عبد الله غلوش يكتب: غلوشيات رمضانية (2)
– من أول حلقتين في مسلسلات رمضان يظهر بوضوح مدى حاجة أبطالها لزيت الكافور.
– الفرق بين الاسطورة ونسر الصعيد .. إن النيابه عمرك ما هتدخلها من غير واسطة ، لكن اكاديمية الشرطة ممكن.
– الاسوأ من إيهاب فهمي “رحيم” وإيهاب فهمي “قانون عمر” ، إيهاب فهمي “فوق السحاب”.
– محدش يعرف عملوا الكاستينج بتاع مسلسل رحيم في أي gym؟
– أيوب .. أيتن عامر بتلاقي نفسها في دور البنت الواطية والبيئة.
– أيوب .. لما مصطفى شعبان بيعرف يمثل حلو كده، كان ايه لأزمة اللي بيعمله السنين اللي فاتت ده.
– أغنية طب ينفع كده؟ اشتغلت في 3 مسلسلات في يوم واحد “أيوب” و”سك علي إخواتك” و”لدينا أقوال أخرى”.
– كلبش .. مش فارق معايا الميكب اللي ظهرت بيه هالة فاخر في المستشفى بعد نجاتها من العملية الإرهابية ، أد ما فارق معايا هي حطته ازاي والمفروض أنه جالها شلل.
– هو ليه في توجه عام في الدراما انهم يرسخوا عندنا فكرة ان المصري بيرجع من الخليج بخيل وبيتمتع بقدر لا بأس به من الغلاسة والرخامة اللامتناهيه.
– ليالي أوجيني .. أمينة خليل ترفع شعار، هل من منافس؟
– خدود وكرش طايع .. اصدق دليل على أن كنده علوش بتطبخ كويس.
– طايع .. أحمد داش .. بيكبر في السن والموهبة كمان.
– طايع .. حد يقول لعمرو سلامة .. قربنا نتعمى من كتر الضلمه والله.
– أرض النفاق .. هنيدي لما بيكون زهقان، بيحلم ان سلوى محمد علي بتيجي ترقصله.
– تجربة “لأعلى سعر” السنة اللي فاتت ، اثبتت ان نيللي كريم مبقتش قادرة تشيل مسلسل لوحدها، ولا زينة عارفة تشيل مسلسل لوحدها .
– عادل إمام لقى كتاب عوالم خفية في أول الحلقة ونيللي كريم لقت كتاب إختفاء في أخر الحلقة.
– قبل ما ننشغل بفراخ عمرو خالد، لازم نتوقف عند بوكسر مدحت شلبي.
– بحبك يا بهية بحبك يا أمي .. أفضل إعلان في رمضان حتي الآن.
– حديد الجارحي .. أفضل فكرة إعلان في رمضان حتي الآن.
– بنك مصر بصوت محمود العسيلي ومحمد عدوية .. أفضل أغنية إعلان في رمضان حتي الآن.
– عوالم خفية .. هو مش المفروض ان عادل إمام ممثل كوميدي والمفروض ان مسلسلاته بتضحك وكده؟
– لدينا أقوال أخرى .. للسنة التانية ع التوالي .. سلمي أبوضيف بتحب واحد بيغير عليها ومعترض علي ستايلها في اللبس.
– بالحجم العائلي .. أقوى حلقة تانية بين مسلسلات رمضان.
– بالحجم العائلي .. اللي بيحب ميرفت أمين يقولها كفاية.
– تحذير : كنافة عروس بيروت من نولا .. الصورة أحلى من الطعم بكتير.
– مليكة .. دينا الشربيني ستايلست دينا الشربيني وعمرو دياب كمان لو حضرتك متعرفش.
– الموضة في مسلسلات السنه دي ، ان الأمهات بتبقى في الشغل والأبهات هما اللي بيجيبوا العيال من المدرسة.
– اختفاء .. عندي امل ان ظهور محمد ممدوح ، انه ممكن ينتشل المسلسل من الوضع الصعب اللي هو فيه ده.
– اختفاء .. نيللي كريم أكتر بنات جيلها اللي ظهر على ملامحها علامات الزمن.
– غادة عبدالرازق مبتحبش حد يبص في موبايله وهي بتتكلم معاه .. ملخص الحلقة التانيه من ضد مجهول.
– ضد مجهول .. غادة عبدالرازق زعقت لبنتها عشان لابسه بيجامه قصيرة وهي قاعدة في البيت ، وباستها وقالت لها ايه الحلاوة دي وهي بتوصلها لعيد ميلاد أخوها رغم انها كانت لابسه فستان اقصر من البيجامة.
– كما تدين تدان .. دياب رفض يسلف مصطفى شعبان فلوس “أيوب” ، ولما دياب اتزنق وحب يستلف من واحد صاحبه رفض يسلفه ” ضد مجهول”.
– رسايل .. سؤال للأستاذ خالد سليم ، هو لسه في حد بيكتب اسم مراته ع الموبايل ” سويت هارت”.
– أحلام الجريتلي “أيوب” تزاحم صفوة “ممنوع الأقتراب أو التصوير” على لقب أفضل اوفر act في الأسبوع الأول من رمضان.
– نجلاء بدر كانت بتشتغل خياطة في رمضان اللي فات “رمضان كريم”، والسنة دي ربنا فتحها عليها وبقت فاشون ديزاينر “لدينا أقوال أخرى”.
– متأجلش خير ومستعجلش شر .. اللي بيطلع لله بيجي بداله كتير .. محمد رمضان “نسر الصعيد”.
– في حد يسيب الأداب ويجي الأمن العام .. دي حتى ريحتها حلوة.. عبدالرحيم حسن “عوالم خفية”.
– حتى بتوع الدعارة بقوا عاملين فيها فلاسفة .. ” ممنوع الأقتراب أو التصوير”.
– نتجوز ليه، ده الجواز أكتر حاجة بتقتل الحب؟ .. أحمد حاتم ” لدينا أقوال أخرى”
– اللي يجي له فرصة يسافر ويسيب البلد اليومين دول وميسافرش يبقى غلطان .. سناء شافع ” اختفاء”.
– لو نعرف ازاي النهاية قريبة مكوناش اتلهينا في البداية .. مي عزالدين “رسايل”.
– قيمتك من قيمة عدوك .. هيثم زكي “كلبش”.
– ربنا يرحمك يا أمي ويرحم امهاتنا جميعا ويحفظ امهاتكم يارب.