عبد الله غلوش يكتب: غلوشيات رمضانية (3)
– في نفس اليوم اللي محمد رمضان قال لوفاء عامر اقفلي النور وتعالي “نسر الصعيد” ، دياب قال لأيتن عامر اقفلي الباب وتعالي “أيوب”.
– إعلان اتصالات.. حلو لكن مش أحلى من إعلان فودافون.
– إعلان اتصالات.. مين اللي اقترح على سميرة سعيد قصة الشعر اللطيفة دي؟
– إعلان اتصالات.. كان ناقصه لاعيب كورة.
– إعلان اتصالات.. أفضل ما في الإعلان اعتراف أحمد فهمي أنه بينحت.
– إعلان اتصالات.. “في نسخة واحدة مني كلهم بيقلدوها”.. أكيد محمد رمضان يقصد العيال بتوع musically app.
– إعلان اتصالات.. يا عيني علي الحجار من كتر ما هو مش مصدق ان اتصالات كلمته، عمال يضحك طول الإعلان.
– إعلان اتصالات.. لسه بوز لسه في الدموع كنوز.. ربنا يطمن قلبك يا غالية.
– من مسلمات الدراما الرمضانية السنة دي :
1- لو الممثل اللي البوليس بيقبض عليه مش نجم بيتضرب على قفاه، ولو كان نجم بيتمسك من قميصه فقط.
2- لو أم البطل نجمة يبقى هاتعيش لآخر المسلسل حتى لو اتعرضت لهجوم إرهابي، ولو أمه مش نجمة يبقى هاتموت بعد تاني أو تالت حلقه بالكتير.
3- النجمات ممكن يتخلوا عن ظهورهم بالمكياج بس مستحيل يتخلوا عن رموشهم.
– محمد سليمان عبد المالك “رسايل”.. محمد رجاء “بالحجم العائلي”.. محمد سيد بشير “أيوب”.. نور شيشكلي “الرحلة”.. تسلم إيدكم.
– أيوب.. كلاكيت تاني مرة: أيتن عامر تعيد اكتشاف نفسها.
– أيوب.. “الممثل” محمد دياب كل سنة أفضل من اللي قبلها.
– طريق.. نادين نجيم لو وصلت مصر هتقعد فنانات كتير في البيت.
– طريق.. حاجة تحزن لما لبنان وسوريا تحول روايات نجيب محفوظ لمسلسلات، وإحنا بنمصر مسلسلات أجنبية.
– لدينا أقوال أخرى.. نجلاء بدر اشترت لجدتها كيس شيبسي صغير بالجبنه من السوبر ماركت، ولما جت تطلعه من الكيس في المشهد اللي بعده تحول بقدرة قادر لكيس شيبسي جامبو وبالجبنه المتبله.
– قليلين اللي يعملوا ٤ أدوار في ٤ مسلسلات مختلفة في رمضان ومينجحش منهم ولا واحد.. إيهاب فهمي من الناس دي.
– مكنتش أتخيل إني ممكن أشوف حد أثقل من “الخليل كوميدي”، لغاية ما شفت محمد ثروت في إعلان تورنيدو.
– الرحلة.. الحلقة الأولى 32 دقيقة.. التانية 27 دقيقة.. التالته 24 دقيقة.
– رحيم.. طارق عبد العزيز واحد من أصحاب نظرية مش لازم يبقى دورك كبير عشان تعلم مع الناس.
– رحيم.. المسلسل خلاني أتمنى أحضر خناقة من اللي الرجاله فيها أول ما بياخدوا بونيه أو شلوت بيغمى عليهم على طول.
– الفرق بين شيرين رضا “لا تطفئ الشمس” وشيرين رضا “لدينا أقوال أخرى” اسم الشخصية فقط.
– أبو عمر المصري.. ايقاع بطيء يصل لدرجة الملل.
– أبو عمر المصري.. فتحي عبدالوهاب بيمثل من level تاني.
