مينا فريد : الفيلم القبطي "نسر البرية" ..أنا كمينا انبهرت
لأيام كتير كان وسط الشباب المسيحي بيتكلم عن فيلم نسر البرية ..العرض الأول له كان في 2014 .. الفيلم إنتاج دير السريان و بيتوزع في المكتبات المسيحية بصورة مكثفة و ناس كتير بتشكر فيه.. عديت البوستات دي كلها عادي جدا .. ذكرياتي مع الأفلام المسيحية اللي كلها بتحكي عن سيرة قديس من القديسين.. لا تتعدى ذكريات طفولة و إنتهت مع مراحل المراهقة … يمكن الممثلين المسيحيين في مصر كلهم إشتغلوا في أفلام مسيحية .. أشهرهم طبعا جورج سيدهم و هاني رمزي و يوسف داوود و مؤخرا ماجد الكدواني .. بس دايما الأفلام اللي بتحكي سيرة القديسين كانت بتبقى ساذجة جدا بالنسبة لي .. إنتاج ضعيف و أداء تقليدي و إخراج أقل ما يقال عنه إنه ضعيف و مخرج أوحد إسمه ماجد توفيق.. لما كبرت شوية و شفتهم .. كنت بحسها أفلام كوميدية و ماكنتش بتوصّل أي حاجة خالص.. في نفس الوقت كان المسرح الكنسي مزدهر و بشدة و طلّع مواهب بصورة كبيرة و فجّر قدرات شباب مصريين موهوبين .. و إتحرر من قيود الإنتاج الضعيفة و قيود سير القديسين و بدأ يتكلم في الحياة و المجتمع و الناس .. صحيح الشطحات المسرحية القوية كانت بتتقابل بتضييق من القيادات الكنسية بس كانت متنفس .. طلع منها شباب كتير جدا لخدمة مش بس الكنيسة ولا المجتمع .. لأ كمان وصلت لخدمة العالم … مثال لده شاب خريج فنون تطبيقية إسمه جون ميلاد .. موهوب جدا.. وصل إنه إتكرم من أوباما نفسه لجهوده في مكافحة الفقر و القهر و الظلم و التحرش بفرقة بدأت بهواه إسمها و لسه و وصلت للعالم كله .. جون بدأ بمسرح لا يتعدى مساحته 25 متر مسطح في الفيوم كان لي شرف إني وقفت مثلت في مرحلة جامعة في نصوص من كتابته و إخراجه ..ووصل للعالم كله بفنه و موهبته .. و لما رجع مفيش قناة في مصر ما إستضافتوش… فيه زي جون مواهب كتير شابه .. يمكن معندهاش مغامرة جون .. بس محتاجه عين و زقة و فرصة تطلع و تنوّر سما الفن المصرية.. و تخرج من عباية الكنيسة للعالم .. و زي ما بتقدم رسالة جوه الكنيسة فعلا تقدر تقدمها بره..
ده فيديو لتكريم جون من أوباما
نرجع للفيلم.. قناة الكنيسة القبطية الأرثوذكسية قبل عرض الفيلم على شاشتها بإسبوع عملت تنويهات كتير .. برضه ما إهتمتش.. بالصدفه إمبارح جه قدامي و شفته .. و إتفاجئت بالمستوى… في نقط صغيرة هحط إنتمائي الديني على جنب و أبص عليه كأي فيلم…
أولا : أول ما شدني في الفيلم إنه فيه أحمد حلاوة الممثل الكبير .. و ممثلين مسلمين كتير تاني من الصفوف التانية و التالته في السينما المصرية .. الفيلم نفسه بقى بطولة ممثل شاب إسمه فريد النقراشي .. يمكن الإسم مايكونش في بالك بس لو شفته هتعرفه ..
ثانيا : الفيلم بيحكي عن راهب إسمه فلتاؤس السرياني ..السرياني ده نسبه لإنه كان واحد من رهبان دير السريان و ده بيبان في الفيلم و بيفسر إهتمام الدير نفسه بإنتاج فيلم ديني عن واحد من رهبانه.
