عبد الله غلوش يكتب: غلوشيات رمضانية (10)
– كل المسلسلات بدون استثناء ترفع شعار، حدث جديد يا ولاد الحلال.
– طايع .. هي موضة ان المخرج يحشر نفسه في الكادر بدون مناسبة، مش قدمت من زمان ولا ايه؟
– للسنة الثانية على التوالي .. محمد جمعة سواء في “ضد مجهول” أو ” أبو عمر المصري” يثبت أنه ممثل تقيل.
– كلبش .. في فنانين تعمل مسلسل من الجلدة للجلدة ومتحسش بيهم، وفي فنانين يعملوا مشهد أو اتنين وتفضل فاكرهم .. ماجدة منير من النوع التاني.
– كلبش .. من أكتر المسلسلات المحافظة على إيقاعها حتى الآن.
– نهائي الشامبيونز .. كأبة أيوب وقانون عمر وسلسال الدم طول الـ 10 أيام اللي فاتت، متجيش حاجة قصاد لقطة خروج صلاح من المباراة.
– نهائي الشامبيونز .. حارس مرمى ليفربول، لو قابض من الريال مش هيعمل كده.
– نهائي الشامبيونز ..ليفربول من غير صلاح، فريق متواضع.
– نهائي الشامبيونز .. بنسبة 90% صلاح لن يلحق بمباراة الأوروجواي في المونديال.
– من أول رمضان، اذان المغرب في on e بيجي قبل باقي القنوات بنص دقيقة على الأقل.
– بالحجم العائلي .. لليوم التاني ع التوالي أحمد مجدي بدون البدلة التركواز.
– بالحجم العائلي .. لو عايز تستمتع بالمسلسل، انسى ان في حاجة اسمها راكور.
– بالحجم العائلي .. العلاقة بين ابن عمرو صالح والشاي ، الأجمل في رمضان الحالي.
– بالحجم العائلي .. وكمان مرة راكين سعد.
– بالحجم العائلي .. هو عمر حسن يوسف بيمثل ليه و إزاي؟
– اختفاء .. أول حلقة لنيللي كريم من 4 سنين، تبتسم فيها أكتر من 3 مرات.
– اختفاء .. محمد ممدوح وهو بيكلم نسيمة في قبرها .. ايه العظمة دي؟
– رسايل .. حتي الآن ، مش عارف ايه المغزى ان مي عزالدين طالعة محجبه في المسلسل، ومش بتكون محجبة في مشاهد الأحلام بتاعتها.
– رسايل .. أول مرة مي عز الدين تظهر في أحلامها من غير الفستان الأبيض.
– أيوب .. لحد امتي كل حلقة من المسلسل تخلص علي 3 بيضربوا مصطفى شعبان؟
– هو مش كان في قرار بمنع مشاهد السجاير في الدراما؟
– نسر الصعيد .. قلم عايدة رياض لعائشة بن أحمد، أحسن بكتير من قلم وفاء عامر لمحمد حاتم.
– نهى عابدين طالعة بدور ممثلة درجة تانية وحامل من غير جواز “لدينا أقوال أخرى ” .. منى فاروق طالعة بدور ممثلة درجة تانية وحامل من غير جواز “رحيم”.
– بالمناسبة منى فاروق من أكتر الناس الـ in cast في المسلسل.
– رحيم .. محمد أبو النجا اللي عامل دور عبودة اللي في الاساس مدرب اللياقة البدنية بتاع ياسر جلال في الحقيقة، المهم عبودة كان قاعد ع القهوة في حلقة امبارح بيشرب ٣ كوبايات شاي، ليه؟ وازاي؟ وايه المبرر المنطقي الله اعلم.
– أبو عمر المصري .. في ناس ترتاح لهم لما تشوفهم على الشاشة .. المغربية نادية كوندة من الناس دي.
– أبو عمر المصري .. أفضل حلقات أروى جودة من بداية المسلسل.
– أبو عمر المصري .. ترجمة جواب محمد سلام لأحمد عز لصورة ، أكتر من رائع.
– بالحجم العائلي .. لا بجد هو عمر حسن يوسف بيمثل إزاي؟
– الرحلة .. ثراء جبيل حاجة تفرح.
– نجلا بدر جوزها صور لها فيلم بورنو ” لدينا أقوال أخري” وروجينا تقود شبكة بنات بورنو “ضد مجهول”.
– ضد مجهول .. بعد أقل من حلقة على إخلاء سبيله في قضية وصولات الأمانة، القبض على دياب مرة تانية في قضية قتل.
– ضد مجهول .. تقريبا حنان مطاوع شخصية وهمية، صوت ضمير أو تهيئوات بتيجي لغادة عبدالرازق ومش شخصية حقيقة خالص.
– ضد مجهول .. مها نصار مشروع ممثلة كبيرة.
– ضد مجهول .. قاعدة من الصبح افتح اليوم السابع والتامن والتاسع ومش لاقيه أي أخبار جديدة .. روجينا لما تقلش.
– بالحجم العائلي .. بالله عليك لو عرفت عمر حسن يوسف بيمثل ليه وإزاي تقولي؟
– عائشة بن أحمد رفضت تتخطب لشريف إدريس “نسر الصعيد”، وهدى المفتي اتخطبت لأحمد حاتم “لدينا أقوال أخرى”.
– لدينا أقوال أخرى .. هو ليه 90% من مسلسلات يسرا، بتكون أرملة أو مطلقة؟
– إيه يا دنيا.. ليه بتحطي على جرحي كولونيا؟ .. هشام عباس “الوصية”
– مفيش في الدنيا أحلى من البوس والأحضان .. يحيى الفخراني “بالحجم العائلي”.
– طلبت مني انساك ومعرفتش، لأني اصلا محاولتش .. نور “رحيم”.
– هو اللي يعرف ربنا اليومين دول تقولوا عليه مشبوه .. عايده رياض “نسر الصعيد”.
– الكبار نارهم زيهم ميطفيهاش غير نار أكبر تقيد في قلوب اللي اتسببوا فيها .. هيثم زكي “كلبش”.
– الموهبة دي مش حاجة بتتلقط، دي حاجه جوه البني آدم نفسه ميقدرش يورثها لحد ولا يكتسبها .. محمد علاء “اختفاء”.
– بالحجم العائلي .. عرفت عمر حسن يوسف بيمثل ليه وإزاي ولا لسه؟
– ربنا يرحمك يا أمي ويرحم أمهاتنا جميعا ويحفظ امهاتكم يارب.