أحمد عبد العليم قاسم يكتب: حكايتي مع الكينج والنيل
هو ليه اسمه الكينج؟
• فكرت كتير ليه سموه الكينج قلت يمكن عشان عمل مسرحية المك هو الملك وأغانيها اتحفرت في الوجدان والا عشان هو الوحيد اللي غنى للوطن كما لم يغني أحد قبله ولا بعده، ويمكن عشان غني موضوعات محدش فكر فيها فغني ( جدو يا طيب ) ( شجر الليمون ) ( قلبي مساكن شعبية ) وحاجات تانية كتير وفكرت تاني لقيته لما قال يا سينما راح للعالمي يوسف شاهين وعمل معاه تاريخ فني لا ينسى، الخلاصة هو كينج بقناعة اجيال مختلفة يبقي كينج مهما كانت الأسباب.
لما تشوف الكينج فتتلخبط وماتصدقش نفسك !
• أذكر أن أول لقاء لي مع الفنان محمد منير كان في الأوبرا عام 1999 تقريبا، وكان خارج من المسرح الكبير ورايح عربيته جريت عليه وطلبت رقمه ومن هول الموقف عندي كتبته غلط 3 مرات، وهو كان عنده صبر يعيده 3 مرات وسلم عليا ومشي.
النيل الدولية وحلم الموسيقي ؟
• في عام 2001 كنت باقوم بإخراج وإعداد برنامج اسمه TUNE UP علي قناة النيل الدولية NILE TV، وده كان برنامج موسيقي يهتم بصناع الموسيقي في مصر ملحنين وموزعين وشعراء ومهندسي صوت ومطربين وفرق غنائية وجمال البرنامج ده بالنسبة لي كان فرصة أني التقي عمالقة في الموسيقي ربما لا يعرف الكثير منهم الجمهور، وهي هواية شاركني فيها أخي المخرج عمرو عبد العليم منذ ألبوم شارة للنجم حميد الشاعري وأنا في تانية ثانوي إنك لازم تعرف مين صناع الأغنية وقت أن كان غلاف الألبوم هو المصدر الوحيد لهذه المعلومة، ومن هنا كان أحد أحلامي هو لقاء مبدع أغاني الكينج بكار وبرج حمام وغيرها الملحن والموزع الرائع عمرو أبو ذكري.
عمرو أبو ذكري وش السعد مفتاح الكينج؟
• لقاء الموزع الموسيقي عمرو أبو ذكري كان مفتاح الكينج دون أن أدري فبمجرد أن دخلت الاستوديو الخاص به للإعداد لحلقة برنامجي قبل تصويرة بأيام، طلبت منه اسمع الحاجات الحصرية اللي ماتسمعتش ولقيته بيسألني شفت فيلم البحث عن توت عنخ آمون قلتلة طبعا وسمعتله الأغاني ليلة واحدة والنيل ولا بيوصل وقلتله لحنك حلو اللي وزعه الموسيقار عمر خيرت، فقاللي طبعا أنا يشرفني أن الموسيقار الكبير عمر خيرت يوزع ألحاني لكني زعلان عشان أغنية النيل ولا بيوصل دي بالذات مانزلتش كاملة، وكمان كان فيه وعد من المخرج يوسف فرنسيس إني أعمل أول موسيقى تصويرية لفيلم في حياتي لكنه لم يتحقق !
النيل ولا بيوصل وتحدي الخروج للنور
• قلت لعمرو أبو ذكري بس الأغنية دي حظها حلو إنه رغم عدم ظهورها كاملة في الفيلم نزلت في ألبوم كاسيت قال لي ما هي دي المشكلة التانية إنها نزلت في الفيلم ناقصة، ونزلت في الكاسيت بدون مكساج ! وهنا كانت لحظة أجمل هدية موسيقي جاتلي في حياتي لما قال لي النسخة اللي هتسمعها دي هي الأصلية اللي ما سمعهاش حد وفعلا سمعت تحفة فنية كلمات الشاعرة المبدعة كوثر مصطفى، وقال لي لو عايز تصورها ممكن اكلم لك منير حالا، قلت له هو ده سؤال يا ريت فورا وما صدقتش إن منير وافق في نفس اليوم !
