عبد الله غلوش يكتب: غلوشيات رمضانية (1)
– أوله رحمة.
– 40 علي الأقل “كلبش”، فتحي عبدالوهاب ونسرين أمين “ممنوع الاقتراب أو التصوير”، أم زين القناوي “نسر الصعيد”..
عابر طريق “لدينا أقوال أخرى”.. حصيلة قتليى وضحايا اليوم الأول من رمضان.
– خالد كمال “ليالي أوجيني”، هالة فاخر “كلبش”، مي عزالدين “رسايل” بين الحياة والموت، وبالمناسبة الفخراني أغمى عليه في آخر حلقة النهارده “بالحجم العائلي”.
– كلبش.. مزيكا وأغنية تتر الجزء التاني، حسستني إن أمير كرارة ظابط في 911 مش في الداخلية.
– كلبش.. أفهم إني أكتب أسماء الشخصيات اللي بيجسدها كل أبطال المسلسل ع التتر لكن أكتب شخصيات وشخصيات تانية لأ، جديدة دي.
– كلبش.. أفهم إني أحط صور كل أبطال المسلسل ع التتر، لكن محطش غير صورة روجينا وهيثم زكي فقط، جديدة دي.
– كلبش.. أفهم إني لما أحط صورة لروجينا ع التتر أحطها من المسلسل، لكن أحطلها من فوتوسيشن، جديدة دي.
– كلبش.. مشهد سقوط الطيارة الهليكوبتر من أفضل مشاهد الحلقات الأولى بجميع المسلسلات.
– كلبش.. للأسف عماد أديب استقال من قناة الحياة قبل ما يعمل حوار مع الولد بتاع داعش اللي سليم الأنصاري قبض عليه في الكمين إمبارح.
– ابن يحيى الفخراني شغال في الخارجيه “بالحجم العائلي” وبنت يسرا “لدينا أقوال أخرى” شغالة في الخارجية، ولسه بنسأل الواسطة اختفت ولا لسه؟
– اختفاء.. هل الأستاذ المخرج وأخوه الأستاذ المؤلف ميعرفوش إن في حاجه اسمها موبايل داتا ممكن أدخل بيها ع الإنترنت من الموبايل، بدل ما أضيع 5 دقايق من الحلقة اأجيب فيهم نيللي وهي بتجري في شوارع موسكو عشان تفتح النت من اللاب توب؟
– ضد مجهول.. لما تشوف أول مشهد في المسلسل فتكتشف إن غادة عبدالرازق كانت متجوزه أحمد سعيد عبدالغني، فتقرر إنك متتفرجش على باقي الحلقة.
– رسايل وأيوب وطايع والوصية.. بداية تدعو للتفاؤل.
– رسايل.. مي عزالدين أرفع وسط في مصر.
– مليكة.. طالما عمرو دياب مبسوط، أنا مبسوط.
– لعنة كارما.. المسلسل المصري الوحيد اللي بيتعرض علي قنوات bein القطرية.
– لعنة كارما.. لما تحب بطل لمجرد أنه أمور وشعره أبيض .. كان يبقى الكابتن سيف زاهر هو الأحق ببطولة المسلسل.
– لعنة كارما.. تتر النهاية بصوت محمد عدويه أفضل من تتر البدايه بصوت آدم.
– لأول مرة من 18 سنة، رمضان بدون عمرو أديب.
– عزمي وأشجان.. نسخة 2018 من فيلم عصابة حمادة وتوتو.
– ٣ لايف ع الفيسبوك في الحلقة الأولى.. هدى المفتي “لدي أقوال أخرى” يحيى الفخراني “بالحجم العائلي” علي ربيع “سك على اخواتك”.
– فوق السحاب .. أول مشهد في المسلسل بيضم أكبر نسبة أقلام وبونيات وشلاليت اتضربت في الهوا، في تاريخ الدراما المصرية.
– فوق السحاب.. ليه محمد محمود عبد العزيز بيمثل؟
– فوق السحاب.. لحد امتى هنستخدم الأقزام مادة للسخرية.
– فوق السحاب.. ميرنا نور الدين “سمكة” أفضل ما في المسلسل.
– فوق السحاب.. جملة إلي اللقاء في الحلقة القادمة المكتوبة على تتر النهاية، فكرتني بمسلسل كابتن ماجد.
– سك على اخواتك.. من المفاجأة الحلوة بالنسبة لي.
– الرحلة.. الأفضل بين مسلسلات الساعة 8.
– رحيم.. مشهد الحادثة اتعمل هايل.
