عمرو قورة يكتب: كيف تنتج مسلسلًا ناجحًا وبسعر مناسب؟
الحوارات الجانبية بين العاملين في مجال الإنتاج الدرامي تتناول مخاوف وقلق من تخفيض الأجور “الهلامية”، التي كان يتم دفعها للنجوم وبدون أي حساب للربح والخسارة، فيكفي المنتج فخرًا أن الفنانة لولو وقعت معه هذا العام؛ وبالتالي الأستاذ متولي اللي في القناة.. واللي المدام بتاعته بتموت في الفنانة لولو وتابعت كل أعمالها، أكيد هيشتري المسلسل حتى من غير ما يعرف الموضوع، المهم إنه لازم يظهر بمظهر البطل أمام رؤسائه وأولهم المدام، إنه ظفر بتوقيع تلك النجمة الجهنمية على قناته قبل غيره، ويتبعها صورة على الفيسبوك تجمع المنتج والأستاذة لولو في صورة ينشرها المنتج على الفيسبوك، وتقتبسها المواقع وتقول انفراد، النجمة لولو توقع مع المنتج شوكت بيه مسلسل عام ٢٠١٩.
ومنذ تلك اللحظة، ما بين الأجر المبالغ فيه للنجمة، اللي فاهمة كويس قوي إن الأستاذ متولي بتاع القناة رايدها، فبتطلب أجر خيالي، والمنتج مدام بايع المسلسل هيدفع، ومش مهم نجح أو فشل.. فهناك أشخاص على أتم الاستعداد لكتابة مقالات وهمية عن نجاح مسلسل الفنانة لولو الساحق وإنها من أكثر الناس متابعة على اليوتيوب (المفترى عليه من قبل المصريين)، ويلقبوها بفاكهة الدراما أو شوكولا جلاسيه الفن، والباقي إنتوا عارفينه… سيناريو متفصل على لولو والباقيين مش مهم، القصة مش مهمة، المهم لولو تكون في أغلب المشاهد، وطبعا عايزين مشاهد بكاء، صريخ، حب، كره، خناقات، مطاردات، حوادث.. علشان تظهر قدراتها التمثيلية.
وفي النهاية يطلع مسلسل ضعيف وبيكتب عنه أشعار من طرف المرتزقة، وبالتالي الأستاذ متولي بتاع القناة هيفتكر إنه حقق نصرًا عظيما، ولا يوجد طريقة لأي مخلوق يتأكد من نسب المشاهدة الحقيقية، وفورا يتم الاتفاق مع المنتج على مسلسل العام القادم، مع العلم بأن لولو ستضاعف أجرها الموسم القادم.. ٢٠ مليون ايه.. أقل من ٣٠ مليون مش هقبل!! .. وتتوالى الكوارث والمنتج ما يقبضش من القناة لأن المعلنين ما دفعوش والمعلن طبعا دفع بس اللي دفعه راح للناس اللي بتطالب بفلوسها من ٩ سنين… وتزداد المديونية ويزداد خراب بيوت المنتجين.
تعالوا نحدد ١٠ خطوات بسيطة لإنتاج مسلسل أقل تكاليفًا وصداعًا
١- السيناريو والموضوع أهم من النجم أو النجمة، وواضح إن السبكي الذي أنتج لمحمد رمضان ودفع ملايين، لم يجن الثمار المتوقعة، ولا أحد يستمر نامبر وان إلا بتقديمه لأعمال متميزة كل عام، فأهم نقطة في الموضوع ما تتصلش بالنجم الأول، في التلفزيون الموضوع أهم من النجم… فسيبه لغاية لما تتفق مع الكاتب والمخرج.
٢- عند عرض الفكرة على الفنانة لولو لازم تفرض شروطك كمنتج، النجم لا يتدخل في السيناريو.. والأهم النجم حياخد ٥٠٪ من سعر العام الماضي (أنا أتكلم عن النجوم اللي بتقبض ١٠ مليون فما فوق.. ولو مش عاجبه / عاجبها.. أي ممثل آخر حاينجح المسلسل لأن الموضوع هو البطل الحقيقي).
