محمد فؤاد وتامر حسني وهيفاء وهبي في المؤتمر الإقتصادي
مينا فريد
نخبة من أهم فنانين العالم العربي .. في طريقهم الآن للمؤتمر الإقتصادي .. و كان لنا هذا اللقاء الحصري لإعلام.أورج
أستاذ بهاء سلطان .. تفتكر إيه نتيجة مؤتمرنا ؟
“ياترى يا مؤتمرنا ..يا ترى.. هتعمل إيه يا مؤتمرنا.. ياترى .. هنفرح بيك يا مؤتمرنا …يا ترى .. أ ه ه ه .. هتجيب إستثمارات ولا .. هتجيب دولارات .. ولا .. هتجيب حفلات ولا .. هنقضيها كافيهات ولا .. ”
كالعادة الأستاذ بهاء سلطان متحيّر و عنده كل الإحتمالات متاحة .. شكرا أستاذ بهاء..و معانا دلوقتي الفنان الأصلي محمد فؤاد ..و بنقوله جيت المؤتمر النهاردة ليه ؟
” أنا إبن بلد أنا بفهم في الأصول .. و بيهاجموه و أنا لازم أقول.. مؤتمر عملناه…. مع ضيوفنا جيناه .. و بإذن الله نفرح سواا .. أنا إبن بلد أنا مش بيّاع كلام .. و التفجيرات دي مش تمام .. لكن خلاص عملناه .. و أدينا معاه.. و بإذن الله نفرح سواااا”
شكرا يا فناننا .. دلوقتي الفنان سامو زين جااي علينا .. نحب نسأله.. رغم إنك مش مصري حضرتك جيت المؤتمر ليه..؟
” أنا لسه إمبارح جيهان عبدالله سألاني نفس السؤال في أجمد سبعة الساعة سبعة.. أنا جيت كرسول للعشاق و أمير للعشاق.. .وعامل حملة رهيبة ع البيدج بتاعتي في الفيسبوك.. فقررت أجي أخود صورتين عشان صورة البروفايل.. ”
بنشكر الفنان ساموزين … و بنسيبه يتصور…
و دلوقتي في دوشة جامدة .. إيه ده… ده تامر .. تامر حسني جااي و معاه تلاتين معجبة مغمن عليهم ..
الفنان تامر حسني .. حمدالله على سلامتك من الحادثة اللي حصلتلك في الكليب الأخير ..
الله يسلمك
ياترى شايف إيه أحسن حاجه في مؤتمر النهاردة ؟
أجمل حاجة في مؤتمرنا هو ده … أه هو ده ..أه ه ه الناس..
و أكتر حاجة شداني ليه .. هو ده.. أه هو ده.. أه ه ه .. الإحساس..
شكرا يا تامر.. إحساس إيه.. ماعلينا بس فعلا فيه روح حلوة من كل المشاركين ..
ودلوقتي شايفين الفنان سعد صغير .. شايل علم مصر و داخل عمّال بيرقص و معاه فرقته دي إحلوّت أوي … و بنسأله
أستاذ سعد .. حضرتك شايل العلم ليه و جاي بيه ؟
العلم العلم العلم .. العلم .. أحمر .. العلم .. ف أبيض … العلم .. ف أسمر.. العلم .. و نسر صغيّر .. في العلم .. ينفع في شتا أو صيف ..
هو إيه ؟
العلم .. العلم .. العلم
طب كده إحنا هنرقص .. بالتوفيق يا سعد .. بس ياريت ماتدخلش ..
و شايفين شعبولا قاعد .. بيلف سجاير ؟ إيه ده .. إيه اللي جابك هنا و بتلف إيه .. يا نهار إسود !!
بطلت السجاير ده تبغ مش حشيش.. السجايرغليت و كمان فلوس مفيييش … و إييييه
جيت مؤتمر النهاردة .. و كلي حماس لبكرة … و معرفش ده عن إيه بس قالولي عنه فكره .. و إيييه
بنسيب شعبان يكمل لف …شكرا يا شعبان و شايفين الأستاذ هاني شاكر جاي من بعيد متأثرا.. أستاذ هاني شاكر حضرتك واضح عليك التأثر خير؟
لا يا حبيبي و الله ده الطبيعي بتاعي .. أنا بس متأخر شوية “مشيرا للوفود” بحبكم.. بحبكم
تحب تقول إيه بخصوص المؤتمر..؟
مغمضا عينيه .. ياريتني .. جيت المؤتمر قبل ما ييجي حد.. ياريت ييجي فيه مشاريع بتشد .. ياريتنا عملناه من زمان .. من زماااان .. إمممم .. إممم
لا إحنا هنقضيها إممم .. بنشكركم و بنتمنى مؤتمر ناجح جدا.. إيه ده .. إيه ده …دي الفنانة هيفاء وهبي و نانسي عجرم و إليسا و ميريام فارس جايين .. يانهار أبيض .. يانهار أبيض الله يمسيك بالخير يا كابتن مدحت .. دول جايين علينا ده بجد ..
هيفا ..
عيون هيفا…
هو فيه كده”
يا مينااااا ..إصحى كفاية نوم كده .. مش هنقضي الأجازة نايمييين…
يعني إنتي ماتجيش تصحيني إلا في أهم حتة في الحلم … حاضر حاضر…
حلم كنت بتحلم بإيه ؟
كنت بحلم بالمؤتمر الإقتصادي يا حبيبتي .. أنا أحلامي كلها وطنية ..
اقرأ أيضًا:
هاشتاج “العاصمة الجديدة” يتصدر “تويتر”
“كيري” يوضح سبب ذكره لإسرائيل بدلًا من مصر
“شردي” عن وزير خارجية بريطانيا: “راح فين ده؟”
عمرو أديب يعلق علي “زلة لسان” كيري
فجر السعيد : مبارك اعترف لي بغلطة تستحق المحاكمة
وزراء محلب لا يعرفون بدقة المطلوب من المؤتمر الاقتصادي
كيف حارب إعلام الإخوان المؤتمر الاقتصادي؟