دعاء فاروق تكتب: أعجبني بيان معز مسعود
تقريبا انا الوحيدة في العالم اللي عجبني بيان معز مسعود وبالتحديد في الجزئية اللي الناس انتقدتها والخاصة بالتدرج في التدين .. بعد ما كلهم اقروا أنهم مالهمش دعوة بجوازه ومعلقوش عليه قبل كده من باب أنه أمر شخصي يخصه وباركوا له وكله تمام … سلخوه في مسألة تعريفه للحشمة وفي توضيحه بأن الإسلام نزل بالتدرج واهم شيء أن العقيدة تكون راسخة وتأتى بعدها الالتزام بالفروض بالتدريج زى الحجاب أو غطاء الرأس.
وهنا ثار الناس لدين الله الصحيح وقالوا له يا ريتك ما كنت نزلت البيان ده يا ريتك ما قلته وانت كده ذبذبت البنات والستات وكلهم ممكن يقلعوا الحجاب بسبب تصريحك المايع ده وان الحشمة لا تستقيم ولا تكتمل بدون غطاء الرأس وأن الإسلام نزل بالتدريج لكن الفروض يجب أن تؤخذ كلها كما هى وتنفذ بالكامل ومينفعش نقول اصلك ممكن تصلي الضهر والعشا ومتصليش باقي الفروض … !!!
ويؤسفني اقول انه ممكن ينفع واننا في حالات كتير ممكن نقول وماله اهم بيحاولوا وبيركعوها وان شاء الله يوصلوا لدرجة المواظبة علي الصلاة واللي بقالي عشر سنين يستقبل تليفونات الناس عالهوا ونصهم بيشتكوا من عدم المواظبة علي الصلاة وياما زوجات اتصلوا اشتكوا من تقصير ازواجهم في الصلاة ويأتي رد جميع الشيوخ الذين ظهروا معي بلا استثناء علي مر السنوات بان مش مطلوب منها أكثر من انها تصلي امامه وتدعيله ولا تضغط عليه ..
وقبل ما الشتيمة تبدأ تتكتب ليا وللشيوخ … ربنا سبحانه وتعالي قال ( وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا ) مش كل الناس بتصلي الفروض الخمس بانتظام من اول ما بيبلغوا لغاية أما يموتوا … الفرض والأصل والصح والأصح أنهم يعملوا كده … لكن هل الناس بتعمل كده ؟؟ .. هل مليارات المسلمين بيلتزموا بالخمس فروض طوال حياتهم بدون تكاسل أو انشغال ؟!
بالتأكيد مبيحصلش واللي يقول اه بيحصل أن المسلمين ملتزمين بالخمس فروض طوال حياتهم .. كداب …. طيب دول موقفهم ايه ؟؟؟ بينطردوا من رحمة ربنا ؟؟ نخرجهم من الملة ؟؟؟ نقول لهم مفيش وسط يا تصلوا الخمس فروض حالا يا نولع فيكم حالا بنار جهنم ؟؟!! ولا نفضل وراهم لغاية أما يلتزموا … نصبر عليهم والصبر مش معناه نسكت ونسيبهم وفي نفس الوقت مش معناه نعدمهم ولا نقتلهم .. سبحانه وتعالي قال نصطبر ( وفيها تأكيد لمعنى الصبر والصبر يعني الصمود لمده زمنية واصطبر فيها مدة زمنية اطول ) يعني نفضل وراهم بالنصيحة والأمر والتذكير ومنزهقش… ما كان ممكن ربك يقول اأمر اهلك بالصلاة وفقط وهنا يكون الأمر كن فيكون … ولكن الرحمن الرحيم العليم القريب والاقرب إلينا من حبل الوريد يعلم أن الإنسان اضعف من أن يكلف بشيء وينفذه في الحال وبالكامل وبالشكل المتقن الذى لا جدال فيه … فاذا لم ينفذه ولم يصل لمرحلة الكمال لا ينتقم منه رب العالمين في الحال ويعطيه من الفرص الكثيرة للتوبة ويعطيه الوقت للرجوع إليه ويعطيه الفرصة للاستغفار ويطمئنه بأنه غفور رحيم , حتى وان كان عقابه شديد (اعْلَمُوا أَنَّ اللَّهَ شَدِيدُ الْعِقَابِ وَأَنَّ اللَّهَ غَفُورٌ رَّحِيمٌ ).