– رحيم.. مشهد هروب محمد رياض من البوليس ضحكني أكتر من كل المسلسلات الكوميدية اللي بتتعرض.
– رحيم.. نفس المشهد بجانب لون بنطلون محمد رياض جدير إنه يقفلك من دراما رمضان كلها والله.
– رحيم.. الواحد لما دقنه تطول يومين مبيعرفش يحلقها بماكينة ناسيت 2، لكن سبحان الله ياسر جلال حلق بيها دقن أبوه اللي كان بقاله ٧ سنين محلقهاش.
– رحيم.. ما شاء الله حسن حسني اتجنن بعد ما ابنه اتسجن ولما استحمى بميه سخنه عقله رجعله مرة تانية.
– رحيم.. لما تتفرج على إيهاب فهمي في المسلسل، هتتأكد إن أمن الدولة وقت الثورة كان لازم يُخترق.
– ممنوع الاقتراب والتصوير.. مفتكرش في حد عجبته الحلقة الأولى من المسلسل بما فيهم زينة ذات نفسها.
– أبوعمر المصري.. أفضل حلقة أولى بفارق بسيط عن كلبش ولدينا أقوال أخرى ونسر الصعيد.
– أبوعمر المصري.. Welcome back منذر رياحنه.
– أبوعمر المصري.. مشاكل كبيرة في الصوت وتحديدا في مشهد القارب كان واضح جدا إنه متركب.
– باسل خياط في مسلسل الرحلة عبقري وفي مسلسل تانجو ممثل عادي جدا.
– عوالم خفية.. المسلسل الوحيد بـ أفان تتر.
– عوالم خفية.. خليط بين عفاريت عدلي علام وأستاذ ورئيس قسم، ولكنه أفضل من المسلسلين.
– عوالم خفية.. عادل إمام كان النهاردة عيد ميلاده في المسلسل، وبالصدفة النهاردة برضه عيد ميلاده في الحقيقة.
– بالحجم العائلي، شوية يديك على جدو حبيبي وشوية يكرف على إشاعة حب، وشوية يرمي على فيلم زهايمر، لكن الأكيد إنه مالوش أي علاقة بـ حمادة عزو.
– ليالي أوجيني.. حاجة في منتهى الرقي.
– ليالي أوجيني.. كان فين عقل أمينة خليل، لما فكرت ترتبط وتتجوز بواحد زي خالد كمال.
– لدينا أقوال أخرى.. فساتين هاني البحيري بطلة الحلقة الأولى من المسلسل.
– لدينا أقوال أخرى.. حازم إيهاب.. زوج بنت يسرا للسنة التانية ع التوالي.
– ماونتن فيو.. آخر حاجة كنت أتخيلها إنهم لما يجيبوا دنيا سمير غانم مكان أحمد عز، الإعلان هايبقى دمه أتقل.
– نسر الصعيد.. بداية مبشرة تفتقد لتفاصيل المخرج محمد سامي.
– نسر الصعيد.. أغنية شيبه أفضل بمراحل من أغنية إبراهيم الحكمي.
– نسر الصعيد.. أول حاجة في تتر البداية شكر وزارة الدفاع.. وأول حاجه في تتر النهاية شكر وزارة الداخلية.
– نسر الصعيد.. مشهد تحول محمد رمضان من مرحلة الطفولة للشباب، يليق بكليبات محمود العسيلي.
– ربع رومي.. أضعف بداية بين المسلسلات الكوميدية السنة دي.
– أمر واقع.. إيقاع واقع.
– أمر واقع.. الحسنة الوحيدة للمسلسل إنها عرفتنا، إن ظابط الشرطة الناجح في الدراما مش شرط يكون بشنب.
– أفضل 5 تترات: عبده سليم “أيوب” – أنغام “ممنوع الاقتراب أو التصوير” – حسين الجسمي “أبوعمر المصري” – إليسا “ضد مجهول” – نسمة محجوب “ليالي أوجيني”.
– يا محششين يكفيكم شر الفايقين.. إبراهيم نصر “فوق السحاب”.
– الستات بقت فرافير.. أول ما الدكتور يقولها إنتي حامل تصلي ع الكرسي ومش طايقه نفسها و زن وقرف طول النهار.. أمير كرارة كلبش ٢.
– أصعب حاجة في الدنيا، لما الكبير يدفن الصغير.. يحيى الفخراني “بالحجم العائلي”.
– ربنا يرحمك يا أمي ويرحم أمهاتنا جميعا ويحفظ أمهاتكم يا رب.