٣- انتهي من كتابة جميع الحلقات قبل التصوير، فالتوفير من معرفة كافة المواقع وعدد الأيام مع كل ممثل ستمكنك من تخفيض التكاليف تقريبا بـ ٢٠٪.
٤- سيطروا على عدد الفنيين الموجودين في لوكيشن التصوير، فمدير الإنتاج يساعده أخوه وابن أخته وابن عمته والجيران، وضعوا سقف للعدد، الكرو اللي في لبنان بيطلع في أي تصوير عدد أفراده ٢٥٪ من عدد أفراد العاملين في الكرو المصري، إنتوا بيتم استغلالكم من قبل بعض الفنيين … فيجب وضع سقف وعدد وقيمة لكل هؤلاء.. مش العدد في الليمون وتدفع وجبات أكثر ومواصلات أكثرمن الأجور في النهاية.
٥ – اشتري معداتك.. فالعرف جرى أن يطلب مدير التصوير طلبات معجزة ويركن كل اللمبات والمعدات جنبه يمكن يحتاجها، ده بيكلف حضرتك ضعف ميزانية الإضاءة وش، معداتك في مخزنك وهو ده اللي موجود، بلاش تناكة يا فنان واشتغل بما هو متاح أو لو حاجة مهمة جدا نأجرهالك من أجل عيون المسلسل.
٦- أوجد ستوديو مونتاج متحرك مع الكرو… وكل مشهد يتم المونتاج فيه بعد تصويره… و يراه المخرج في نفس اليوم و يبدى ملاحظاته … حاتوفر ٥٠٪ من قيمة المونتاج
٧- حضرتك بتشتري كام وجبة في اليوم؟ ٤٠٠؟ لو قلنا ٤٠٠ في ٤٠ جنيه آدي ١٦ ألف جنيه، واضربهم في ٩٠ يوم تصوير يعني مليون جنيه ونصف تقريبا في المسلسل. والمستفيد الأوحد هو كنتاكي أو أبو شقرة، لو إنت اشتريت عربية نص نقل و عملتها مطبخ متنقل هتوفر ٥٠٪ من المبلغ ده، وجيب واحدة لذيذة تطبخ أكلة مختلفة كل يوم، الناس حاتنبسط.
٨- المخرج محتاج مراقبة… أنا أعرف مخرجين من فرط عدم ثقتهم في نفسهم بيعملوا ٣٠ لقطة لنفس المشهد.. وغالبا في المونتاج بيختار واحد من أول ثلاث لقطات…فليه تضييع الوقت لو المخرج مش واثق من نفسه، غير المخرج فورا.. ده كارثة.. في المسلسلات الأمريكية لو تعدت الإعادات ٤ أو ٥ إعادات بيعملوا اجتماع طاريء مع المخرج لأن أكيد فيه مشكلة.
٩- الإعداد الجيد يوفر نقودا كثيرة…ولو كنا جاهزين وعملنا بروفة واتنين وعشرة قبل التصوير حاييجي الممثل يعمل شغله بسرعة… الفنان اللي مش حافظ هو يكلفك حوالي ١٠٪ من أيام التصوير ضايعين…اللي مش حافظ دوره يتخصم منه ١٪ من أجره… حتلاقيهم حافظين و صامّين كمان.
١٠- إنت الكل في الكل لأن كتابنا لآ يستطيعون إدارة المشروع، فافرض شروطك وضع جدول يناسبك.. لو اتأخر الكرو عن الجدول يتخصم منهم، وفي نفس الوقت يجب أن ينتهي أي يوم تصوير في ١٢ ساعة بالكثير، لأن تأخيرك في أوردر يؤخر ما بعده وما بعده فيتخرب بيتك على نهاية المسلسل، ناهيك عن الإرهاق الذي يؤدي إلى الكروتة.
أتمنى أن أكون ساعدت إخوتي المنتجين والمنتجات في تخفيض حوالي ٤٠٪ من قيمة الإنتاج.. ولو مش مصدقين جربوا.. هتدعولي.