دليل المواطن التايه في يوم المرأة العالمي
انا بس عندي شوية مشاكل صغيرين كده مع يوم المرأة العالمي.. حاجات كده زي:
- إني مش قادر استوعب ماهية فكرة يوم المرأة العالمي، يعني هوه كرنفال ولا عيد ولا رمز ولا يوم حماسي كده كله خطب ومسيرات.. هو إيه؟ يعني هي المرأة في اليوم ده تاخد إجازة وتستريح اليوم كله، ولا هي هتشتغل زيادة عشان توري العالم إنها قادرة على التحمل أكثر من الراجل فيشتغلوا 16 ساعة، يعني أنا مثلًا كده أكتب مقال عن أهم إنجازات المرأة في المجتمع وأوري الناس قد إيه هي قوية، ولا أكتب مقال عن مدى اضطهاد العالم للمرأة وسلبها حقها.. أفرح يعني ولا ازعل ولا أكتب بس عالفيس هاشتاج #يوم_المرأة_العالمي وجبرت كده؟!
نرشح لك – عمر طاهر يتنازل عن مقاله بـ”المصري اليوم”
- هو معلهش ليه صراع المساواة بين الرجل والمرأة صراع مرفهين مش كادحين، يعني أنا مشفتش مرأة بتحارب العالم حولين قضية إنها تبقى عاملة منجم أو تسوق شاحنة عملاقة ولا إنها تبقى بناء ولا حداد!!.. بس كتير قوي سمعنا عن حروب حولين قضايا إنها عايزة تبقى سفيرة وقاضية وطيارة ووزيرة.
- ليه العنصرية في إن كل حاجه عندنا حدثت كإنجاز بيتقال أول رجل تسلق قمة افيرست وأول امرأة تسلقت قمة افيرست، عنصري جدًا .. طاب ما الأصح أول مجتهد أو أول انسان صعد قمة افيرست .. ما دام قلنا أول رجل وأول امرأة وكلنا متفقين على كده.. تلاقي دايمًا صحفية كبيرة تعمل موضوع ضخم عن أول امرأة عملت شيء عظيم.. ده أصلًا اعتراف منها أن ده حاجه وده حاجه، وتيجي تطالب بالمساواة، منين إنتِ تعترفتي أنكم كيانين مختلفين، ومنين عايزة تتساوي معاه، يبقى كل واحد ليه حقوق ياخدها.
- طاب هو الراجل واخد كل حقوقة 100% ومقفلها خلاص.. المرأة يعني قامت بالواجب وأدته كل حقوقه وهو مش عايز يديها حقوقها. إنت مقتنع بالكلام ده.. أنتِ مصدقة نفسك بجد؟
- السؤال بقى للرجالة.. متردش.. بس فكرة كده وأسرح بخيالك، أنت شايف في نفسك الجبروت ده؟ ده أنت قاهر كل نساء كوكب الأرض.. واخد بالك، عدي كده بخيالك في الشغل والجامعة والبيت والشارع والمواصلات والطاوبير والمؤسسات العامة.. فاكر قد أيه كنت متطرف بإحساسك تجاهها وأنت حاسس إنها خدت دورك علشان امرأة، وكام مرة حَولوك وأنت بتسوق بتحاول تفهم هما داخلين يمين ولا شمال ولا المفروض يقفوا أصلًا.. فاكر قد أيه عطلوك، كمل إنت بقى سرحان وأنت بتبص لمديرتك، ولكل رجل في حياته مديرة طهقت عشته.
- والله أنا لا قصدي أجيب سيرة المرأة ولا حاجه، بالعكس أنا بعزها وبحترمها جدًا، متغاظ منها كتير، ده شعور 100% من رجال كوكب الأرض، والراجل اللي يقول غير كده يوريني نفسه.. فعادي يعني، مليش موقف متطرف تجاه المرأة خالص، بس ليا موقف متطرف تجاه الأفكار العجيبة الغريبة المريبة زي يوم المرأة كده.
- هو معناه أيه إن رجالة يكونوا هما نجوم العالم في حاجات مكتوبة في دستور الكوكب الأساسي إنها من دور المرأة زي أن اشهر طباخ يبقى راجل وأشهر مصمم أزياء حتى أشهر واحد بيعمل قلوب حمرا راجل.. ومش فاهم برده فكرة عيد الحب في يوم المرأة في عيد الأم.. عامل زي اللي بيجري ولبس في عمود نور، ورا بعض.. والله ما انت هربان.. هتكع بأي طريقة مفيش هيبقى فيه ده، ويا سلام لو فيه كلهم، عيش.
- في حياة كل راجل أربعة نساء أم وأخت وزوجة وبنت، وممكن يلحق حفيدة.. يعني أيه بقى يضطهد المرأة.. حد شاف مواطن غريب الأطوار في العالم بيكره أمه وأخته ومراته وبنته قبل كده؟ لو فيه مخلوق بهذه المواصفات ده نحطة في المتحف.
- هوه فيه كام نقطة كمان أنا مسحتهم.. بصراحة معنديش أي رغبة في الدخول في عداء مع المرأة، خلينا جنب الحيطة كده يا عم ومن خاف سلم.. وعلى رأي هاني شاكر “بحبكوا كلكوا”.
- ربنا يخليكم لينا.. ولا يحرمكم مننا.
- يا خراب بيتك يا صاحب المقالة.
- تحياتي.
- #صاحب_التفاصيل.