كيف كسر مخرج "وصفوا لي الصبر" جمود البرامج الثقافية
أحمد شعبان
بموسيقى عذبة تبدأ مقدمة برنامج “وصفوا لي الصبر”، ثم يفتتح الحلقات صوت الكاتب عمر طاهر، المشغول دومًا بالبحث عن أسرار “صنعة الكتابة”، والوصول إلى إجابات عن الأسئلة التي تشغل بال المبدعين، والمهمومين بالكتابة. يطرح صاحب “صنايعية مصر” أسئلته على عدد من أبرز الكتاب والمبدعين، يجول معهم في عوالم الكتابة والقراءة والنشر، ساعيًا إلى اكتشاف مفاتيح “الكتابة الحلوة”، ويبحث في العلاقة بين الكاتب والقارئ، محاولًا فك شفرة الأخير.
لم يختر القائمون على البرنامج، الذي يُعرض على قناة TeN، تصويره داخل استوديو، ولكن يتجول عمر طاهر في الشوارع ويحاور ضيوفه في أماكن عدة، فاتسمت حلقات البرنامج بواقعية شديدة وإيقاع سريع، وابتعدت عن الافتعال والجمود، وفي حوار له مع “إعلام دوت أورج“، يتحدث إسلام لطفي مخرج البرنامج، عن علاقته بـ عمر طاهر، وكواليس حلقات البرنامج، واختيار أماكن التصوير وغيرها.
استغرق تصوير حلقات البرنامج ما يقرب من 3 أسابيع، “صورنا موسم واحد من البرنامج، يُعرض فيه 13 حلقة، حاولنا إن البرنامج يطلع بشكل مختلف عن الشكل التقليدي المُتبع في البرامج الثقافية، وأن لا يكون الإيقاع بطيئًا، حتى لا يملّ المشاهد”، يقول “لطفي”.
لا ينسَ مخرج “وصفوا لي الصبر” الدرس الذي تعلمه من الإعلامية القديرة سناء منصور، حين دخل إلى مكتبها، وقت عمله بالتليفزيون المصري، في أواخر التسعينات، يعرض عليها فكرة تقديم برنامج عن الفن التشكيلي، “صورت حلقة وبعد ما شافتها، اتعصبت وقالتلي أنا القناة بتاعتي إيقاع، لازم الإيقاع يكون سريع عشان الجيل الجديد اللي بيتفرج عليك، البرنامج مينفعش يكون مجرد ناس بتتكلم وخلاص”، يتذكر “لطفي”.
نرشح لك: ريم بنا.. عندما تحارب المرض والاحتلال بالغناء
من وقتها أدرك “لطفي” أهمية أن تخرج برامجه بإيقاع سريع، لا يصيب المشاهد بالملل، حتى لو كان البرنامج حوار بين شخصين حول مسألة أو قضية ربما لا تشغل بال المشاهد العادي، وقد كان هذا هو التحدي الذي واجهه في تصوير “وصفوا لي الصبر”، يقول: “التحدي اللي كان قدامي في البرنامج ده إنه عبارة عن حوار، اتنين قاعدين بيتحاوروا وبيتكلموا مع بعض، فكان بالنسبالي أنا عايز اربط المشاهد دايمًا بالحياة والمكان اللي احنا قاعدين فيه، أيًا كان جنينة قهوة مكتبة، وأنقلَه روح المكان، وأخليه يندمج في الحوار، وأدخله في الحالة فيقدر يسمع الكلام اللي هو نقدر نقول عليه تقيل بالنسبة لناس كتير”.
أراد مخرج “وصفوا لي الصبر”، حسبما يقول، كسر جمود تصوير البرنامج داخل الاستوديو، “الشارع فيه حياة لكن الاستوديو مكان فيه جمود، قاعد حواليك جماديات”، كما حرص على إظهار تفاصيل أماكن التصوير، لينقل المشاهد إلى عالمه، يوضح: “أنا متعود على التصوير الخارجي، وببقى عارف إيه مفاتيح اللوكيشن اللي بروحه حتى لو أول مرة أصوّر فيه، وكنت عايز أكسر جمود إنك تحس إنك قاعد تتفرج على نفس البرنامج اللي في الاستديو ده بس بديكورات مختلفة، عشان كده هتلاقي تفاصيل صغيرة كنت حريص على ظهورها، وأربط المشاهد بالديكور بتاع المكان مش أصورله بس الاتنين اللي قاعدين يتحاوروا”.
