. يصحى من النوم يروح الجيم ويضرب البروتين والمكملات عشان يعمل فورمة الساحل هما دول العيال الصح ياشيخة.
ليه تتجوزي واحد شايف الكرش عزوة؟
فعلا ماهو لو انتى مهتمة بطريقة الأكل الصحى فى البيت مش هيطلع له كرش، لو مبتقعديش تلُغي معاه ساعة وترغى وتسدى نفسه وتكئبيه وتحكيله عن صاحبتك اللى جابت كذة وزميلتك اللى سافرت تتفسح فى اوروبا وبنت خالتك اللى اشترت شاليه فى بورتو مش عارف فين؟ هيعمل أيه ياعينى بيحط همه فى الأكل ياكئيبة.
ليه تتجوزي واحد شايف البنات لعبة؟
لو شايف البنات لعبة كان أيه اللى وقعوا فى واحدة زيك ابعد بكتير عن مفهوم البنت أصلا البنت اللى هى رقة ونعومة وأنوثة مش بتاع عايز أيه ياض ولا اقعد لا أخنفك ولا بتاع أنا “اتفشخت” النهاردة فى الشغل.
ليه تتجوزي واحد شايف نفسه ضحى بنفسه علشان عمل لنفسه كباية شاي؟
حقيقي لأن أمه اللى ربته هى واحدة منكم عادى ست زيك فضلت تدلع فيه وعودته على كدة ومع ذلك ممكن يقوم الصبح عادى يعملك نسكافيه ويجبهولك لحد السرير لو شاف وش غير الوش العكر بتاعك وانتى صاحية من النوم.
ليه تتجوزي واحد ماسابش فيلم إلا وعلق على كل بنت فيه؟
طبيعي يعلق، اذا كان لو جه في يوم قالك كلمة حلوة أول حاجة هتيجى فى دماغك الوسخ أنه عامل عملة أو بيخونك وهتسأليه سؤالك الخنيق هو فيه حاجة إنت اكيد ليك مصلحة.
ليه تتجوزي واحد درس تضاريس كل بنت قابلها في حياته ولسبب مجهول قرر يتنازل ويعرفك؟
عارفة ليه لإنه لو ماحاولش معاكى هتروحى تشتكى للبنات اللى زيك وتقولى دا زى أختى أو إحنا اخوات وهما هيقولولك دردحيه. انتو كدة تحبوا الراجل الخلبوص وتموتوا فى الراجل اللى بيلعب بديله.
ليه تتجوزي واحد خايف من فكرك؟
فكرك؟؟؟ الكلمة بتموتنى من الضحك يعنى شافك مثلا هتخدى نوبل وقال لا والنبى ما إنتى طالعة نوبل. أيه ياشيخة ثم إنتى لوعندك فكر أكيد كان هيطلع قبل الجواز يعنى هتبقى ميزة يتجوزك عشانها وبعدين اللى عنده فكر مش ممكن حد هيعوقه عشان يوصله بس فكرى إنتى الأول دا حتى الفكر اليومين دول بيجيب فلوس.
ليه تتجوزي واحد خايف من قوتك؟
قوتك فعلاً؟ .. ناعمة وقوية وكلها حنية.. أهم دول اللى بيضحكوا عليكى عايزينك كدة قوية ومتحررة بتخرجي بالليل وتسهرى وتسجرى وسهلة وبتدخلي شقق أصحابك عادى بس أول ما تقولى ياجواز هيعتبرك ضعيفة وست عادية بتدور على الحل التقليدى يعنى زيك زى البنات الضعفة اللى مالهمش حيلة.
ليه تتجوزي واحد كل هدفه إنه يكسر إرادتك.. ويدمر طموحك؟
موافق بس أيه هي الإرادة؟ انك تبقى حرة وسهلة ولذيذة ولا إرادة انك تبقى زوجة ناجحة وزوجك ناجح وولادك كمان ناجحين وشاطرين وعاملة عيلة ممتازة تتباهى بها قدام الناس أم مثلاً ودكتورة أو مهندسة أوصحفية معاها زوج على نفس المستوى وأطفال يشرحوا القلب بنيتوا نفسكم وبيتكم وحققتوا قدر معين من الاستقرار فى الزمن الصعب. دى مش إرادة ولا لازم الاردة فى انك تبقى سنجل وفري وفيمن.
ليه تتجوزي واحد مفهومه عن القوامة إن التفاهم إتجاه واحد؟
لانه لو ماشكمش شطحاتك وجنونك مش هتحترميه ما إنتى كمان عمرك ماهتحبى راجل طرى بيوافقك على كل حاجة وجربى كدة كل م الراجل يوافقك على حاجة هتلاقى نفسك تلقائيا بتتمادى وأسألى واحدة صاحبتك جوزها فضل يتنازل حتة حتة عشان يرضيها حالها وصل لأيه ؟
ليه تتجوزي واحد مش عارف يعني إيه بنت.. مش فاهم احتياجاتها ولا ظروفها.. ليه تتجوزي واحد شايف إنه مسؤلية الرجل محصورة في إنه يجيب فلوس للبيت.. ده بغض النظر هل انتي كمان بتشتغلي أو لأ؟
فعلا ليه تتجوزى واحد كدة؟ اتجوزى واحد يقدر ظروفك وهاتوا بسكوت وسقوه فى الشاى كل ليلة وخليه يقعد يقولك أحلى كلام كل بس انتى نفسك هتقرفى وتقولى بعد شوية الحب مش كلام وطبعا هتفضحيه فى أول خناقة وتقولى دا أنا اللى فاتحة البيت وبصرف عليك يانطع.
ليه تتجوزي واحد حياته في القهوة وصحابه أهم من أي حاجة وأي حد؟
أعرف ستات كتير بتقول أوووف دا لازق فى البيت على طول ياريته ينزل هيروح قهوة ولا يخرج يهوينا … أمجانيييييييييين.
فعلا .. متعمليش كدة في نفسك وتشيلي مسؤلية طفل عنده فوق ال ٢٥ سنة.. إذا كنت والدته مش قادرة على رعاية هذا الطفل الكبير جداً… نصيحتي ليكي… متعمليش كدة ف نفسك.. محدش قال إنك مفروض تكملي مسيرة والدته!
لقراءة مقال “إوعي تتجوزي مصري”.. اضغط هنا
اقرأ أيضاً:
مترجم “داعش” يفسر سبب استسلام الضحايا قبل الذبح
ضحى الزهيرى تناقش الشأن المصري من دبي
عمرو أديب لشيخ الأزهر: اتنحى يا أخى
يوسف الحسينى: مصر بتناديكم أحلى من مصر قريبة