رحلة الستة محافظات من أجل النيل ولا بيوصل
• شاءت الظروف إني كنت مكلف بالسفر مرتين من رئيس القناة وقتها الناقد السينمائي العالمي يوسف شريف رزق الله؛ مرة الأقصر في يناير 2001 ومرة تانية أسوان فبراير 2001 وجهاز الووكمان سي دي معايا مخصوص باسمع الأغنية ومعايا المصور محمد كرم، وإحنا في مركب بنصور وإلهام ما بعده إلهام وبعد ما رجعت استمرت رحلتي مع تصوير النيل في التقاء النهر والبحر في رشيد والنيل في القليوبية والقاهرة والجيزة، لغاية ما اكتمل كنز الصورة عشان يتحول الموضوع من أغانية إلى أغنية + فيلم اسمه النيل للأبد كتبته الزميلة العزيزة منى عمري، وقرأ التعليق الإعلامي ياسر عبد الحكيم لتبدأ رحلة الفيلم والأغنية للمشاركة في المهرجانات.
النيل ولا بيوصل والذهبية التاريخية
• في عام 2002 رشح اتحاد الاذاعة والتليفزيون أغنية النيل للمشاركة في مهرجان أوسكار الفيديو كليب الثالث، وحصدت جائزة الأوسكار في المهرجان ثم في عام 2003. تم ترشيح الأغنية والفيلم للمشاركة في مهرجان الإعلام العربي التاسع، ومع مشاركة العديد من الأغنيات عالية الإنتاج علي مستوى الوطن العربي، من بينها رائعة العالمي الهضبة عمرو دياب “حبيبي ولا علي باله”، الأمر الذي أصابني بقدر من القلق، حيث أنني أنتجت أغنية دون انفاق شيء تقني زائد، حيث أن الأغنية كلها تصوير لطبيعه النيل من زوايا ممميزة في أوقات متنوعة دون استخدام لمبة إضاءة واحدة، ويبدو أن هذا الأمر هو ما جعل لجنة التحكيم وقتها تمنحني أجمل خبر في حياتي وهو ذهبية مهرجان الإذاعة والتليفزيون عن أغنية “النيل ولا بيوصل” للمطرب محمد منير، إخراج أحمد عبد العليم قاسم، وهو الأمر اللي خلاني اتصل بالنجم الكبير قبل تسلم الجايزة بساعات لأفرح معه بالخبر فوجدته في ألمانيا ولقيته بيقوللي أنا حتي لو في مصر عايزك انت برضه اللي تستلم الجايزة، لأن الغنوة دي اللي كان نفسي توصل للناس بعد ما الفيلم وألبوم الكاسيت ماخلوهاش توصل زي ما تمنيت !
النيل الدولية ربع قرن واليوبيل الفضي !
• في العاشر من أكتوبر 1993 ظهرت إلى الوجود قناة النيل الدوليةNILE TV وتحتفل القناة بعد أسابيع باليوبيل الفضي 25 سنة وربع قرن من إرسال صوت مصر للعالم بلغته، ويتصادف أن نفس اليوم هو عيد ميلاد الكينج محمد منير واللي كان وش السعد علي القناة أيضًا عام 1996 لما حققت أول جايزة في مهرجان الإذاعة والتليفزيون، عن أغنية “يا ليلة عودي تاني” للمخرج حامد سعيد، وسط اهتمام بالغ من الاستاذ حسن حامد مؤسس القناة والأب الروحي لكل القنوات التي حملت اسم النيل وأولهم قناة النيل الدولية NILE TV، وده هايكون اسم المقال القادم في رحلة ربع قرن مع الإعلام بدأت مع الاستاذ حسن حامد وسيكون مفتاح حكايات قادمة في رحلة الربع قرن معاناة وإبداع !
