محمد يا سادة.. ده صاحب رسالة
قصيدة: إسلام وهبان
محمد صلاح اللي فرح قلوبنا
وروحه اللي عافرت لآخر دقيقة
ونجت بأمله عيون كات غريقة
ورغم الدعا والتضرع بشدة
ف كل اللي ناله مهوش محض صدفة
محمد يا سادة ده صاحب رسالة
وعمره ما آمن بمعنى “استحالة”
ده مش بس لاعب وعاشق للعبة
ده فنان بيغزل في حلمه بمهارة
وشاف ياما خيبات تدمر طريقه
وناس تاني تطلع
وناس تسبي حلمه
لكن روحه دايما بنورها بتقدر
تحافظ على الحلم وتزيد بريقه
محمد في برج العرب كان رسالة
لكل اللي فكر يفرط في بكرة
لكل اللي مل وتعب من المقاومة
وقرر يسيب الظروف تمحي حلمه
محمد وقع
بكى وبكىَّ جيله
لكن روحه قدرت تقول الحقيقة
يا كل اللي آمن بحلمه وعافر
لآخر نفس.. وباليأس كافر
إلهك جعل للكون ده سنة
مافيش جهد ضايع
ولا ظرف شافع
لكل اللي حاول بكل استماتة
وصدق في حلمه
هيوصل هيوصل
