عمرو قورة يكتب: صلاح ليس هو صلاح
انتهت قبل قليل مباراة بين ليفربول وليستر سيتي… وكان واضح من بداية المباراة أن صلاح مش مركز ومش كويس … وفعلا تم تغييره بعد ٧٠ دقيقة…ليه؟ لأنه مش مركز و مش في حالته الطبيعية.
نيجي لمشكلة صلاح الأخيرة مع اتحاد الكرة… الموضوع ببساطة إن صلاح اتخانق مع أعضاء الاتحاد بيسبب المساخر اللي حصلت في جروزني… وكمية قرايب المسئولين اللي كانوا سارحين في الفندق للساعات الأولى من الصباح… لدرجة إن اللاعبين كانوا بيناموا في السادسة صباحا… وحصلت مشكلة كلنا فاكرينها، وتم الطرمخة عليها لأن اتحاد الكرة عامل “حجاب” بيخليه دايمًا مستمر بالرغم إنهم بيعملوا شغل أقل ما يمكن القول عنه إنه شغل بلدي من أجل الخروج بسبوبة أو حتى بخدمة لأشخاص مهمين في الدولة طمعا في منصب أو محاباة.
نرشح لك: شاهد: تعليق أبو تريكة على أزمة محمد صلاح مع الجبلاية
وكلنا نتذكر المؤتمر الصحفي الكوميدي الذي أقامه إتحاد الكرة لما وقف كابتن مجدي أمام العالم يقول أنا مش حرامي فانلات وضاع الموضوع في كلام عبثي وأحرجنا أمام العالم كله.
وبما إن مصر داخلة بعد أسبوعين على تصفيات أفريقيا… فطبعا تفتق ذهن العاملين بالإتحاد الى سبوبات جديدة خلال زيارة صلاح لمصر وانضمامه لمعسكر المنتخب… ناخد صلاح عند فلان في بيته علشان عنده عيد ميلاد حمادة… أو ظهوره في مناسبة لإستغلال صورته في الدعاية لصاحب الدعوة مقابل مبالغ مالية مش بطالة للي حايظبط حضوره… وما إلى ذلك من اختراعات مصرية فرعونية لمص دم الزبون.
وبالتالي قام وكيل صلاح بإرسال تحذير شديد اللهجة للإتحاد لأنهم لم يردوا عليه أصلا ولا وعدوه بعدم إعادة العبث بتاع روسيا… فضمانا لمصلحة صلاح قام وكيله بإرسال فاكس شديد اللهجة ليحذر اتحاد الكرة من تكرار مأساة روسيا… واكتشف أعضاء الاتحاد أن السبوبة حاتضيع منهم و هاجموا الوكيل و صبوا عليه لعناتهم… وأطلقوا على صلاح المدعو وكأنه متهم بالتحرش الجنسي ضد زميلاته… وانضمت وسائل الإعلام المصرية للحرب على “وكيل” صلاح يمكن يتقمص ويمشي… وساعتها نستفرد بصلاح و نخليه نمرة من نمر الحفلات وليالي الملاح اللي كان أعضاء اتحاد الكرة مجهزينها عند قدومه.
أرجو إن صلاح يعتذر عن معسكر المنتخب أو يعمل نفسه مصاب… لأن أمثال الكباتن اللي بيسترزقوا على قفا اللاعبين يعرفوا قيمة فريقنا بدون صلاح… ويركزوا أكثر مع مدير فني المنتخب اللي قرب يتحبس في أسبانيا لأنه بيتلاعب بنتيجة المباريات.
طول ما الناس الهواة والحلنجية والمغرضين بيتحكموا في مصائر مواهب مصر… طول ماحنا حانفضل متذيليين قائمة الدول في كل شيء… لأن كابتن مجدي عبد الغني موجود في كل مصلحة وفي كل جهاز… ولو هو مش موجود… مدام عفاف اللي في الدور الرابع حاتوقف كل المراكب السايرة.
ولا تنتظروا من صلاح أي إبداع ولا أي إنجاز… فهو مصري ونحن عمالقة في تدمير الأشياء الجميلة في حياتنا… فانسوه تماما هذا الموسم طالما إن عندنا اتحاد لا يحاسبه أحد.