نحن أمام فريقين من الناس مش هيعجبهم كلامي ولا هيرضيهم الكلام اللي انا كاتباه ده … فريق من بعض المتدينين الملتزمين اللي شايفين أن معز مسعود فرط في دينه وفي ثوابته لقوله أن الدين والفروض يمكن ان تؤخذ وتنفذ بالتدريج .. وهيقولولي روحي اعمليلك حلة محشي وهيتهموني بالجهل في أمور الدين وطبعا غيرتهم علي الاسلام هتخليهم يشتموني ويمرمطوا بكرامتي الارض لأنهم طبعا افضل واحسن واكرم واكثر تدينا وانا بدافع عن باطل وهم بيدافعوا عن الحق ودول مش هسامحهم وهاخد حقي منهم نفر نفر في الآخرة باذن الله في حالة تطاولهم ( هعمل سكرين شوت للشتايم وهحفظ اساميهم وهقول اسمهم في الآخرة واحد واحد .. انا في الحاجات دى اعيل من العيال ومش بسيب حقي ).
وفريق آخر من اللي بيقولوا علي كل الدعاه نصابين وتجار دين وما صدقوا أن معز جابهالهم عالطبطاب لحد عندهم … يا سلام من زمان بنقولكم تبطلعوا تسمعوا بتوع الدين الجداد الشباب اللي لابسين بدل أو كاجوال لبس غالي كده وعاملين فيها نجوم وبيتكلموا انجليزى !!! من زمان بنقولكم دى ناس بتاكل عيش ودى سبوبة وانتو مبتسمعوش واهو كلامنا طلع صح واللي طول عمره بيدعوا للاحتشام والالتزام والزواج من ذات الدين تزوج من ممثلة بتلبس مكشوف… امسك حرااااامي تقولش ظبطوه متلبس بيسرق وهو طول عمره بيقول السرقة حرام … ( هو قال حاجة من تأليفه يا خواننا ؟!!! هو قعد مع نفسه الف الحديث بتاع اظفر بذات الدين تربت يداك ؟!!! ) واحد عنده قدره علي توصيل المعلومة بشكل جيد ووصلها صحيحة كما جاءت في كتب السنة … انا مال اهلي هو نفذها ولا مانفذهاش ؟!
الناس ماشية زى المساريع يندهوا في الأبواق والميكروفونات على صفحاتهم الحقوا ده بيعمل عكس اللي بيقوله فانتو بقي متعملوش اللي بيقوله وانتو غلطتوا انكم مشيتوا ورا كلامه من الاول !!!! يا سلام عبط احنا يا عصام !!! اصلهم بيملونا نعمل ايه ومنعملش ايه من كتاب فن اللامبالاه !!! مش كتاب الله وسنة رسوله … هو قال ايه مش موجود له أصل في الكتاب والسنة ؟؟!!!! واللي مش عاوز يعمل بالكتاب والسنة محدش ضربك علي ايدك .
الناس دول هم نفسهم اللي كارهين بتوع الأزهر وطول الوقت بيتكلموا عن عقم وجمود الرسالة اللي بيقدموها وعاوزين تجديد في الخطاب الديني ولما حصل شوية تجديد في طريقة توصيل المعلومة وانا هنا اتحدث عن الثوابت التي يوصلها الجميع ولا يختلف عليها رجال الدين كافة ( ماليش دعوة بإرضاع الكبير ونفس نوعية الأحاديث ) هناك من يوصلها بالطريقة التقليدية وهناك من تحدث بلغة الناس البسيطة وهناك من عمل دراما لتوصيل نفس ذات المعلومة الثابتة ولكن بطريقة ربما اسهل في التوصيل … وهو نوع من التجديد .. فحينما فعلوا ذلك سلخوهم وقالوا عليهم بتتكلموا علي الزهد ازاى وانتو لابسين ماركات !
