حازم ضياء الدين يكتب: غير مبادئك واعمل شير
غير مبادئك واعمل شير
جملة صادمة..
خرمت وداني وأنا قاعد على القهوة
وسط أصوات كركرة الشيشة وترزيع الطاولة والدومينو علي الترابيزات.. سؤال سرمدي نفسي اعرف إجابته
ليه الناس بترزع القواشيط علي الترابيزات ؟؟؟..
من شابين بيتكلموا مع بعض
وحواليهم سحابة من دخان الشيشة
الحقيقة معرفش بيعملوها ازاي؟ وهتجنن واعملها
واضح إنه إحساس جميل إنه تكون مدخنة..
لكن دا موضوع تاني نشوفه بعدين ..
من فضولي رميت وداني وسطهم
قلت افهم إيه الموضوع
شاب 1: يابني اسمع كلامي
شاب 2: انسي يا معلم مش أنا
شاب 1: محسسني إني بقولك ننضم لشبكة جاسوسية
دا نادي وماتشات
شاب 2: مقدرش.. هحس إني ماليش قيمة
شاب 1: يا بني احنا هنشجع نادي.. هو إحنا هنعمل إيه يعني؟؟
شفطت شفطة شاي جامدة.. واتخذت القرار بالتدخل
قلتلهم ممكن اتدخل؟
أنا سمعت كلامكم دون قصد (ربنا يسامحني علي الكذبة دي)
شاب 2: اه طبعا اتفضل (واضح إنه لقى في تدخلي فرصه للهروب من زن صاحبه)
واضح من اللي سمعته منكم إن في نادي جديد بيدور علي جمهور
شاب 1: هم فعلا اشتروا الإدارة والجهاز الفني واللعيبه وبيدورا علي الجمهور
شاب 2: دول عايزينا نغير مبادئنا ؟؟!!
رديت بمنتهي العنف: نغير مبادئنا؟؟!!!
بصيت لشاب 1 بصه عنيفة.. معرفش ازاي بس هي المفروض عنيفة
نادي جديد بيشتري جمهور وإدارة ولعيبه
شعاره غير مبادئك؟!
صاحب النادي دا
هو متخيل إن المبادي انقرضت في مصر؟!
هو متخيل إن القيم انهارت والأخلاقيات انعدمت
المبادئ جزء أصيل لا يتجزأ من تكوين المصريين
مش علشان كسالي مش بنشتغل
ولو رحنا الشغل مش بنشوف شغلنا أصلا
وبنشتكي لبعض من قله الضمير يبقي نغير مبادئنا ؟!!
إحنا يا محترم وبلا فخر
بنتجوز وبنخلف علشان الحكومة تشيل شيلتها
احنا اللي لما نعمل مصيبة نقول وبمنتهي الورع.. ربنا عايز كده
ولو بالصدفة عملنا حاجه صح نبقي عباقرة ونذيع الأغنية الخالدة
والله وعملوها الرجالة
احنا اللي بنستلف علشان نجيب موبايل أحدث موديل مش فاهمين 90% من إمكانياته بس مش مهم هو إحنا هنستخدمها في إيه أصلا ؟؟؟؟!!!!!
واه بقي لما نوصل للكبيرة
يا أستاذ يا فاضل ..
احنا بنسوق عربياتنا بطريقة عشوائية معتمدين علي منهج (سابق ولاحق) التعليمي المنهجي
لأن لنا السبق العالمي في اختراع مناورة عسكرية تدرس عالميا
اننا نرمي يمين علشان ندخل شمال فنقفل الطريق?!!
وطبعا لأننا بنشتكي من ظلم شرطة المرور اللي بتسحب الرخص لما نمشي عكس الاتجاه في ظاهرة قومية تستحق الدراسة
( في دول بتتعامل مع مرتكب هذه المخالفة علي إنه مختل عقليا)
فالداخلية بلطجية
كل دا مش مهم
المهم إن
المبادئ يا محترم لا تتجزأ
مش معني إن إحنا عندنا مبادئ الفهلوة وأشطر من يخترع ثغرات للقانون في كوكب الأرض إن حضرتك تيجي تقول غير مبادئك ؟؟!!
خلصت الخطبة العصماء
واكتشفت إن الحماس اخدني ولقيت نفسي واقف وكل اللي في القهوة باصين ليا وصمت رهيييب ( مصطلح صوت صرصور الحقل اتحرق كتير. محتاجين واحد جديد)
رد شاب 1 عليا: بس دول هيدوا العضو 3000 جنيه شهريا مرتب ثابت
بعد حوالي نص ساعة من طابور الانتظار أخدت موبايلي من شاب 1 بعد ما عملي شير ونفذت شروط التسجيل في النادي
….ومشيت