محمد دياب يعلق على انتقادات إسلام بحيري لمعز مسعود - E3lam.Com

إسراء مجدي

علق المخرج والمؤلف محمد دياب، على انتقاد الباحث إسلام البحيري لمعز مسعود، بسبب البيان الذي نشره الأخير يرد فيه على الانتقادات والتساؤلات التي أُثيرت حوله بعدما أعلن زواجه من الفنانة شيري عادل.

قال “دياب” عبر صفحته الشخصية بموقع التواصل الاجتماعي “فيسبوك”، “بما إنيّ تم الحفيل عليا قبل كده فعارف إن الرد على الكلام اللي بيتقال وقت الموجة عبث، ورغم كدة بما إنيّ شاهد على كلام معز عن خطوات الشيطان بما إنيّ من مؤلفينه فكلامه صحيح و دقيق”.

إسلام بحيري يرد على معز مسعود

تابع: ” خطوات الشيطان كان البرنامج الدرامي الوحيد اللي اتكلم عن إرهاصات الإرهاب سنه ٢٠١٣ و ٢٠١٤، وكلمة الدرامي تعني اللي كان على شكل مسلسل، وصناعة المسلسل اللي نزل ٢٠ يوليو ٢٠١٣ خدت قبلها ٧ شهور ما بين كتابة و إخراج و ده يعني أن الأفكار المطروحة مقررة من اكتر من ٧ شهور مش زي ما الأستاذ إسلام فاهم إنه مشي مع الموجة بعد ٣٠/٦”.

أردف: “البرنامج عُرض بعد ٣٠/٦ بأيام، والدنيا كانت مولعة و فضلت مولعة سنين، ورغم كده عملنا موسم تاني اكتر جرأه و طبعًا بسببه كان بيجي تهديدات وأنا شاهد على إن معز ساب مصر بسبب التهديدات دي”.

أضاف: “.واضح طبعًا أن الأستاذ إسلام غيران إن فيه حد تجرأ ودخل ولو من بعيد و قال إنه تضرر بسبب أحداث البلد غيره، ومسمي الكلمتين دول بتوع معز سطو على بطولات الشعب المصري اللي هي بطولاته يعني، وعلى فكرة الأستاذ إسلام وقتها فعلًا كان شجاع ودي حاجه تحسبله، ولكن المفروض إنك باحث و بتحلل التراث و تيجي بوضوح تلوي دراع كلمتين واضحين وتحللهم على هواك، ده يخليك يا متعمد تغالط يا مبتعرفش تحلل وتستخلص من الكلام الواضح مع إنها المفروض شغلتك، مش عارف مين فيهم أوحش؟”.

اختتم “دياب” حديثه موجهًا كلامه إلى إسلام البحيري قائلًا: “حقك تنتقد اللي عاوزه في آراء و تصرفات معز أو غيره، بس من غير تدليس للحقائق وعامة أوعدك لما هتجيلك وقعة وتلاقي موجه التشييل عليك مش هتلاقي من واحد زي معز غير الانصاف وحسن الظن، لأنه إنسان محترم ومن أحسن الناس اللي عرفتهم في حياتي”.

يُذكر أن الباحث إسلام بحيري، كان قد انتقد البيان الذي أصدره الداعية معز مسعود أول أمس، متهمًا إياه بالكذب فيما قاله، كما وصفه بأنه كان أحد أذرع الجماعات الإسلامية.