المهم أن الكلام في الدين بشيوخه بدعاته مش مالي دماغهم اساسا وضاربين به عرض الحائط وبيحترموا الحريات البعيدة عن الدين تماما بما فيها حرية الإلحاد وحرية المثلية الجنسية وحرية شتم البخاري والأئمة الأربعة وحرية ازدراء الأديان وحرية شتم اي حد باقذر الألفاظ بس اهم حاجة هم مش مع حرية رجل دين حب واحدة مش محجبة وتزوجها !!!….. لا دول زفوه بيها وماشيين يلسنوا ويعملوا فيديوهات واللي ما يشترى يتفرج ( مع العلم أن معز بيقول أنه مش رجل دين خالص وبالرغم أنه باحث له ثقله يناقش اكبر العلماء المروجين لفكر الإلحاد في العالم إلا أنه قرب ينافس تامر حسنى وهيعمل حفلات وكليبات عشان يبعد عنه التهمة النكراء دى ) …
لست اكتب للدفاع عن شخص معز مسعود هو بيتكلم كويس قوي وعنده من المفردات والحجج اكتر منى بكتييييييييير قوى و يقدر يدافع عنه نفسه … انا ارد علي وجهة نظر مرعبة مخيفة يتمتع مروجوها بجمود وصلف وتكبر وتعالي أقرب لوجهة نظر حاخام يهودى يلتصق بحائط المبكى ويناقش المسلمين في حقهم في المسجد الاقصي … انتم تحتكرون الصح المطلق وترفضون النقاش ولا تسمحون بمساحة في التنفس ..تسدون كل فتحات التهوية الممكنة لسجين سجنتوه بسبب فعلته الشنعاء التى فعلها في النور وعلي سنة الله ورسوله .. بتباركوله وتكتبوا هو حر يتجوز اللي هو عاوزه والجملة اللي بعدها تقطيع فيه وفي زوجته وفي وجهة نظره وقد تكونوا ممن يفعلون ما هو ابشع وافدح ( احنا نعيش بالطول والعرض والميل عادي بس اي حد يتكلم في الدين يتسلخ في الدنيا ويتعلق من رجليه !!!
هو أو غيره من رجال الدين هيتحاسب عن افعاله طبعا زي حضرتك بالظبط هتتحاسب عن افعالك برضه … ربنا هيحاسبه اكتر منك عشان قال في كتابه الكريم ( يَا أَيُّهَا الَّذِينَ آمَنُوا لِمَ تَقُولُونَ مَا لَا تَفْعَلُونَ (2) كَبُرَ مَقْتًا عِندَ اللَّهِ أَن تَقُولُوا مَا لَا تَفْعَلُونَ ) ؟؟؟؟ ربك بقي اللي عالم بالنيات وبما قال وبما فعله مما قال .. ربك هو اللي عنده الميزان مش انت اللي توزن وتقرر ده عمل زى ما بيقول ولا معملش … ربك هو اللي بيسامح وبيغفر وعنده خزائن من الرحمة ماولاش حضرتك عليها لأنك بخيل جلدة مش هترحم حد زى ما بتعمل كده وبتقف للناس عالهفوة والغلطة وانت فيك العبر ولو كنت مكانه كنت هتتمنى الناس ترحمك وتسيبك في حالك بس الناس معندهاش رحمة بحد
قُل لَّوْ أَنتُمْ تَمْلِكُونَ خَزَائِنَ رَحْمَةِ رَبِّي إِذًا لَّأَمْسَكْتُمْ خَشْيَةَ الْإِنفَاقِ ۚ وَكَانَ الْإِنسَانُ قَتُورًا ) … اخيرا … التدرج في الدين مش سبه يا رب نتدرج ونوصل للدرجات العلا … يا رب نفضل نتدرج لغاية ما نموت مانقفش عند نقطة ونقول انا كده تمام قوى ومفيش فيا غلطة ونرمي اللي بيحاولوا يتدينوا بالطوب ونضحك ونستهزا بيهم ونشاور عليهم ونقول اخص دي مش لابسة اخص ده مش بيصلي اخص ده مش مؤمن وانا كلي ايمان وتقوي !!!!!! ولو انت كلك تقوي مش هتشاور علي حد من أصله ولا هيشغلك تصرفاته لأن التقى ينشغل بنفسه وبافعاله ولا يشغل نفسه بافعال الآخرين … محدش فينا كامل في الدين كلنا خطاؤون وخير الخطائين التوابون … اللهم اغفر لنا واهدينا وارحمنا وارزقنا حسن الخاتمة ..