مينا فريد: جوائز الريموت الذهبي
كل أسبوع بيبان في إعلامنا أبطال للمشهد فيهم أبطال بجد و فيهم أبطال فشنك في مهرجان كبير إسمه الميديا .. لهذا رأيت أنه من الواجب إعطاء جوائز ساخرة غير محايدة و غير موضوعية– الله يمسيك بالخير يا باسم – تعبر عن رأي كاتب المقال فقط واخترنا لها اسم جوائز الريموت الذهبي على أن نكرر التجربة في حال نالت إعجابكم..
جائزة أفضل سيناريو لفيلم رعب
لرئيس جامعة الأزهر عن تصريح: الطالب اللى هيحرق هطلع دماغه من جسمه وهحرق كبده .
جائزة الأسبوع
لصاحبة فرحة الذكريات .. فرحة الحكايات في قعدة بيتي هادية .. أشيك و أطيب روح مبهجة ..اللي بتدخل كل بيت زي نورالشمس لما بنفتح الشبابيك في صبح يوم جميل …
إسعاد يونس و برنامج صاحبة السعادة على سي بي سي.
جائزة التمثيل
لبرنامج أسرار من تحت الكوبري في قناة القاهرة و الناس لطوني خليفة و ضيفه الشناوي عن حلقة الراقصة براديس .. طبعا هما بيكرهوها و هي مثال سئ للفن بس عملوا فقرة كاملة في حلقة عنها مش عشان الإعلانات و لا الأجر لا سمح الله بس عشان يقولوا للناس ماتشوفوهاش .. و يخلوها ماتتشهرش …حضرتك عرفت إنها وحشة ؟الأستاذ اللي ورا عرف إنها وحشه ؟ حضرتك عرفتي إنها وحشة ؟ و هو ده المطلوب برافو كان أداء مقنع جدا .
جائزة أفضل تريلر
لتريلر برنامج بلاد الفرنجة للثلاثي شيكو و أحمد فهمي و هشام ماجد على قناة النهار .. الأفكار مش بتخلص لعقول مجتهدة مستعدة تجدد .. متوقعين برنامج جامد جدا .. بالتوفيق.
جائزة أفضل اقتباس
لمنى الشاذلي و برنامج معكم منى الشاذلي على سي بي سي عن أغلب أفكار البرنامج المقتبسة من صاحبة السعادة.
جائزة – كان فيه حاجة إن شاء الله ؟- بصوت هنيدي في مسرحية ألابندا:
لمعتز الدمرداش و برنامجه أخطر رجل في العالم على إم بي سي مصر ومن مكاننا ده نحب نقوله .. هو البرنامج مش خطر غير على بعض الأجزاء في الجسم بس.
جائزة أفضل مذيع
خيري رمضان و برنامج ممكن على سي بي سي .. كان رائعا في حلقة المناظرة.
جائزة أرذل دعابة:
للسيد وزير الثقافة عن تعليقة على وزن السيدة الفاضلة… التي بدورها فازت بجائزة أرشق رد عن ردها الشجاع عليه . و من موقعي هذا بقوله من فضلك ما تهرجش تاني . لإن شباب مصر بيعرفوا يهرجوا كويس أوي .
اقرأ أيضًا: