عبد الله غلوش يكتب: غلوشيات رمضانية (15)
– هو ليه كل المسلسلات السنة دي لازم يكون فيها كائن لزج يقفلك من المسلسل كله؟
– أبو عمر المصري .. الرحلة .. كلبش .. أكتر 3 مسلسلات محافظة على إيقاعها حتى الآن.
– أيوب .. كفارة يا راجل.
– أيوب .. مصطفي شعبان الممثل الوحيد اللي لما بيضرب هو اللي بيقول أووه مش اللي بيضربه.
– أيوب .. أول يوم النهارده يبقى في صفارة تيت ع الألفاظ الخارجة في المسلسل.
– رحيم .. النهارده بس نقدر نقول رحيم راجل ومش هايرحم حد.
– رحيم .. هو التعليم في مصر بعافية فعلا ، بس مش لدرجة ان واحده عندها 12 أو 13 سنة متعرفش 3 في 4 كام.
– بالحجم العائلي .. يحيي الفخراني المعنى الحرفي لمصطلح one man show.
– أبوعمر المصري .. رغم وفاتها في حلقة امبارح ، أكبر عدد من المشاهد لأروى جودة كانت في حلقة النهارده.
– ليالي أوجيني .. أد ايه الحياة زمان كانت راقية و تافهة وجميلة.
– ليالي أوجيني .. هو إيه الحدث اللي عاشته مصر وخلانا بعده منقولش لبعض الصبح نهارك سعيد.
– ليالي أوجيني .. انتصار فسخت خطوبتها ومراد مكرم خطب وإنجي المقدم هي اللي عملت بوفيه الخطوبة .. أبرز أحداث حلقة اليوم.
– نسر الصعيد .. هو لما محمد رمضان يطلق درة قريب بإذن الله ، هتفضل مكمله معانا هي واخواتها في المسلسل ولا دورهم هاينتهي لحد كده ، عشان ناخد احتياطاتنا بس.
– نسر الصعيد .. أنا مستغرب إن وفاء عامر بس اللي معترضه على فكرة ان اسمها يتكتب بعد درة ع التتر.
– نسر الصعيد .. تخيل امبارح تضيع حلقة كاملة على الرقم اللي بيبعت رسايل لمحمد رمضان ، والنهارده ولا كأن في حلقة ضاعت ع الرقم امبارح ، وفجأة الرقم مبقاش يبعت رسايل تاني وفجأة زين القناوي نسي الموضوع ومسلسل زي الفل الحقيقة.
– نسر الصعيد .. بعدين مش عيب زين باشا القناوي يقنع المأمور يحطوا كاميرا ع السجن من بره وميحطوش كاميرات جوه الحجز ، أهو ع الأقل مكنش لبس قضية القتل بتاعة النهارده دي؟
– الرحلة .. وليد فواز بيمثل بطريقة ما قل ودل.
– تقريبا أنا الوحيد في مصر اللي معلقتش معاه أغنية هاللا هاللا ع الفانلة وعايزها تطلع من دماغه.
– مليكة .. أخيرا ، دينا الشربيني قررت تعمل تحليل DNA.
– رسايل .. سعيد بعودة الثنائي نبيل نور الدين وعلاء عوض للتمثيل مرة تانية.
– كلبش .. عبدالرحمن أبوزهرة .. حالة الوفاة رقم 87 في المسلسل.
– كلبش .. والله فرحان بهيثم ذكي وتطوره في كل حلقة عن اللي قبلها.
– لدينا أقوال أخرى .. جوز بنت يسرا ، اتنقل من الأمن الوطني لمباحث الكهربا .. ملخص حلقة اليوم.
– عوالم خفية .. أكبر عدد من الوجوه الجديدة المبشرة في دراما هذا العام.
– عوالم خفية .. هو جورنال نبض الشعب اللي شغال فيه عادل إمام ده مالوش ويب سايت؟
– عوالم خفية .. مش عارف ليه المخرجين حاصرين الشحات مبروك في دور الشر ، مع انه منجحش فيه ولا مرة.