وعن الحلقة الأولى من البرنامج، التي صُورت في “جنينة الأسماك”، يقول المخرج: “قصدت أظهر تفاصيل معينة تنقل روح المكان للمشاهد، الصوت اللي موجود في المكان، رغم صعوبة ذلك بالنسبة لمهندس الصوت، كنت حريص إنه يطلع، قلت للمصورين يصورولي الغربان وتفاصيل تانية في المكان، بحيث إني أخلي المشاهد يندمج ويتفاعل مع الحوار حتى لو حوار جانبي بين اتنين قاعدين”.
ليست هذه المرة الأولى التي يتعاون فيها المخرج إسلام لطفي، مع الكاتب عمر طاهر، صداقة طويلة تجمعهما، عملا سويًا في برنامج “مصريات” على قناة Otv، وفي السنوات الأخيرة جمعهما إعلان “اتجنن” لشركة كوكاكولا الذي ظهر فيه الكاتب عمر طاهر، “الشغل مع عمر مكسب كبير يعني، احنا نعرف بعض من أكتر من 15 سنة، نعرف بعض كويس ومذاكرين بعض على المستوى الشخصي، وأنا بعتبر نفسي بكسب إني أقدر أطلع حاجات لطيفة لأن هو على مستوى الكتابة رائع وبتشدّ لكتابته وبتعجبني، والاختلاف المرة دي عن اتجنن وشغلنا قبل كده، إن البرنامج مدته خمسين دقيقة لكن اتجنن مكنتش بتجيب 5 دقايق، وبالتالي طريقة الشغل بتختلف”، يحكي “لطفي” عن العلاقة بينهما.
طوال الوقت يتحدث “لطفي” و”طاهر” في جميع تفاصيل البرنامج، يبحثان دومًا عن “الإضافات الحلوة” المختلفة التي من الممكن أن يقدموها، “دايمًا بتكلم أنا وعمر ونشوف إزاي نعمل تاتشات حلوة ونتفق على كل التفاصيل”، يذكر “لطفي” ويضيف: ” كواليس البرنامج كانت مرهقة أحيانًا لكن هادية ولطيفة، وعمر كان من أتعب الضيوف اللي موجودين في الحلقة، هو شخص جميل وصحبي بس هو قلوق يحب يطمن على كل حاجة، ده بالنسبالي كان موتّر شوية، ولكن في الآخر البرنامج خرج بشكل كويس”.
يختتم مخرج “وصفوا لي الصبر” حديثه بالقول: “نوعية البرامج دي فورمات بنحطها، وخلاص الناس بتشتغل وأنا دوري إني أتابع من بعيد وأشوف لو فيه ملاحظات”، يكمل: “كل حلقة من البرنامج بتتكلم عن موضوع، وكل موضوع ليه ضيوفه، عمر وفريقه اختاروا الضيوف بعناية شديدة، اختاروا ناس تقدر تفيدنا في الموضوع اللي بتناقشه الحلقة”، ويؤكد على ايجابية وجود من يحرص ويهتم بإنتاج برنامج ثقافي.
تخرّج إسلام لطفي من كلية التجارة، جامعة عين شمس، عمل في التليفزيون المصري في أواخر التسعينات مع المخرج سامح عبد العزيز، وأخرج عدة برامج تليفزيونية، كما عمل في إخراج الأفلام الوثائقية والحملات الدعائية للشركات، وتصوير الحفلات التليفزيونية، فضلًا عن عمله في شبكة “أوربيت” ببرنامج “القاهرة اليوم” حتى عام 2012، ثم تلقى عرضًا للعمل في شبكة mbc ، كما عمل كمونتير لعدد من الأفلام منها: جيران السعد، صرخة نملة، يا أنا يا هو.
يُعرض برنامج “وصفوا لي الصبر” على قناة TeN، يوم الجمعة في الثامنة مساءً، من تقديم ورؤية فنية عمر طاهر، إخراج إسلام لطفي.