عبد الله غلوش يكتب: غلوشيات رمضانية (13)
– احنا وصلنا لمرحلة ان في بعض المخرجين عشان يقفلوا حلقات النهارده ، بيعيدوا 4 أو 5 مشاهد من حلقة امبارح.
– فوق السحاب .. واحنا داخلين خلاص على نص رمضان، يؤسفني اني اقول هاني سلامة مش لايق في دور الواد الشبح نهائي.
– نسر الصعيد .. واحدة من أفضل حلقات المسلسل حتى الآن.
– نسر الصعيد .. هل تنجح أي خناقة لـ زين القناوي في المسلسل في تحطيم رقم الـ 60 مليون مشاهدة المسجل باسم خناقة رفاعي الدسوقي وعصام النمر؟ .. أشك.
– نسر الصعيد .. العميد إسماعيل عبد الغفور اتفه مأمور قسم في تاريخ الدراما المصرية.
– نسر الصعيد .. بصراحة مش فاهم الحوارات والكلوزات الكتير في المسلسل على السجاير الكليوبترا سببه ايه؟ .. هل الشرقية للدخان داخلة سبونسر مثلا، ولا ده من باب دعم الصناعة المحلية استكمالا للدور الوطني اللي بيقوم بيه المسلسل وكده؟
– رحيم .. ميزة أن يكون معاك ممثل زي صبري فواز، ينقذلك حلقة مفيهاش أي حاجه مهمة بمشهد واحد يظهر فيه.
– رحيم .. تخيل لما تروح مصلحة حكومية او تجيب نتيجتك في المدرسة والموظف يقولك عايز الحلاوة، تقوم مطلع بار الرشيدي الميزان من جيبك ومديهوله .. ده اللي عمله عبد الرحمن القليوبي “شبوره” في المسلسل وده أكتر افيه عجبني في كل مسلسلات السنة دي حتى الان.
– اخر مرة اتفرجت فيها على قناة النيل الثقافية أو قناة العائلة أو القناة التالته كانت سنة كام؟
– توفير الفلوس اللي بتتدفع كل أول شهر في قنوات زي دي اتحدى لو اللي ماسكينها ذات نفسهم بيتفرجوا عليها، مش احسن ما نفكر نزود سعر بنزين أو تذكرة مترو؟
– السهام المارقة .. شيري عادل في قمة نضجها .
– عوالم خفية .. الظهور الاول لهند عبد الحليم ومحمد عز.
– عوالم خفية .. عارف حضرتك برنامج العاشرة مساء .. ايوة بتاع الأستاذ وائل الإبراشي بالظبط كده، أهو رامي إمام أخد أفضل 30 حلقة للبرنامج في السنتين اللي فاتوا، وعملهم مسلسل.
– قريت خبر النهاردة بيقول: (بعد تصدرها دراما رمضان.. غادة عبد الرازق تواصل تصوير “ضد مجهول” بالشيخ زايد).. مدام غادة لو مفيهاش إساءة أدب يعني، مش واسعة شوية دي؟
– أمر واقع .. الأكشن القديم اللي اتنفذ بيه مشهد مطاردة وقتل الإرهابي الموجود بين جمهور نادي الاتحاد السكندري في الصالة المغطاة، كفيل بإنك متتفرجش علي المسلسل مرة تانية.
– كلبش .. أفضل نهاية حلقات بين كل مسلسلات رمضان وأكثرها تشويقا حتى الآن.
– كلبش .. تقريبا مفيش فرق بين اداء أحمد صلاح حسني وأمير كرارة في المسلسل، غير ان الأول بدقن والتاني بشنب.
– أيوب .. كلاكيت تاني مرة، سلوى عثمان أد أيه الست دي ممثلة عظيمة.
– أيوب .. تخيل لما حلقة كاملة تضيع في اعتراض ولاد عمة أيتن عامر انها جت قعدت معاهم في البيت.
– بالحجم العائلي .. استعراض فرقة فابريكا ، الحسنة الوحيدة في حلقة النهاردة.
– رسايل .. بمنتهى الأمانة، يمنى مصطفى ستايلست مي عز الدين .. واحدة من أهم نجوم المسلسل.
– شيخ الحارة .. ايه قيمة إني أعمل برنامج، محدش بيتفرج عليه غير المذيعة اللي بتقدمه؟
– ممنوع الإقتراب أو التصوير .. لو في جائزة تمنح لأسوأ مخرج في رمضان السنة دي، يستحقها وعن جدارة زياد الوشاحي.
– الرحلة .. ريهام عبد الغفور وحنان مطاوع، أشبه بـمباراة كلاسيكو في الإحساس والموهبة.