– أمر واقع .. أفضل حلقة في المسلسل من بداية رمضان ، وأفضل أداء لنجلاء بدر من سنين.
– ضد مجهول .. من بعد مشهد غَسل جثة بنت غادة عبدالرازق في الحلقة التاسعة ، مفيش مشهد حلو أو مهم أو مؤثر في أحداث المسلسل حتى الان.
– فوق السحاب .. هي الحاجة عفاف شعيب مصدقة اللي بتعمله ده؟
– فوق السحاب .. هو هاني سلامة ميعرفش من مصطلحات الصياعة غير جملة “أمك في العشه ولا طارت”؟
– اختفاء .. اعادة 6 مشاهد من حلقة امبارح في حلقة النهارده ، 3 في أول الحلقة و3 في النصف التاني.
– اختفاء .. الظابط كلم نيللي كريم يقولها ان هندسة القاهرة بعتت له شهادة تخرج محمد ممدوح .. بيقولها انه خريج قسم مدني دفعه 58 مع إن الكاميرا لما جت ع الشهادة مكتوب فيها إنه خريج قسم عمارة ودفعة 59.
– في نفس اليوم ، مصطفى خاطر اجل خطوبته ” ربع رومي” وفتحي عبدالوهاب اجل كتب كتابه “عوالم خفية” ، وتامر حسني ويوسف الشريف أجلوا افلامهم للعيد الكبير.
– اخلاء سبيل ايتن عامر ” أيوب” ويسرا “لدينا أقوال أخرى”.
– في ظرف يومين ، محمد شاهين مراته في “لدينا أقوال أخرى” طلبت منه الطلاق ، ومراته في “ممنوع الاقتراب أو التصوير” طلبت منه الطلاق.
– نهي عابدين حملت من احمد حاتم بدون زواج ورفضت تنزل الجنين “لدينا أقوال أخرى” .. راندا البحيري حملت برضه من احمد حاتم بدون زواج وهي كمان رفضت تنزل الجنين ” رسايل”.
– زين الدين زيدان .. درس في فن اختيار التوقيت المناسب للرحيل.
– طايع .. مشهد عمرو يوسف وهو بيعمل عملية إجهاض لمراته صبا مبارك ، يضاف لقائمة المشاهد العظيمة في دراما هذا العام.
– طايع .. كلاكيت 15 مرة ، رشدي الشامي ممثل عالمي.
– طايع .. أفضل حضور لـ عمرو يوسف من أيام ما كان مذيع في روتانا.
– حد يقول لصاحب سلوجان “العيد هايبقى عيدين” في اعلان حلواني العبد، إن محمد صلاح إتصاب وإحتمال ميلعبش.
– اللي بيته من ازاز ، ميقلعش بلبوس في الصالة .. نسرين امين “ممنوع الاقتراب أو التصوير”.
– الإحساس بالذنب نعمة .. سلوي عثمان”أيوب”.
– مستحيل تسعد حد وإنت أصلا تعيس .. ظافر عابدين “ليالي أوجيني”.
– الناس ما بتصدق حاجه تهري فيها ع السوشيال ميديا .. شيرين رضا “لدينا أقوال أخرى”.
– أحسن وقت تضرب فيه حد ، لما يكون قلقان .. ياسر جلال “رحيم”.
– الزمن مبيغريش غير اللي سايب له نفسه .. عارفة عبدالرسول “أبوعمر المصري”.
– متقولش على حد أنه نحس ، عشان ده نوع من أنواع الشرك بالله .. خالد الجندي “لعلهم يفقهون”.
– الذكريات عاملة زي الوردة اللي ريحتها حلوة بس فيها شوك “مليكة”.
– عايز تعرف أخلاق البنت حقيقي بص ع أمها الأول .. اسر البدراوي “نسر الصعيد”
– الأم بتحب ولدها أول ما بتحمل فيه ، لكن الأب بيحبه بس أول ما يشوفه .. عمرو يوسف “طايع”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.