عبد الله غلوش يكتب: غلوشيات رمضانية (5)
– سافرت طنطا كام ساعة، اكتشفت إن ٩٠٪ من مسلسلات رمضان بدون مبالغة محدش يعرف هي بتتذاع فين أو يعرف إنها بتتعرض أصلا.
– باختصار عزيزي الزميل الصحفي أو الإعلامي أو المنتمي للوسط الفني بأي شكل من الأشكال، خليك واثق إن التايم لاين بتاعك مالوش أي قيمة ولا يعتد به كمقياس لنجاح أو فشل أي عمل .. انزل اسمع الناس واحكم بنفسك..
– في يوم واحد، درة “نسر الصعيد” عاكسها اتنين شباب قام محمد رمضان ضاربهم، أمينة خليل “ليالي أوجيني” عاكسها اتنين شباب قام ظافر عابدين طلب منهم يروحوا معاه القسم بكل هدوء.
– طايع .. عمرو عبد الجليل أقوى من عمرو يوسف وعمرو سلامة وعمرو خالد كمان.
– هل في قانون ينص على أن أعضاء مجلس نقابة الممثلين، لازم يكون ليهم ممثل في مسلسلات السنة دي؟
– أمر واقع .. كل ما تقودني الصدفة لمشاهدة المسلسل، ألاقي كريم فهمي بيسوق عربيته والمشهد اللي بعده نجلاء بدر بتعيط .. مش فاهم ليه الحقيقة.
– إعلان 57357 .. كل حاجه حلوة في الإعلان، وإن كنت أرى إنه كان من الأفضل تامر حسني يعمل أغنية جديدة بدل ما يعيد توزيع واحدة من أغانيه القديمة.
– في نفس اليوم اللي أحمد حاتم قتل فيه صاحبة “رسايل”، أجر واحد عشان يقتل عشيقته ” لدينا أقوال أخري”.
– عزمي وأشجان كمال أبو رية وفيفي عبده، دمهم أخف من حسن الرداد وإيمي سميرغانم.
– نسر الصعيد.. لأول مرة في تاريخه الفني، محمد رمضان عيط من عينيه الأتنين النهارده.
– نسر الصعيد .. لكل اللي اتهمني بالمبالغه في وصف الحالة التي اضفتها على المسلسل منذ ظهورها .. ممكن حضرتك تتفرج على ريأكشن درة لما محمد رمضان قالها بحبك وعايز اتجوزك ، وانا راضي بحكمك بعدها.
– مسلسل ريد باند .. دراما انسانية راقية كانت تحتاج مزيداً من الدعاية.
– هو ليه كهربا وافق ع الظهور كـ كومبارس ف إعلان فودافون؟
– لدينا أقوال أخرى .. بعد أقل من شهرين من فسخ تعاقدها مع on live ، نهاوند سري فسخت عقدها النهاردة مع القناة اللي بتمتلكها شيرين رضا في المسلسل.
– الرحلة .. أفضل أداء لـ مي سليم منذ احترافها للتمثيل.
– الرحلة .. باسل خياط قد يكون أحد أسباب زيادة العنوسة في مصر بعد عرض المسلسل.
– مين قال إن المسلسل الكوميدي، لازم التتر بتاعه يكون كارتون؟
– بالحجم العائلي .. خايف نكون بدأنا مرحلة المط والحشو بدري.
– فوق السحاب .. حلو إنك تستعين بقول مأثور أو بيت شعر في بداية كل حلقة، بس الأحلى انك تختار أقوال حلوة لها علاقة بالأحداث مش أي حاجه تيجي في وشك وخلاص، والأحلى أكتر كمان لما تسيبها شوية على الشاشة عشان الناس تلحق تقرأها .. الموضوع مش إفيه وحركة جديدة وخلاص.
– فوق السحاب .. طب أنا راضي ذمتكم، في بنت عندها ١٦ سنة وعايشة في أوروبا كمان، تقف تلعب الكلب الحيران مع مامتها وصاحبتها في الشارع؟
– رحيم .. يظل أحمد السقا هو صاحب أفضل روسيه بين أكشنجية الجيل الحالي.
– ضد مجهول .. مشهد غُسل جثة بنت غادة عبد الرازق الأفضل بين كل المسلسلات اليوم.
– ضد مجهول .. الظهور الأول لحنان مطاوع.
– عوالم خفية .. محمود حجازي من القليلين اللي اضافوا للمسلسل أكتر ما المسلسل أضاف لهم.
– ممنوع الإقتراب أو التصوير .. زينة خدت واحد من أصدق الأقلام اللي اتضربت في تاريخ الدراما المصرية.
– لعنة كارما، تقريبا في مشهد عن الأيس كريم بين هيفاء وهبي وفارس رحومه اتعرض 9 مرات في الخمس حلقات اللي فاتت.
– ليالي أوجيني .. كارمن بصيبص أشيك نجمات الدراما هذا العام.
– آدم اسمه اتحذف من تتر “لعنة كارما”، وعزالدين شكري فشير اسمه اتحذف من تتر “أبوعمر المصري”.
– اختفاء.. Welcome back.
– اختفاء .. خير اللهم اجعله خير، فات 5 أيام من رمضان ولسه محدش كتب ان محمد ممدوح بيعرق أكتر ما بيمثل.
– أيوب .. نجاح المسلسل هو أصدق دليل على إننا شعب كئيب بطبعه.
– أيوب .. محمد لطفي كان بيتفرج على ماتش .. الصورة من ماتش الأهلي والمصري في السوبر والصوت من ماتش الأهلي والزمالك الأخير.
– أيوب .. لو في حد يستحق شابوه يوسف الشريف السنة دي، فمن المؤكد أن سلوى عثمان واحدة منهم.
– سلسال الدم .. ممكن مكنش بتابع المسلسل على اعتبار اني متفرجتش علي اجزاءه السابقة، لكن بمنتهى الأمانة اللي يتفرج على أي حلقة من المسلسل ، هايعرف إن عبلة كامل الأفضل بين كل نجمات جيلها من الممثلات في شهر رمضان الحالي، وبفارق كبير عن أقرب منافسيها.
– البلد دي حتى المجرمين والوطنيين فيها بيحبوا بلدهم.. أمير كرارة “كلبش”.
– مش كل اللي بيختاره القلب بيطلع صح .. وفاء عامر “نسر الصعيد”.
– الست عمرها ما بتزهق من الكلام الحلو .. نادين “ليالي أوجيني”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.