أول تصريحات لـ "أبلة فاهيتا" بعد منع إعلان فودافون
محمد حسن
قرر المجلس الأعلى لتنظيم الإعلام، برئاسة الكاتب الصحفي مكرم محمد أحمد، الخميس الماضي، منع عرض أو إذاعة إعلان شركة فودافون مصر الجديد، والذي قدمته أبلة فاهيتا، على جميع الشاشات والإذاعات، نظرًا لما يحتويه من ألفاظ ومشاهد لا تليق بالذوق العام، وتجافي كل القيم، وتحض على السلوك السيئ وتخدش الحياء، فضلًا عن هبوط اللغة، وذلك وفقًا لما جاء في بيان المجلس.
سبق القرار حملة انتقادات واسعة للأبلة فاهيتا صاحبة البرنامج الشهير “من الدوبلكس” لكنها كعادتها التزمت الصمت كما فعلت تجاه كل الحملات المضادة لها طوال السنوات الخمس الأخيرة، غير أن “إعلام دوت أورج” نجح في الوصول لها هاتفيًا لمعرفة موقفها من قرار مكرم محمد أحمد بوقف الإعلان.
في البداية بنشكرك يا أبلة على إتاحة الفرصة للحوار، وكنا عاوزين نعرف في البداية تعليقك على قرار منع الإعلان؟
فرحت خالص، آه والله أصلهم أكرموني آخر كرم، والصراحة الإعلان بعد ما كانت الناس بتدوس skip Ad بقت تدخل مخصوص تدور عليه، وبعد ما كانوا متشتتين بين التلفزيون والراديو والنت بقوا مركزين يشوفوه في مكان واحد.
ما تفسيرك لزيادة الإقبال على مشاهدة الإعلان بعد المنع؟
عشان إحنا شعب نموت في اللي بعد المنع وشاهد فضيحة واتفرج قبل الحذف، شعب خلبوص بطبعه، أومال هم بيحبوني ليه.
نرشح لك: 800 ألف مشاهدة لإعلان “فاهيتا” بعد المنع
قبل قرار المنع انتشرت انتقادات للإعلان، يعني الاتهام لم يأت من المجلس الأعلى للإعلام فقط، ما ردك؟
فعلا وأنا على الويبة قريت كلام كتير بيفسر كلام الأغنية بمعاني “أبيحة أوي” وبصراحة استغربت لأني رغم كوني ست خبرة ومجربة مفهمتش الكلام ده وأنا بسجل الغنوة، كنت مركزة مع “النت الظالم” وعايزة أوقفه عند حده، وبقول للي فسروا الكلمات بمعاني تانية “إنما الإعلانات بالنيات”!!
أنا سامع صوت “كارو جنب حضرتك” يا ترى خلتيها تشوف الإعلان؟ وكان إيه تعليقها؟ ولو عكسنا الأدوار هل كنتي تقبلي إنها تعمل الإعلان؟
دا سؤال مُركب، وأنا الأسئلة المُركبة بتتعبني، بس هجاوبك عشان تعرف إني متعاونة خالص، كارو شافته طبعا، قبل أنا ما أشوف النسخة النهائية، شافته على النت، ما كلنا بقى عندنا نت، الإعلانات زي الأفكار محدش يقدر يمنعها.
إنتي هربتي من جزء من السؤال يا أبلة، لو كارو جالها عرض تشارك في إعلان زي ده هتوافقي؟
لو في سياق الدراما هوافق طبعا.
واضح إن الفلوس عندك أهم من كلام الناس؟
يا روحي عليه الأستاذ جورج، كمل وقال إيه، كلام الناس لا بيقدم ولا يأخر، الفلوس نعمل ندفع بيها “المقدم” ولو ست اتطلقت بتاخد “المؤخر” يبقى مين أهم؟!!
رأيك إيه في قرار فودافون منع الإعلانات على القنوات الفضائية؟
مبحبش أتكلم في السياسة.
نرشح لك: فودافون توقف جميع حملاتها الإعلانية
طيب هل ممكن تروحي تزوري الأستاذ مكرم محمد أحمد أو تستضيفيه في الدوبكلس لتوضيح وجهة نظرك؟
سكتت الأبلة لثواني قبل أن تقول.. والله فكرة.. ونعمل الحوار تحت عنوان “الأبلة والشعر الأبيض”.
ملاحظة: يمكن أن تعتبر الحوار “حقيقيًا” إذا كنت مقتنعًا أن فاهيتا ليست “دمية”.