عبد الله غلوش يكتب: غلوشيات رمضانية (14)
– أنت مش تعيس زي وجه جديد المخرج قرر يكتب اسمه على التتر من غير ما يحط صورته أو يكتب اسم الشخصية اللي بيلعب دورها في المسلسل عشان الناس تعرفه.
– أبو عمر المصري.. لما أروى جودة ماتت مش أحمد عز بس اللي قال ليه ليه؟.. الشعب المصري كله والله.
– أبو عمر المصري.. بمنتهى الأمانة شغل أحمد عز مع طارق العريان أخر سنتين، صنع منه ممثل جديد.
– أبو عمر المصري.. المسلسل بيثبت حقيقة مهمة وهي: أحمد خالد موسى مخرج كبير.
– فوق السحاب .. أبو عزة مجاهد ومرات أبوها.. أقسم بالله أقسم بالله التمثيل بالطريقة دي اتلغى من زمان.
– فوق السحاب .. بعيدًا عن سذاجة القصة والإخراج والأداء التمثيلي لبعض الفنانين، لكن يحسب للمسلسل إنه واحد من أجرأ المسلسلات السنة دي.
– رسايل .. ربنا يرزقنا بشركة زي اللي بتشتغل فيها مي عزالدين، نروحها ٥ دقايق كل يوم ونستأذن ونمشي ونقبض أخر الشهر عادي.
– رسايل .. أكتر حاجة لفتت نظري في حلقة امبارح إن الجرايد اليومية سعرها بقى 3 جنيه.
– كلبش .. ماجد المصري مشهد مهم وإضافة كبيرة للمسلسل.
– كلبش .. بسنت شوقي من مكاسب الدراما السنة دي.
– رحيم .. هو زكي فطين عبدالوهاب ومراته، خلفوا الطفلة اللذيذة اللي طالعه بدور بنتهم في المسلسل دي إزاي؟
– اختفاء .. لو شفت رد فعل محمد ممدوح لما عرف إنه مصاب بالسرطان وقدامه 6 شهور ويموت، نصيحة متتفرجش على باقي الحلقة لأن مفيهاش أي حاجة.
– طايع .. طب يا جماعة لما صبا مبارك تموت أو عمرو عبد الجليل يتقبض عليه أو الظابط يعمل مهمة كاملة للآخر وتنجح أو أي حاجة جديدة تحصل، ياريت حد يقولي عشان أنا زهقت الحقيقة.
– طايع .. القدرة على التنقل بالشخصية من الخير للشر والعكس، بالسهولة والسلاسة دي، يثبت إن في مشروع ممثل كبير في الطريق اسمه علي قاسم.
– في عائق نفسي باخد فترة على ما اتجاوزه بيني وبين أي حد بيكتب على بروفايله “ممكن تعملوا لي نكز يا جماعة عشان الأكاونت بتاعي هيتقفل”.
– نسر الصعيد .. مبدئيا حلقة النهارده 25 دقيقة بس من غير تترات.
– نسر الصعيد .. تخيل حضرتك لما تضيع أكتر من ساعتين في يومك عشان تتفرج فيهم على حلقة من مسلسل المفروض إنه مهم وفي الأخر تكتشف إن الحلقة كلها بتدور حول زين القناوي اللي هو معاون مباحث أد الدنيا عايز يعرف مين الشخص اللي بيبعت له رسايل ع التليفون.
– نسر الصعيد.. هو أستاذ محمد رمضان ميعرفش إن في حاجة اسمها ترو كولر، كان ممكن يشوف اسم اللي بيتصل منه ومكنش ضيع وقته ولا ضيع وقتنا معاه!
– نسر الصعيد .. طب هو فؤاد بيه اللي في مباحث الاتصالات اللي كلمه وقاله مفيش بيانات متسجلة عنده باسم صاحب الخط، ميعرفش إن الرقم اللي ظهر على الشاشة بتاع واحد اسمه أحمد نعيم وأي مواطن مصري عادي عنده الـ app على موبايله هايعرف كده؟
– نسر الصعيد .. بالمناسبة، المسدجات المبعوته كانت sms مش “واتس آب” زي ما زين القناوي قال لفؤاد بيه.
– عدد الممثلات اللي بيحششوا في المسلسلات السنة دي مرعب.
– بالحجم العائلي .. لو عايز تشوف نسخة 2018 من إشاعة حب، ممكن تتفرج على حلقة النهاردة.
– بالحجم العائلي .. العلاقة بين عمر حسن يوسف وسلوى محمد على مقززة أكتر من علاقة وفاء عامر ومحمد رمضان في “نسر الصعيد”.
– بالحجم العائلي .. للسنة التانية على التوالي، ميرفت أمين بتثبت انها مبتعرفش تربي.
– بالحجم العائلي .. أحمد كرارة أخو أمير كرارة في الحقيقة وأخو هاني عادل في التمثيل.
– اللي بيسأل المنتخب هايبقى عامل ازاي من غير محمد صلاح، ممكن يتفرج على حلقة من “عوالم خفية” بدون عادل إمام وهو يعرف الإجابة.
– في نفس اليوم اللي راندا البحيري ونرمين ماهر خرجوا من السجن “سلسال الدم” ، يسرا اتقبض عليها في قضية قتل “لدينا أقوال أخرى” ، وأيتن عامر اتقبض عليها في شقة دعارة “أيوب”.
– بالمناسبة، باستثناء سرايا عابدين، فاكر آخر مسلسل يسرا عملته، متقبضش عليها ودخلت السجن فيه؟
– أيوب .. اللي يعرف دكتور أشرف زكي ياريت يقوله، مايحاولش يعمل انه متعصب و منفعل في أي مشهد، عشان بيبقى fake جدا الحقيقة.
– أيوب .. أكبر نسبة يا بنت الكلب ويا روح أمك، في دراما هذا العام.
– أيوب .. هشام الشاذلي أول سواق أوبر في تاريخ الدراما رخصه تتسحب وأمين الشرطة يرجعهاله مرة تانية من غير ما ياخد مخالفة .. يا بركة دعاكي يا مدام سلوى عثمان والله.
– قانون عمر .. والله كل اللي يعرف حمادة هلال يعرف إنه شهم وجدع، الموضوع مكنش محتاج يتوثق في مسلسل.
– مش فارق معايا أحمد أمين بيجيب تيشيرتاته منين “الوصية”، أد ما شاغلني محمد لطفي بيجيب ألوان قمصانه دي منين؟ “أيوب”.
– ضد مجهول.. انتبه من فضلك المسلسل يرجع إلى الخلف.
– ضد مجهول.. لو في واحد مقتنع ان اللي بيقدمه فراس سعيد في المسلسل ده اسمه تمثيل، ياريت يقولي.
– شيخ الحارة.. عملا بمبدأ حق الرد، البرنامج عامل أكتر من 10 مليون مشاهدة على اليوتيوب من بداية رمضان.
– هي الدنيا كده، ناس تخلف وترمي وناس هاتموت على ضفر عيل.. سليمان عيد “رسايل”.
– رامز جلال ده ممثل جديد متسمعش عنه.. توني ماهر موجها حديثه لياسر جلال “رحيم”.
– الستات عاملة زي الجبنة الرومي، كل ما تقدم تحلى “رحيم”.
– مركز التجميل مشروع حلو وبيكسب عشان البلد كلها عاهات .. محمد لطفي “أيوب”.
– الجواز من غير حب مالوش طعم .. يحيى الفخراني “بالحجم العائلي”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.