مارينا المصري تكتب: دراما كوين (27)
زي ما في جمل من المسلسلات اللي عرضت خلال شهر رمضان علقت في ودني، في كمان كلمات علقت في ودني من أغاني التترات، كمان أغاني الإعلانات اللي عرضت خلال الشهر الفضيل.
نرشح لك: مارينا المصري تكتب: دراما كوين (26)
1- أغنية “شرع السما”، تتر مسلسل أبو عمر المصري، اللي غناها حسين الجسمي، وكلمات أيمن بهجت قمر، عجبني فيها المقطع ده
“وتلاقي الصديق بقى عدو
وتلاقي الملايكة اتعدوا
والشر اللي ماسك فينا احنا اللي بنقعدوا”
2- أما في مسلسل “أيوب”، فكان تتر النهاية، اللي غناه المطرب الشاب عبده سليم، مميز جدا تحديدا المقطع ده
“وإني برغم الظلام لست ببائس.. فالفجر من رحم الظلام سيولد”.
3- ياسمين علي أبدعت في أغنية اتفائلوا بالخير، من تتر مسلسل “أمر واقع”، واللي كتب كلماتها تامر حسين، تحديدا الكوبليه اللي قالت فيه
“قوم.. قوم وعدي الصعب قوم
يوم هتضحكلك ويوم تمشي عكس معاك
وعادي ما الحياة دي يوم ويوم
واللي فهم الدنيا دي.. شالها من تفكيره”
4- نيجي بقى لمسلسل “ممنوع الاقتراب أو التصوير، وأغنية “100 صورة”، اللي غنتها الفنانة الكبيرة أنغام، وكلمات أمير طعيمة، فعجبني المقطع ده
“وبياعة ومتباعة وعايشة في دنيا خداعة
بتجبرني أغير كل يوم في قناع
أنا السكة اللي فيها نجاة وفيها ضياع”
5- أغنية “خسارة”، تتر بداية مسلسل “لعنة كارما” البي غناها آدم، فعجبني المقطع اللي بيقول
“يا خسارة يا ألف خسارة
على العشرة وعلى الناس اللي باعوا قوام
على امبارح وعلى بكرة وعلى الأحلام
وياريتنا ما قولنا سلام”
6- أما المسلسل الكوميدي “ربع رومي” فتتر البداية اللي غناه لؤي، ومن كلمات تامر حسين، كان مميز خصوصا الكوبليه ده
“ولا طول ولا عرض دي كلها شكليات
في لسد قدامك يقلب فار أوقات
الناس اللي انت بتستضعفها
هيجيلك وقت تشوفها
جامدين
والعبرة بالنهايات”
7- من الأغاني اللي حبيتها جدا، هي أغنية “كنت فين يا وعد”، تتر مسلسل “طايع”، اللي غناها المطرب وائل الفشني، واللي كلمات مقتبسة من السيرة الهلالية، مسمع جدا في ودني المقطع ده جدا.
“خسارة الحر لو داسه الزمان و رماه
ياليل ياليل ياليل ياعيني على اه
أسهر لوحدي ولا اقولش اه
ده الجرح باقي ومش هنساه”
8- تتر ليالي أوجيني، اللي غنته نسمة محجوب، من كلمات أمير طعيمة، فكانت اغنية حبي ليك، مميزة جدا وملاءمة للمسلسل، خاصة الجملة دي
“أنا مدمناك مع إني عارفة إنك طريق آخره سراب”
9- كمان أغنية “ربنا يعلم”، من تتر نهاية “نسر الصعيد”، اللي كاتب بصوت أحمد شيبة، وكلمات رضى المصري، فعجبني المقطع ده
“يوم ما هفتح الدفاتر مش هخلي لحد خاطر
واللي عنده حساب يجيبه.. وحقي هاخده ومش هسيبه”
10- من التترات اللي عجبتني بردو تتر “فوق السحاب”، واللي غناه بهاء سلطان، وكلمات أحمد بريء، وسمع معايا جدا المقطع ده
“باينة الحقايق كدبة من فوق السحاب
ويبقى الطريق واضح وبندور عليه”
أما بالنسبة ليا فعجبني جدا اغنيتين حقيقيين من وسط كل اغاني التنمية البشرية الأوفر اللي كانت في الإعلانات، هما أغنية إعلان بهية، اللي غناها وليد سعد وكتبها أمير طعيمة، وأغنية إعلان “طلعت حرب راجع” تقدر، اللي غناها محمود العسيلي وأحمد عدوية.