عبد الله غلوش يكتب: غلوشيات رمضانية (6)
– في أقل من 48 ساعة ، يحيى الفخراني عمل مسقعه للدكتور عشان ساعده انه يخدع ميرفت أمين وأولاده .. باسل خياط عمل مسقعه لريهام عبدالغفور عشان يصالحها .. أمينة خليل عملت مسقعه لأسماء أبو اليزيد عشان مكنش معاها فلوس تجيب حاجه أغلى من البتنجان.
– أيوب .. بوفاة محمد علي رزق في حلقة اليوم ، فقد المسلسل واحد من أهم وأقوى أسلحته.
– أيوب .. تقريبا ده المسلسل رقم 23 اللي يعمل فيه محمد لطفي نفس الدور.
– رحيم .. ليل داخلي : إيهاب فهمي جلس يفكر ويفكر في ايجاد حل لعدد من قضايا جهاز أمن الدولة ، قبل ان يخرج مشط صغير من جيب بدلته، سرح بيه شنبه ثم وضعه في جيبه مرة أخرى وجلس يفكر ويفكر مرة أخرى.
– عشان محدش يظلم يوم التلات، بكره درجة الحرارة 45 وبعده 46.
– نسر الصعيد .. أضعف حلقات المسلسل حتي الآن.
– نسر الصعيد .. أغنية احنا الصعايدة لأحمد شيبة .. الحسنة الوحيدة في حلقة النهارده.
– نسر الصعيد .. الحلقة عبارة عن عدد واحد مشهد نسكن في المعادي ولا مصر الجديدة، وعدد 2 مشهد topless وعدد 2 مشهد ميديم كلوز يبرزان قوة عضلات ضهر بطل المسلسل.
– نسر الصعيد .. الفرق بين العسكري المصري والياباني ، ان الياباني قصير بس يحير .. المفروض إن ده إفيه قايله محمد رمضان والمفروض إننا نضحك وكده.
– نسر الصعيد .. انا متجوز سقراط .. المفروض إن ده إفيه قايله محمد رمضان والمفروض إننا نضحك وكده.
– نسر الصعيد .. هي الخمرة على الهدوم بتبطل الوضوء .. المفروض إن ده إفيه قايله محمد رمضان والمفروض إننا نضحك وكده.
– نسر الصعيد .. الفراعنه كانوا بياكلوا كوارع .. المفروض إن ده إفيه قايله محمد رمضان والمفروض إننا نضحك وكده.
– نسر الصعيد .. أنا لاعبتك الماتش اللي فات بـ غانا ، يبقى هلاعبك الماتش الجاي بالكاميرون .. المفروض إن ده إفيه قايله محمد رمضان والمفروض إننا نضحك وكده.
– نسر الصعيد .. مشهد درة وهي عامله انها غيرانه على محمد رمضان من خطيبة اخوها .. ممنوع لأصحاب الضغط المرتفع.
– رشدي الشامي “عمدة طايع ” .. سيد رجب جديد يغزو الدراما المصرية.
– We بتعمل عد تنازلي على معاد اذان المغرب على نجوم fm .. الجميل انهم من أول رمضان ولغاية النهاردة مفيش ولا مرة قالوا التوقيت صح.
– مصطفى شعبان اكتشف أنه عنده تليف كبدي “أيوب”، ومحمد محمود عبد العزيز اكتشف إنه مصاب بالسرطان “فوق السحاب”.
– بالحجم العائلي .. المسلسل لو كان له أغنية تتر كان هيفرق معاه كتير.
– الوصية .. مشهد فردوس عبد الحميد في المدرجات، أجمل ما في المسلسل حتى الآن.
– أبو عمر المصري .. مستغرب من هجوم السودان على إيماءات المسلسل، مع إن كلبش ذكروا فيه نصا إن شحنات الأسلحة الخاصة بالجماعات الإرهابية بيتم تهريبها من هناك.
– أبو عمر المصري .. عام بعد الاخر ، يثبت محمود الليثي أنه أكثر شباب برنامج snl موهبة وحضورا.
– أبو عمر المصري .. أمل بشوشة اصدرت بيان صحفي اليوم طمأنت فيه جمهورها عن سر غيابها وعبرت عن إمتنانها من اهتمامهم ، وأكدت لهم أن دورها في المسلسل يبدأ من الحلقة 19.
– إعلان مجموعة طلعت مصطفى .. أغنية نانسي عجرم الأسوأ بين أغاني إعلانات رمضان الحالي.
– ليالي أوجيني .. فرحان بدقة وحسن اختيار انتصار لأدوارها في الفترة الأخيرة.
– يارب نيمار يكون وشه على كومباوند سيتي ستارز، احسن من وش رونالدو على أبو هشيمة وحديد المصريين.
– عفاف شعيب “فوق السحاب” عارفة عبدالرسول “أبو عمر المصري” .. سلوى عثمان “أيوب” .. أصدق دليل على أن الخالة والده.
– الضمير الصاحي عمره ما يتطلب .. “أبو عمر المصري”.
– العقار هو الأبن البار، الفلوس في البنك مالهاش أي قيمة .. هشام إسماعيل “رسايل”.
– مفيش حاجة بتطلع كويسة غير بالحب .. يحيى الفخراني “بالحجم العائلي”.
– الحمدلله ان لسه في ناس بتعرف تربي ولادها لحد دلوقتي.. هالة فاخر “كلبش”.
– بيبان القلب دى بتاعة ربنا.. في ناس كده بتفتحها و تقعد فيها من غير حساب ” ليالي أوجيني”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.