مارينا المصري تكتب: دراما كوين (22)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (21)

1- أبو عمر المصري

-” القتل مش حاجة وحشة المهم تعرف تقتل مين وليه”.

القتل كله حرام.. كله

– “مجراش حاجة لو جه عليك وقت محتاج إنك تهرب فيه”.

المهم تكون عارف إنك هربان وهربنا من إيه ولإمتى.. تهرب فترة مش العمر كله.

– “أنا محتاج اخرج من هنا وأحس إن أنا حر، حر في حياتي حر في قراري”.

السجون كتير من غير أسوار وحبستها أصعب وتخنق أكتر، حبسة مشاعر أو أفكار أو صوت… حاجات كتير.

2- بالحجم العائلي

– “عمري ما فكرت حياتك قبل كدة كانت عاملة إزاي وإيه المكان اللي جاية منه”.

الله حلوة الناس اللي مش فارق معاها السؤال ده اللي هما عددهم في مصر يتعد على الصوابع، بس تفتكروا السؤال ده ممكن يبقى مبرر لأي تصرفات أو مؤشر للشخصية فمهم نسأله حتى لو رخم ؟

– “الإنسان مبيبقاش عارف مين القريب ومين البعيد، الوقت والأيام بيعرفوه وأوقات الأيام دي تبعد القريب وتقرب البعيد”.

القريب للقلب ممكن يكون بعيد على العين والقريب منك وجنبك ممكن يكون الأبعد على الإطلاق، ده كلام كليشيه.. بس اللي بجد بقى والاوحش إنك تكون قريب أوي لشخص مقربك منه فعلا بس هو بعيد عنك ومش بيقرب.

3- ليالي أوجيني

– “الحياة كتير قاسية، بس مع الوقت كل شيء بيعدي”.

مين قال إن الوقت بيعدي وبينسي والكلام ده كله!! لا بجد مين صاحب الإشاعة دي! الوقت بيوجع أكتر ومفيش حاجة كان ليها قيمة ومهمة بجد وبتعدي، قول بتتدارى ماشي.

– “بطلي اعتذارات، مش عارفة اقبلها”.

فكرت إنك تقول الجملة دي قمة الاحترام، أحسن من خلاص مفيش حاجة وانت بتولع نار.

– “عارفة أوحش حاجة بتتقال في العزا إيه؟ تعيش وتفتكر، كإنهم بيدعولك إنك تفضل عايش أيام الوجع والألم”.

– “الناس بتقول إن الحزن بيتولد كبير وبيصغر، بس دي مش الحقيقة، انت بس بتتعودي”.

الوجع الكبير بيكبر كل يوم والوقت بيزوده..

– “يمكن لو كنّا ناس تانيين وفِي ظروف تانية!”

ساعات بتمنى اكون فعلا مكان حد تاني وفِي ظروف تانية، وارجع وأقول اللي مخبياه عن الناس ياما وأكيد الناس مخبية ياما برضه، محدش عالم بوجع حد.

– “هو أقل واحد يستاهل إنه يخسر، لإنه أكتر واحد بيبقى عايز كله يطلع كسبان”.

ومستحيل يخسر، اللي بيساعد في تحقيق أحلام غيره ومكسب غيره ربنا بيعوضه اضعاف وبيحقق له حتى الأحلام اللي نسيها من زمن ويأس من انها تحصل.

4- رحيم

– “كل واحد بياخد على قد نيته”.

وطبعا واضح إن نياتنا بقت زفت زي ما هو واضح قدمنا.

– “احنا جينا الدنيا دي علشان ناخد عبرة وعظة ونروح”.

أكيد لا، ده إيه الفرهدة اللي على فاضي دي، أكيد ربنا خالق البني أدمين علشان يفرحوا مش نكد يعني.