– أرخص أنواع البشر اللي تكون بتتكلم معاه ع الـ whats-app أو الـماسنجر عنه، وتلاقيه عامل برينت سكرين لكلامك ده ونشره عنده ع البروفايل.
– لدينا أقوال أخرى .. شيرين رضا المفروض انها طالعة رئيسة وصاحبة أكبر شبكة قنوات في مصر، بس اللي يشوف بروموهات برامجها واسلوب إدارتها للشبكة يقول أن كبيرها العاصمة أو ltc.
– ياسر جلال ونور أول مشهد حب في بلاعة (رحيم) .. أحمد حاتم ونهى عابدين أول كتب كتاب بالبيجامه (لدينا أقوال أخرى).
– لولا وجود اسمها على التتر، مكنش حد عرف ان نسرين أمين مشاركة في “عزمي وأشجان”.
– ليالي أوجيني .. أيوه المسلسل حلو وموده جميل، بس ده مش معناه ان بقالنا 5 أو 6 حلقات مفيش حاجة بتحصل فيهم غير ان ظافر العابدين يصحى من النوم مراته تقوله صباح الخير، يلبس ويروح يفطر عند أمينة خليل، وفل على كده.
– اختفاء .. أموت واعرف محمد ممدوح نزل تحت السرير ازاي؟
– اختفاء .. الزعيم سعد زغلول كان بيلعب قمار، ملخص حلقة اليوم.
– أبو عمر المصري .. الأفضل في الأسبوع الثاني من رمضان وبفارق مش بسيط عن أقرب منافسيه.
– أبو عمر المصري .. انا مش مستغرب بس غير من الاخ عباس أبو الحسن اللي شغال في سفارة مصر في بلجيكا والمفروض انه راجل واصل ومهم كده ومعرفش كل الوقت ده ان مراته مقضياها وعلى علاقة بواحد تاني وبتدخل مستشفيات وبتطلع منها ولا هو هنا.
– الوصية.. أخيرا شفت عارفه عبد الرسول في دور جديد.
– طايع .. مها نصار هاتكون من أسرع الوجوه الجديدة اللي هايشيلوا بطولة مسلسلات وأفلام لوحدهم قريب.
– سبحان الله ، الفلاشة هي بطلة ومحور أحداث الحلقة رقم 13 في كلبش والرحلة وربع رومي.
– في نفس اليوم اللي رانيا فريد شوقي عرفت فيه انها حامل من رياض الخولي “سلسال الدم”، عرفت ان بنتها الوحيدة لسه عايشة ومامتتش “عوالم خفية”.
– أروى جوده عملت اختبار حمل وطلعت حامل “أبو عمر المصري”، نجلاء بدر عملت أختبار حمل وطلعت حامل “أمر واقع”.
– في يوم واحد، احلام الجريتلي ابنها في “عوالم خفية” دخل المستشفى، وابنها في “نسر الصعيد” دخل السجن.
– ميريهان حسين خلفت “أيوب” وسيد رجب عاير محمد رمضان عشان مبيخلفش “نسر الصعيد” و سليمان عيد باع التاكسي بتاعه عشان يعمل عمليه ويخلف “رسايل”.
– درة مفيش حلقة ظهرت فيها ومكنتش نايمة ع السرير ” نسر الصعيد” ومحمود البزاوي مفيش حلقة ظهر فيها من غير ما تكون السيجارة في إيده.
– أحمد حاتم “رسايل” و هشام سليم “اختفاء” .. بقالهم 13 يوم في المستشفى عندهم غيبوبه، يا عالم مين فيهم هايفوق منها الأول.
– اوحش حاجه في الجواز التعود .. هشام سليم “اختفاء”.
– أنا ومراتي مبقناش نحب بعض، عشان اتعودنا على بعض زيادة عن اللزوم .. محمد شاهين “لدينا أقوال أخري”.
– لحظات السعادة القليلة في حياتنا غالية بالذات لما بتيجي بعد أيام صعبة بتبقى عايزها تفضل للابد لكن للأسف مفيش حاجة بتدوم .. مي عرالدين “رسايل”.
– لما تيجي الفرصة لغاية عندك، اياك تفرط فيها.. فراس إبراهيم “رحيم”.
– في نوع من الناس مبتسمعش النصحية، لازم تحط صواعبها في الكوبس عشان تتأكد ان الكهربا بتموت.. يحيى الفخراني “بالحجم العائلي”.
– الناس في البلد دي مش عايزين شفافية، عايزين بطولة حتى لو مش حقيقية .. محمد ممدوح “اختفاء”.
– في ناس لازم تضرب على دماغها عشان تتعدل .. عفاف شعيب “فوق السحاب”.
– اللي مالوش أب له رب .. سهير المرشدي “طايع”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.