ثالثا : الموسيقى إحترافية و مؤثرة .. و الإضاءة مختلفة .. حتى الجرافيكس قوي جدا .. مستوى التمثيل رائع و قوي و فيه شغل عالي جدا باين فيه .. أنا إنبهرت ..مش عشان الفيلم .. عشان وصلت الكنيسة القبطية لأفلام بالمستوى ده .. تقريبا نص أفلام السينما المصرية مافيهاش الإهتمام بالتفاصيل دي
رابعا : السيناريو مترابط و المونتاج رائع .. و مفهوم حتى لحظات الفلاش باك إحترافيه و المزج بين المشاهد الأبيض و الإسود و الألوان معمولة بصورة مريحة للعين .. بالنسبة للقصة.. و الأحداث مش هقيمها لإن دي هعتبرها شأن ديني و طبيعي مش هيقبلها غير المسيحيين و مش بس المسيحيين لأ و طائفة الأرثوذكس تحديدا ..
خامسا : الإخراج كان لجوزيف نبيل .. إخراج رائع لمخرج أنا شايفه مثلا أقوى من نص مخرجين أفلام السبكي
سادسا : ظهور البابا شنودة في الفيلم كان مفاجأة مبهرة .. إزاي المكياج كان رائع كده .. و إزاي جابوا حد يقلد الصوت كده .. صحيح كان مكياج الوجه رائع بس فات عليهم مكياج الإيد و هي بتسلم الكاميرا بينت إن دي إيد شاب…
سابعا : الترانيم و الموسيقى .. صوت الترانيم بصوت قسيس هو الأشهر حاليا إسمه موسى هو موهوب و ربنا إداله صوت جميل .. زوّد قيمة الفيلم…
في المجمل الفيلم أقوى فيلم ديني مسيحي إتعمل … و ده مافرحنيش على أد ما حط أكتر من سؤال …
أولهم .. الكنيسة المصرية .. مطالبة تطلع برة عباية القديسين شوية. مع أفلام السير الدينية تعمل فيلم يشوفوه مسيحيين و مسلمين و ملحدين حتى .. طالما فيه إمكانيات مادية و بشرية .. بدل ما ننادي بالمواطنة و بس .. ندخل فيها بجد بأفكار كتير مجتمعية و إنسانية..
و آخرهم .. البلد .. الحكومة .. وزير الثقافة .. إنزلوا .. دول شباب مصري موهوب قبل ما يكون مسيحي موهوب .. بدل ما تقابل السبكي في مكتبك شوف الشباب دول .. خرجوهم بره إطار سير القديسين.. خلّوهم يخدموا مجتمع كامل . الكنايس المصرية فيها نشاط مسرح يفرح و هما نفسهم يخرجوا بره الإطار الديني.. صدقوني دول شباب زي الورد موهوب مستني فرصة .. ماتنسوهمش
ده تريلر الفيلم …
اقرأ أيضًا:
واقعة اغتصاب متخيلة على قناة الشرق
أسباب “إحتلال” نجوم ستار أكاديمي لتريند تويتر
علاء العطار: هكذا نحارب “داعش” في الأهرام العربي
فتوى إخوانية : انتحر قبل القبض عليك
”النهار اليوم” تبث أول فيديو للعملية الإرهابية بتونس
“عكاشة” يقاضي “السيسي” و”محلب”
أول تعليق لأحمد موسى على حبسه لعامين
خالد صلاح: لن أعتذر عن حوار “عز”
تامر أمين: “عطية” يدافع عن الشهداء في كباريه
نجلاء فتحي للقرموطي: وضعى المادي جيد ولا أحتاج سوى الدعاء
رقية السادات : امتلك فيديو يدين مبارك في اغتيال السادات
علي جمعة: مهاجمو البخاري يعطون شرعية لـ”داعش”
عمرو عمروسي يرد على سخرية أبو حفيظة ويهاجم MBC