دعاء فاروق دفاعًا عن بوسي شلبي: اتقوا الله - E3lam.Com
إسراء إبراهيم
أعربت الإعلامية دعاء فاروق، عن استيائها من انتقاد الجمهور المصري للإعلامية بوسي شلبي، التي كانت ضمن بعثة الفنانين التي سافرت روسيا من أجل دعم المنتخب المصري.
نشرت “فاروق” صورة تجمعها بـ”شلبي”، عبر حسابها الشخصي بموقع التواصل وتبادل “إنستجرام”، معلقة عليها: “أحب أنوه أن بوسي شلبي دي أجدع ست في مصر ولو تعرفوا كم الخير اللي بتعمله وجدعنتها وكرمها مع الناس هتتكسفوا من نفسكم”.
نرشح لك : بوسي شلبي للمنتقدين: اشربوا من البحر
تابعت “فاروق”: ” والحقيقة أنا مشفتش في حياتي وفاء أرملة لجوزها بالشكل اللي شفت بوسي بتعمله مع محمود عبد العزيز، أنا متعودة أن الست بتروح لجوزها القرافة كل سنة مرة وممكن السنة كلها تعدى ومتروحش ومحدش يلومها إنما بوسي بتروح المقابر في إسكندرية وهي عايشة في القاهرة تزور جوزها وتقراله قرآن في كل مناسبة كانوا فيها مع بعض، رأس سنة، عيد حب، وعيد ميلاده تلاقي بوسي في المقابر عند جوزها لوحدها، مطر حر برد هي مواظبة على زيارته، وتطلع بعدها على مستشفيات تطلع صدقات جارية على روحه، بشكل متواصل”.
أضافت: “عيب على أي حد قال عليها كلمة بالسوء، دي ست محترمة ومش عالة على حد، بتشتغل زي المكوك وأهم إعلامية بتغطي مهرجانات فنية وأحداث مهمة ومفيش مهرجان عالمي مابتتعزمش فيه من مهرجان كان لفينيسيا لدبي، إلخ عشان تغطيه فطبيعي تطلع روسيا تغطي أهم حدث رياضي في العالم”.
اختتمت حديثها قائلة: “عيب تغلطوا في ست مغلطتش في حد و مأذتش حد، اتقوا الله ومحدش له دعوة بلبسها ولا شكلها خليكم في عيوبكم محدش كامل، وبطلوا تعلقوا الخيبة التقيلة على ناس مالهمش علاقة بأداء المنتخب”.