دليل المواطن اللي بيحلم يسكن في شقة بعيد وهادية
وائل سعد
أولًا: يعني أيه شقة هادية؟
شقة هادية يعني مفيش في محيطها وعلى مداها الصوتي النظري مدرسة أو دار عبادة أو مصلحة حكومية (أو أي مكان فيه تجمعات)
إزاي بقى يتحول حلم الشقة الهادية .. لكابوس الشارع المزعج؟
- علشان هي منطقة بعيد وهادية فهي مكان مناسب جدًا لفتح حضانه بسيطة وجميلة تفتح في الدور اللي قصادك تمامًا لدرجة إنك تقدر تعد كام طفل جه انهارده .. ومين اللي غايب .. ولو ركزت هتسمع غايب ليه .. فيها يجي 60 طفل بيصوصوا من 7 الصبح حتى الرابعة عصرًا .. بتتخللها كل ساعة وساعة درس جماعي بالصوت العالي وأنت ونصيبك صاحي على نشيد مسائل حساب بتشرب القهوة على صوت قراءة قرآن ارشادات عامة من شاكلة اغسل أسناني قبل الأكل وبعده وأنت بتجهز للنزول .. وخلي بالك حضانة مش مدرسة .. يعني شغالة طول السنة وفي العطلات العدد بيزيد عن أيام الدراسة العادية .. تمام عادي عادي خالص .. مكان مناسب لوجود حضانة.
- ليت الأمر يتوقف على حضانة .. قصاد بقى الحضانة في وشك برده أقدم عمارة في المنطقة .. وده معناه أيه؟ في الغالب بتبقى أول عمارة في المنطقة فيها الجامع .. لكن مبيقلش خالص إن السماعات تكون بيني وبينها 10 متر .. ولأنها تعتبر زاوية مش جامع .. فده بيخلي إن ملهاش شيخ ثابت .. وهنا يكمن السؤال؟ مين اللي ماسك الجامع ده .. ولا حد .. طاب مين المسؤول عن الأذان والفتح وكده؟ أطفال الشارع .. أنا سمعت الأذان بجميع الأصوات والطرق اللي اتخلقت .. أنا سمعت تجارب في أداء الأذان والإقامة .. مرة والله كان فيه ولدين بيأذنوا مع بعض .. وفي نفس الوقت طفل تالت واقف قدام باب الجامع بيأذن معاهم وصوته أعلى من المايكات نفسها .. عادي خالص كده؟ مفيش حد بيعترض .. والله ولا حد اتكلم .. مع احترامي .. الناس بتطلع من كل صلاة بيسلموا على بعض بلهفة .. كأنهم بقالهم شهور مقابلوش بعض مش كام ساعة .. ويقفوا يرغوا أكثر من ساعة وكلهم رجالة كبار .. معنديش مشكلة بس مش بعد صلاة الفجر تحديدًا .. بعد كل صلاة بيبقى وراهم حاجه فبيخرجوا يمشوا على طول .. عند صلاة الفجر مورهمش أي حاجه.
- استنى .. لسه .. لسه .. في وشك مباشرةً شارع (هو مش شارع .. هو يعتبر ممر واسع بين شارعين يكفي لعبور سيارتين) في الوش بقى في آخر الممر ولأنه مكان هادي وبرعاية الحكومة وأنا عارف إنها كان قصدها خير .. تفتح فرن عيش بلدي مدعم .. انا لو قررت أعرف بينتج كام رغيف يوميًا هقعد يوم فاضي أعدهم .. وده طبعًا حول المنطقة لمكان جذب سياحي عظيم .. طوابير طول النهار قدامك وكلام ورغي وهيصة ونيلة منيله بنيلة .. وعيال صغيرة بتجري وقوافل نسائية كاملة بتعبر المنطقة بأقفاصها .. وتجمعات رغي .. ده فيه ناس يا شيخ بيتعرفوا على بعض وبيبدأوا علاقات بينهم .. حاسس إن مرة هعرف إن اتنين اتجوزوا أول لقاء ليهم كان قدام الفرن .. ولزوم المهيصة تكمل يحصل أيه؟
- بص بقى .. بائع خضار متجول يجد أن جوار الفرن مكان مناسب للانتهاء من بضاعته في أسرع وقت فيجي يقف ربع ساعة اللي بتتحول مع الأيام لساعة لحد ما توصل إنه بيجي مع فتح الفرن تمامًا .. ولأنه مكان أصبح عبثي بيزيد بضاعته فيجي بالعربة مليانه أقفاص وينزل الأقفاص على جني .. ومع الوقت يتحول لبقال متحرك يمشي وهوه سايب المكان اللي كان فيه يضرب يقلب .. ومع الوقت يجي بائع تاني جنبه .. ولأن النساء كسلوا يروحوا السوق وبيتبضعوا من جنب الفرن فمش هيقدروا يمشوا بكل هذه الأكياس ففيه سائق توك توك لئيم يكتشف خط سير جديد من قدام الفرنة وتبدأ مرحلة هجوم التكاتك العظيم .. وضاعت المنطقة.
- كفاية كده .. لا طبعًا .. أصحاب الخير طبعًا يجدوا أن هذا مكان يمكنهم من خلاله دخول الجنة .. فيقرروا في النص ما بين الجامع والفرنة وبنحازات الحضانة يعملوا تلاجة ماء سبيل .. الله عليا أنا .. ويتحول محيط الثلاجة لمسافة 100 متر لبركة مياة فتتجمع الكلاب وكل الحيوانات الضالة على مرمى البصر للشرب منها .. ومع الوقت بتتحول الماء لطينة والطينة لخراب .. وسلملي على الشقة الهادية
- كده مينفعش .. لازم التاتش الأخير يكتمل .. ده منطقة بعيدة وهادية أنت بتتكلم في أيه؟ الشقة اللي تحتيا بقدرة قادر تتحول لكوافير .. والعمارة الي جنبي يتفتح فيها سوبر ماركت صغير لسد حاجات أهل المنطقة .. ولأنها منطقة بعيد وهادية فأطفال الشوارع الضيقة المحيطة والمطرودين يكتشفوا أن ده أنسب منطقة للعب الكورة حتى العشاء .. وطوال الليل مخبأ مناسب لممارسة الرذيلة لأي حد مش لاقي مخبأ هادي وشبه ضلمة وشجر .. ولزوم القعدة لازم يكون فيه كام علبه بيرة تلاقيهم الصبح .. ومكان عبقري لتبادل تجارة التجزئة لتجار المخدرات.
- ممكن أكون أنا إلي مغناطيس إزعاج .. صدقني عمرك ما هتقتنع غير لما تجرب .. جرب ونتقابل سوا في مستشفى الأمراض العقلية.