– أبو عمر المصري.. مشهد مرافعة أحمد عز في المحكمة أفضل مشاهد المسلسل حتى الآن.
– رسايل.. في صعود مستمر.
– رسايل.. أفضل تشكيلة بيجامات يظهر بيها خالد سليم في كل المسلسلات اللي عملها طول حياته.
– طايع.. لو كان بإيدي كنت رتبت الأسماء ع التتر كده ( صبا مبارك، أحمد داش ، عمرو عبد الجليل ، عمرو يوسف).
– أرض النفاق.. مسلسل حلو بس ما يجبركش تتابعه على حساب أعمال تانية.
– أرض النفاق.. متخيل حالة شويكار وهي بتتفرج على أداء هنا شيحة في المسلسل.
– غادة عبدالرازق رجعت عربون كافيه جديد كانت المفروض تعمل ديكوراته في أركان، واكتفت بديكورات ٦ فيلات في هاسيندا.. ملخص حلقة اليوم من ضد مجهول.
– عوالم خفية.. تفتكر في كام واحد في مصر خلقه واسع لدرجة إنه يقعد يتفرج على مسلسل 30 يوم عشان يعرف في الآخر مين اللي قتل رانيا فريد شوقي؟
– بمنتهى الأمانة باروكة هالة فاخر في “كلبش” أفضل بكتير من باروكتها في إعلان كومباوند “نكست بوينت”.
– بالحجم العائلي.. يحيى الفخراني ومحمد فوزي .. أقوي دويتو في دراما 2018 .
– أمر واقع.. محمد عادل.. مشروع نجم أنهكه النحت.
– أمر واقع.. مسلسل مريح للأعصاب ، على اعتبار إن المزيكا فيه أكتر من الكلام.
– نسر الصعيد.. أفضل حلقة 3 بين كل مسلسلات رمضان.
– نسر الصعيد.. محمد رمضان عنده شوية برد وسخونية، إيه اللي يستدعي إن مرات أبوه تعيط؟
– نسر الصعيد.. مشهد أغنية زين الرجال بصوتها بتحريك شفايف اللي بيغنيها بتصويرها، جريمة درامية متكالمة الأركان.
– كلبش.. بنفس الطريقة، سليم الانصاري شال أخو مراته أول حلقة.. وشال جثة مراته تاني حلقة.. وشال أمه تالت حلقة.
– كلبش .. هيثم زكي الاكثر تطورا بين ابناء الفنانين في دراما هذا العام.
– كلبش.. سليمان عيد شال الصدأ من على ماكينة إفيهاته أخيرا.
– قانون عمر.. كنت ناوي أكتب كلام وحش، بس قلت حمادة هلال مش ناقص، كفايه اللي بيحصله في المسلسل.
– ربع رومي.. أن تأتي متأخرا أفضل من ألا تأتي أبدا.
– ليالي أوجيني.. سواء على صعيد التمثيل أو تقديم البرامج، مراد مكرم يستحق مكان أفضل من اللي هو فيه بكتير..
– فوق السحاب.. لما تصور واحد بينط من فوق سور حديد بطريقة السلو موشن، أومال لو بينط من فوق عماره هاتصوره إزاي؟
– تلاقي واحد غلبان حنجرته تتاقل بالدهب لكن مجتلوش فرصه يتشهر، وواحد تاني متقلعيهوش من رجليكي ورغم كده مكسر الدنيا.. الفنون حظوظ.. أشرف رياض “اختفاء”.
– الناس كلها حيوانات بتصارع بعض على مين فينا اللي يكمل ويعيش.. فتحي عبدالوهاب “أبوعمر المصري”.
– اللي تبيع أهلها مفيش في الدنيا أرخص منها.. مصطفى شعبان “أيوب”.
– السهل دايما ماسخ، مفيش أحلى من الصعب.. سيد رجب “نسر الصعيد”.
– ربنا يرحمك يا أمي ويرحم أمهاتنا جميعا ويحفظ أمهاتكم يا رب.