دليل المواطن في عيد الاستعباط (الفلانتين سابقًا)

وائل سعد

1- تعالوا نفكر فيها كده.. أنا بحبك فأقوم جايبلك مجسم لدب اللي هو تقريبًا تاريخيًا أول عدو للجنس البشري، ومجسم الدب ده يكون أحمر اللي هو لون الدم والحروب والقتل.. أنتِ بقى تاخدي كل التكوينات الدموية ده بكل امتنان وسعادة وتتبسطي.. أومال لو أعلن عليك الحرب هيقدملك إيه؟

نرشح لك: 14 فيلما ننصح القنوات بعرضهم في عيد الحب

2- يمكن الورد الأحمر هو رمز عيد الحب.. تمام حتى أحلى، وبعد فترة بينشف وأرميه.. أحسن من الدبدوب اللي هيلبخني في عشتي وأنا كل يوم أشيله من حتة أحطه في حتة في الشقة، طاب أنت واخد بالك من كم المجازر اللي حصلت في النباتات في هذا اليوم، حضرتك بوكيهات الورد الي أنت شايفها في إيد كل الناس ده جثث نباتات ضحت بحياتها على كوكب يعاني من نقص الأكسجين وثقب الأوزون عمال يزداد اتساع علشان حضرتِك وحضرتَك تتبسطوا.. هو بيديكي عشر وردات مثلًا المفروض أصلًا يقولك (اتفضلي يا حببتي قتلت دول علشانك).

3- طبعًا لنكن متفقين إن اللي اخترع عيد الحب أو أي مناسبة شبيهة هما التجار بالتعاون مع الشريك الخفي المرأة.. أي حاجه زي كده بيكون التجار هما اللي وراها، أنت عارف كم الأرباح في هذه المناسبة!.. ده فيه مؤسسات بتستناها من السنة للسنة، أرقام خرافية ومصانع بتشتغل ويد عاملة وعالم.. كل المناسبات في حياتنا مناسبات صرف، هو ليه مفيش مناسبة كده واحده فيها قبض.. لازم اصرف؟

4- لحظة.. يعني إيه عيد حب أصلًا.. إيه الفكرة؟ يوم هنصحى فيه كلنا كده مع بعض نحب من أوله لآخره ونروح!.. بس خلاص خلصت كده!.. أكيد اللي في علاقة حب حقيقية مش منتظرين خالص يوم يتطلب منهم يحبوا بعض فيه، اللي بيحب بجد، الـ 365 يوم بيحب.. أصل الحب مش حاجه بتتنسي فمحتاج حد يفكرني أحبه.. أنت ليه مصمم تحرج شريحة كبيره من الناس بيجبروا يحتفلوا بعيد الحب غصب عنهم.. سواء رجال أو نساء.. أيه الفكرة في إحراجهم؟

5- ليه بتحاولوا تدوا فرصة أكبر للمتحرشين لممارسة نشاطهم، هم هايصين في كل المناسبات، مش مستنيين مننا كمان نديهم مناسبة كده بالمجان، ومناسبة سايحة ونايحة، مش مناسبة صعود مصر لكأس العالم، لا مناسبة دباديب وورد أحمر.. والعالم بيعيش جوه بطيخ كام يوم.

6- أيها البطل السنجلاوي.. إياك أن تعتقد أن كل تريقة الأخوة الذين سقطوا في المصيدة حقيقة.. دول بيحقدوا عليك حقد، أنت السنجل البطل حتى الآن.. لأنك كده كده هتقع هتقع.

7- هو دايمًا الحياة بيبقى فيها شقين إيجابي وسلبي.. اللي بيبقى بالنسبة لي إيجابي بيبقى أكيد سلبي لحد تاني.. يعني أنتِ مرتبطة!.. خلاص بقى .. أهدي .. مش لازم المحاولات المستميتة لاستفزاز أصحابك اللي مش مرتبطين.. ليه السواد ده؟ فيه غيرك لسه مرتبطوش، وكلنا فاهمين إن 99% من سعادتك مش بخروجك معاه، بل في نجاحك في استفزاز أكبر عدد ممكن بأعلى درجة ممكنة.

8- من الآخر كده عيد الحب ده معمول للإستعباط.. عملية تموية.. الرابح الوحيد فيه هوه اللي بيبدأ علاقة يومها.. بيديك إحساس بحالة استعباط جماعي، كل واحد ممكن يقرب مسافة كبيرة جدًا من طرف تاني من غير ما التاني يقفش عليه، أنت بتستعبطني وأنا مبسوطة وبستعبط نفسي.. ممكن توصل فيه لتفاهمات صعب توصلها في الظروف العادية، وده حاجة حلوه ومميزة جدًا.. مناسب إن لو حد مزعل حد يصالحه.

9- الأم في عيد الحب دينمو اليوم.. أولًا هو يوم مناسب تعرف ابنها أو بنتها مرتبطة ولا لأ.. ولو مرتبطين يبقى مسكنا أول الخيط ونبدأ نعرف تفاصيل أكتر، ما يمكن الموضوع خير، وفي الغالب الأم بتستفيد.. حتى لو كان كمية مضاعفة من الدلع.. الواد بيدلعها آخر دلع علشان أكيد هيستلف منها فلوس، والبنت بتدلعها علشان تقدر تنزل من غير الاعتراض على كمية Makeup التاريخية اللي حطاها وتفقد إحساسها بالزمن ساعة اللي هتتأخرها البنت.. دول لو مجابوش هدايا أو حاجه حلوه وهما راجعين.

10- الأخ والأخت في اليوم ده بيمسكوا على بعض أوراق ضغط، أكيد هيستفادوا منها ذات يوم.

11- من عدد الدباديب تعرفوا أنتم رقم كام.. ومن حجم الدبدوب تعرفوا أحجام كل علاقة سابقة.. مش فيزيا هي.

12- عزيزي السنجل.. أنت فأر في مدينة القطط، وسوف تسقط لا محالة فلا تحاول.. يكفيك شرف المراوغة لأطول فترة ممكنة.

13- happy valentine’s day

14- تحياتي.