عبد الله غلوش يكتب: غلوشيات رمضانية (18)
– كل يوم .. عودة عمرو أديب أخر 4 أيام في رمضان.
– في يوم واحد .. أحمد حلاوة اتقبض عليه “مليكة” ، رامز أمير اتقبض عليه “رسايل” ، فتحي عبدالوهاب اتقبض عليه ” ممنوع الإقتراب أو التصوير” ، نيللي كريم اتقبض عليها “اختفاء” ويسرا اتحكم عليها بالإعدام “لدينا أقوال أخرى”.
– أيوب .. في ظاهرة تحدث لأول مرة من بداية رمضان .. 2 تيييت بس في حلقة النهارده.
– أيوب .. بمنتهى الأمانة ، المسلسل فقد نصف قوته، من لحظة خروج مصطفى شعبان من السجن.
– الثانوية العامة .. جمع كلمة فضل .. أصعب سؤال في امتحان العربي النهاردة.
– الثانوية العامة .. معالي وزير التعليم ، قبل ما حضرتك تفكر تلغي المدارس التجريبية ، يا ريت تمسك اللي بيسربوا الامتحانات الاول.
– كلبش .. من جديد ، نجلاء بدر في دور زوجة خاينة .. ربنا ما يقطع لك عادة .
– كلبش .. أشرف زكي كان بايخ وسخيف .. محمد محمود عبدالعزيز اللي قال كده مش انا.
– كلبش .. كفايه مستحملين أحمد كرارة في “بالحجم العائلي وفوق السحاب” .. ميبقاش عندكم انتم كمان ، كفاية المشهد بتاع حلقة امبارح .. أرجوكم.
– عوالم خفية .. بعكس السنين اللي فاتت ، هند أحمد عبد الحليم ركزت في مسلسل واحد بس ، اشتغلت على الشخصية وتفاصيلها كويس وعشان كده النتيجة أفضل.
– قانون عمر .. حمادة هلال هو اللي أحيى زفاف حمادة هلال.
– إخلاء سبيل أيتن عامر “أيوب” ودياب “ضد مجهول”.
– فتحي عبد الوهاب و هالة صدقي “رحيم” .. صلاح عبدالله “كلبش” .. عمرو عبد العزيز “اختفاء” .. أبرز ضيوف شرف المسلسلات اليوم.
– لدينا أقوال أخرى .. هدى المفتى فسخت خطوبتها ، وسلمى أبوضيف طلبت الطلاق ، ومحمد شاهين هايطلق مراته.
– اختفاء .. بدون انفعال ولا تنشنة ولا استعراض عضلات ، نور محمود من أكثر الممثلين اللي اقنعوني بدور ظابط الشرطة السنة دي.
– سواء في أيوب أو ضد مجهول ، دياب أكتر واحد قال جملة ( يا روح أمك ) في دراما هذا العام.
– طايع وكلبش خد ساتر وانت بتتفرج عليهم يا تيجي فيك طلقة من هنا ولا هنا.
– شهادة حق ، mbc 4 من احسن القنوات في رمضان السنة دي.
– مبادرة فك كرب الغارمين اللي اطلقها مصطفى شعبان بالتعاون مع مصر الخير .. فكرة حلوة وإستغلال امثل لنجاح المسلسل.
– طايع .. عمرو عبد الجليل ، لما توافق تعمل دور تاني ، بس من جواك تقرر أنك تكون البطل الرئيسي للمسلسل.
– طايع .. مشهد موت مهجة أو صبا مبارك يغفر لـ عمرو سلامة اي حاجة عملها قبل كده او هايعملها بعد كده.
– طايع .. من زمان مشوفناش بطلة بتموت في نص رمضان.
– طايع .. رغم الدور العظيم اللي عملته صبا مبارك ، لكن للأسف على آخر رمضان الكل هايكون نسي ومحدش هايفتكرها في الإستفتاءات.
– طايع .. موت أحمد داش وبعده بيوم صبا مبارك ، مغامرة وتحدي كبير لأسرة المسلسل في الـ 12 حلقة الباقيين.
– ضد مجهول .. كالعادة ، لا جديد.
– أبو عمر المصري .. أحمد عز يكشف عن شيسته وبايه وترايه لأول مرة.
– أبو عمر المصري .. منذر رياحنة بيلاقي نفسه في اللغة العربية.
– أبو عمر المصري .. من حيث التنفيذ والتصوير والإخراج ، مشهد تفجير السفارة واحد من افضل مشاهد الانفجارات في تاريخ الدراما المصرية.
– ليالي أوجيني .. أمينة خليل عرفت أن ظافر بيحبها.
– ليالي أوجيني .. مريم الخشت كانت عايز تاكل رز وبطاطس وفراخ ،في نفس الوقت اللي انتصار كانت عايزه تعمل فيه رقاق .. الحدث الأبرز في حلقة اليوم.
– بالحجم العائلي .. فستان ديانا أجمل ما في حلقة اليوم.
– بالحجم العائلي .. اللهم ارفع مقتك وغضبك وعمر حسن يوسف عنا يا أرحم الراحمين.
– خايف اعلق علي بلاغات الفراغ والشهرة اللي بيتقدم بيها المحامي سمير صبري كل يوم للنائب العام بسبب مسلسلات رمضان واخرها “الرحلة” ، يقوم مقدم فيا بلاغ أنا كمان.
– فوق السحاب .. هاني سلامة الله أكبر عليه الممثل الوحيد اللي الكهربا مبتأثرش فيه.
– فوق السحاب .. مرتضى منصور راح لعفاف شعيب عشان ميتغلبش ٦-١ تاني .. ملخص حلقة اليوم.
– رسايل .. خايف احلم بأحمد حاتم وانا نايم والله .. تو ماتش الحقيقة.
– رسايل .. لقطة المعزة والجدي اللي بيتابعوا مشهد مطاردة البوليس لرامز أمير ، الحاجة الوحيدة اللي عجبتني في حلقة النهارده.
– نسر الصعيد .. اللي شايل المرارة يا ريت ميتفرجش على مشاهد ميريت وباسل الزارو في حلقة النهاردة.
– نسر الصعيد .. محمد رمضان جاب في فرحه أحمد شيبة ، وجاب في فرح أخته محمود الليثي.
– نسر الصعيد .. بالمناسبة ، هي أغنية محمود الليثي ايه علاقتها.
– نسر الصعيد .. بالمناسبة كمان ، هو محمد رمضان معزمش ليه أهل مراته في فرح أخته؟
– نسر الصعيد .. طب بلاش ده ، هي درة متعرفش ان اختها بتتطلق ومرات أخوها عملت حادثة ورجلها اتقطت؟
– نسر الصعيد .. سؤال أخير طالما سيد رجب عنده ناس بتنشن كويس كده ، مبعتوش ليه من الأول يقتل زين ، بدل ما يبعته يقتل الراجل اللي معرفش يقتل زين؟
– حبيت أسوي الواجب إتحرق مني .. مصطفى خاطر “ربع رومي”.
– لو عوزت اقع مش هاعرف .. ياسر جلال “رحيم”.
– الحقيقة دايما كده بتوجع بس بتفوق .. محمد ممدوح “اختفاء”.
– حطة رجلي في الأرض رزق ، النفس اللي بتنفسه رزق ، حبايبي اللي حواليا رزق ، كلمة الحمدلله وحدها أكبر رزق .. عبلة كامل “سلسال الدم”.
– الحب حين يأتي لا يخترنا بإشعار مسبق .. ظافر العابدين “ليالي أوجيني”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.