عبد الله غلوش يكتب: غلوشيات رمضانية (17)
– اون E .. لو كان القرار في إيدي ، كنت رجعت برنامج عمرو أديب في الأسبوع الاخير من رمضان يعمل حلقة ليلة القدر ويلم فيها التبرعات اللي بيجمعها كل سنة ، وبعد كده يكمل أجازته تاني عادي.
– طايع .. أفضل حلقة 17 بين كل مسلسلات رمضان.
– طايع .. رشدي الشامي يا جماعة .. رشدي الشامي والله .. الوحيد اللي بيعمل الطيب والشرس في نفس الريأكشن.
– طايع .. نداء لعمرو سلامة وأل دياب ، لو صبا مبارك ماتت النهاردة هازعل.
– أيوب .. 19 تيييت في حلقة واحدة.
– أيوب .. نفسي يوم يعدي من غير ما سلوى عثمان تلطم فيه.
– أيوب .. في أقل من 3 أيام دياب إشترى عربيتين bmw .. واحدة اتحرقت والتانية اتسرقت.
– أيوب .. مشهد ميريهان حسين وهي بتقول لمحمد لطفي أنت طالق .. حاجة من ريحة مسلسلات مصطفى شعبان في الخمس سنين اللي فاتوا.
– هاني سلامة رجع من بلجيكا “فوق السحاب” ونيللي كريم راجعه روسيا “اختفاء”.
– مستغربتش من البيان اللي طلعه المجلس الأعلى للإعلام بيندد فيه من الإيحاءات الجنسية في مسلسل “30 ليلة وليلة ” ، أد ما استغربت أن في حد من المجلس قلبه طاوعه وقدر يتابع المسلسل أصلا.
– الظهور الأول لـ جميل راتب “بالحجم العائلي” وصلاح عبدالله ونجلاء بدر ومريم الخشت “كلبش”.
– بالحجم العائلي .. كمية الشباب اللي بيحبوا ستات كبيرة في المسلسل ، حسستني إني بأتفرج ع الجزء التالت من فيلم “يا تحب يا تقب”.
– بالحجم العائلي .. قلم ميرفت أمين لـ رمزي لينر رجعني لأيام السينما الصامتة.
– الرحلة .. حلقة النهارده بتثبت ، ان في ممثلين وفي باسل خياط.
– فوق السحاب .. اخر حاجة كنت ممكن اتخيلها إن الشيخة اللي مرتضى منصور بيبعت لها اسماعيل يوسف وهاني زاده قبل ماتشات الزمالك المهمة طلعت الحاجة عفاف شعيب.
– فوق السحاب .. أمير شاهين راضع من كلبة .. المعلومة الأبرز في حلقة اليوم.
– ليالي أوجيني .. أول حلقة من 4 أيام منديل ظافر عابدين ميجيش سيرته في أي مشهد.
– مجموعة انسان .. واحد من ارقى برامج الهارد توك شو اللي اتعملت خلال أخر 10 سنين.
– اعلان we .. هو اللي عمل الإعلان ازاي اقنع مسئولي الشركة بفكرته.
– اعلان we .. مستعد اشترى خط والله بس يوقفوا الإعلان.
– اعلان we .. كل اللي عملوا أحمد عز في أبوعمر المصري ضيعه في الإعلان.
– اعلان we .. والله بقيت أتجنب اتفرج ع الإعلانات عشان مخبطش فيه صدفة.
– كنت بأثق في اختيارات نبيل الحلفاوي لحد ما اتفرجت على “أمر واقع”.
– في ماسورة زكي فطين عبدالوهاب ضربت في كل المسلسلات فجأة.
– عمرو يوسف “طايع” او أحمد عز “أبوعمر المصري” .. تفوقوا على نفسهم في تجسيد دور الراجل قليل الحيله.
– عوالم خفية .. محمود حجازي عنتيل وزارة التربية والتعليم.
– عوالم خفية .. واحد من أجمل أدوار بشرى من فترة كبيرة.
– نسر الصعيد .. محمد عز موهوب ومن القليلين اللي بتنسى انه ممثل لما بتشوفه ع الشاشة.
– نسر الصعيد .. والله والله والله حاولت اتأثر بدموع درة النهاردة ومعرفتش.
– نسر الصعيد .. هاجر عفيفي ويوسف عثمان من الحاجات الحلوة القليلة اللي هنفتكرها للمسلسل بعدين.
– نسر الصعيد .. طبق الفاكهة اللي قدام أبو البنت اللي أحمد خالد صالح عايز يخطبها ، زي ما هو من ٥ حلقات لا برتقالة زادت ولا موزه نقصت.
اختفاء .. هشام سليم طلع لسه عايش وبسمة كانت تعرف مكانه.
– سامي مغاوري.. بيومي فؤاد رمضان ٢٠١٨.
– كلبش .. اسرع ايقاع بين مسلسلات رمضان.
– كلبش .. ماجد المصري حالة الوفاة رقم 89 في المسلسل.
– كلبش .. هل الشيخ اللي افتى لمدام هالة فاخر انها ممكن تمثل بالباروكة ، مقلهاش ان الصلاة وهي full makeup ونص شعرها خارج من الطرحة، حرام؟
– مراسم اداء اليمين الدستورية للرئيس السيسي .. بسيط ومشرف.
– مراسم اداء اليمين الدستورية للرئيس السيسي .. من المرات القليلة اللي التليفزيون يتولى مهمة إخراج حدث مهم ويخرج بدون أي غلطة .. تحية للمخرج محمد يونس والبروديوسر محمد مصطفى.
– ماونتن فيو .. أول مرة في حياتي اتفرج على حاجة لماجد الكدواني ، ويطلع دمه تقيل فيها.
– ايمان العاصي خرجت من السجن “نور طلعت من السجن “رحيم” وأيتن عامر دخلت السجن تاني “أيوب”.
– صبا مبارك حامل في بنت ” طايع ” .. راندا البحيري حامل في ولد “رسايل” .. ميريهان حسين حامل ولسه متعرفش نوع المولود “أيوب”.
– أبو عمر المصري .. الطفل معتز هشام بيمثل أحسن من نجوم كبار شايلين بطولة مسلسلات السنة دي.
– أبوعمر المصري .. سعد المختار من مجرد ممثل عادي بيعمل دور بودي جارد في معظم الاعمال اللي شارك فيها ، لواحد من أبرز ابطال حلقتي أمس واليوم في المسلسل .. ابحث عن المخرج.
– نسر الصعيد وسك على اخواتك وربع رومي .. المسلسلات المفضلة لـ محمد صلاح.
– الشغل هي الحاجة الوحيدة اللي بتخليك تقف على رجلك من تاني .. حنان مطاوع “الرحلة”.
– كلنا بشر بنغلط وهنفضل نغلط واللي بنزرعه في الاول بنحصده في الاخر .. مي عزالدين “رسايل”.
– لازم ترتاح عشان الغمامة تزول وترجع تشوف من تاني “آبوعمر المصري”.
– مش عايزاه يبقى صايص وفي نفس الوقت مقرمش .. مفيدة شيحة متحدثة عن الرقاق “الشيف ومفيدة”
– ساعات اما حد بيحبك في وقت انتي محتاجة تحسي فيه بالحب ، بتوهمي نفسك انك كمان بتحببه “ليالي أوجيني”.
– الاهل ممكن يكون بينهم عتاب ، لكن عمر ما بيكون ما بينهم زعل .. ياسر جلال “رحيم”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.