مارينا المصري تكتب: دراما كوين (25)
كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.
نرشح لك : مارينا المصري تكتب: دراما كوين (24)
1- كلبش ٢
– “الفيديو ده لا يقل أهمية عن الحزام الناسف”.
والله في فيديوهات وكلام على السوشيال ميديا لا يقل فعلا عن الحزام الناسف.
– “ربنا لا يرزق أحد بالشهادة إلا إذا كان يستاهلها”.
ربنا يرحم كل شهداءنا الأبطال البواسل.
2- طايع
– “يا نهرب يا نموت كلنا”.
الهرب وانت معاك حد وتسيبه يعتبر خيانة وجبن والموت ساعتها أكرم وأنضف.. عمر ما كان الجري نص الجدعنة.
– “اللي يشيل زيي يعمل زيي”.
كل واحد عنده شيلته ومحدش يعرف ولا يشيل ولا يعمل زي حد..
3- أبو عمر المصري
– “الأمل لو كان بخيل فاليأس أبخل”.. (عم نجم)
الأمل هو سبب مقاومة أي شخص من وجهة نظري, لو مفيش أمل مفيش عيشة
– “أنا بس موضوع إني أحب واتحب مش فاهمه”.
ساعات الفكرة نفسها بتكون صعبة فكرة إنك تحب أولا نفسك وتصدق انك اه تتحب ليه لا، وفكرة إنك تصدق إنك بتحب مهما كانت ظروفك، فكرة صعبة بس تصديقها ليه طعم حلو..
– “الحرب لما تخلص بتولد وراها رغبة وحشية في الانتقام”.
الحروب بتجيب حروب والدم بيجيب دم والانتقام دايرة ملهاش آخر.
– “ومستغربين آدم ازاي خرج من الجنة! اه يا صنف”
أقر وأعترف إن احنا الستات أذكى وخصوصا في الشر.
– “القتل شهوة زيها زي الاكل والجنس”.
القتل شهوة لازم تقتل بأي طريقة غير القتل.
– “أذكى جريمة اللي متبنش إنها جريمة”.
وياما جرايم نفسية قبل الجسدية متخفية ورا كدبة الحب والإنسانية.
4- بالحجم العائلي
– “الأب والأم والأخوات حاجة تانية.. هم السند”.
وكل ما يبعد واحد منهم عنك حتة منك بتتكسر وملهاش تعويض.. متحاولش.
– “والله منصحهاش, بس زي بعضه خليها تجرب”.
حلوة أوي بقى الجملة وخصوصا لو من أب أو أم لابنهم اللي في ثانوية عامة واحنا في امتحانات اهو.. سيبوا عيالكم يختاروا يجربوا، انصحوهم بس.
– “الدنيا قصيرة، نعشها حلو ولا نضيع وقتنا في مهاترات ملهاش لازمة”.
الجملة دي لو عرفت اعملها هدوق طعم السعادة بدل النكد اللي ملازم كل واحد فينا بسبب دماغه اللي مسوحاه.
5- ليالي أوجيني
– “اللي تعرف واحد متجوز تبقى بترخص نفسها”
طبعا مفيش مبرر يشفع لها..
-“أنا مش عارفة استطعم أي حاجة بعملها واحنا بنا اللي بنا”.
زعلهم منكد عليك؟ تبقى بتحبهم وغاليين، صالحهم لإنهم يستهالوا.
– لو قبلت إن كرامتي تتهان.. هنكسر، وانت ولا هتحبني وأنا ست مكسورة”.
الراجل المصري مش بيحب الست المكسورة بس بيحب يكسرها!
– “كنت فاكرة ءني هزهق لما اعمل حاجات لوحدي، بس طلع متعة في حد ذاتها”.
ومش أي متعة، ده إحساس رائع. المشكلة لما الوحدة ترخم وتشبط فيك، بتمسخ أوي.
– “الراحة ما بين اتنين بتدوب اي فروقات”.
والحب.. أصل تيجي الراحة إزاي من غير حب!
– “الحب بيطمعك، كل ما تدوقي حلاوته، كل ما تعوزي زيادة مش بتستكفي”.
المشكلة بقى بتكون في اللي بتقلب بنكد بقى.. مقولكش.