مينا فريد : أشهر 15 إشتغالة لمشاهدي الدراما المصرية
قبيل الدراما الرمضانية القادمة هناك نقاط كل ذي عقل يعلم أنها غير منطقية … حاولنا تجميعها لك من تعليقاتاتنا جميعا في جلسات البيوت و القهاوي و مواقع التواصل الإجتماعي …
خلينا نبدأ …
-مفيش أي أنثى سوية بتنام و هي حاطة مكياج كامل … أو بتصحى و هي حاطة مكياج كامل أنا عارف إنك نجمة و كل حاجة بس شوية إقناع عشان تفضلي نجمة .
-مفيش حد أبدا بينزل من العربية بعد ما يركنها و مايقفلهاش . حضرتك المدينة الفاضلة مش مكان تصوير المسلسل ده أكيد.
-حركة تطويل المسلسل بإننا نعرض فيه فرح كامل إتهرست من أيام مسلسل عبد الغفور البرعي.. عاوزين تطولوه طولوه بشوية إقناع .. مثلا البطل يفضل حلقتين يدور على ركنة و يخوض معركتين تلاتة مع السايس و معركة مع حد حاطط حديد قدام بيته.. وكده.
-مفيش مدير شركة بيدخل الشركة يصبّح على الموظفين و يقوموا يقفوا لما بيدخل .. يافندم الموظف من دول بيبقى حاطط الهيدفون في ودنة لو بيشتغل.. أو ماسك موبايلة و باصص فيه .
-والله العظيم مفيش مهندس في الحياة لسّه بيشتغل على ترابيزة هندسية و مسطرة و مثلثات … مش معقول مفيش أي كائن حي واخد باله إن آخر مرة حد إستخدم مسطرة و مثللات كان سنة 1995 . دلوقتي فيه أوتوكاد و ماكس و برامج كتير بس كلها محتاجة ماوس مش مثلث و مسطرة .
– مفيش محفظات قرآن بيلبسوا جيبات قصيرة و مش محجبات غير طبعا الفنانة رانيا يوسف .
– مفيش حد بيكلم حد فيديو عن طريق الميديابلاير .. الناس بتكلم بعضها فيديو بالسكايب .
– مفيش دكتور بيكشف على ست و يقولها مبروك المدام حامل كده من غير تحاليل.
– مفيش إسرائيلي بيتكلم كل كلامه عربي ماعدا كلمة شالوم اللي مش عارف معناها بالعربي. مفيش خالص بجد.
– حضرتك لما حد بيغتصب حد مش بيهتم أوي يبوسها.. بيتهيألي الرفاهية الرومانسية دي مش هتبقى موجودة في اللحظة الهباب دي.
– مفيش ست بتلبس الحجاب في البيت قدام جوزها غير مدام حنان ترك و مدام هالة فاخر.
– فيه مشروبات كتير ممكن تتشرب في أي كافيه غير اللمون و المانجة … مش معقول ولا واحد وواحدة قعدوا مع بعض في قعدة رومانسية و فكروا يشربوا ميلك شيك أو ياكلوا وافل فراولة أو يشربوا حتى هوت شوكلت .. محتاجين تظبطوا المينيو في السيناريو.
– على فكرة فيه ظباط شرطة معندوهمش شنب … تخيّل ؟
– حضرتك دايما بيبقى فيه مدة زمنية بين الإتصال و بين حد يقول ألو .. مش بتتصل و بعدها ألو .. فيه وقت لازم لتررن تررن و كده.
– كتير جدا الكهربا بتقطع و الناس قاعدة سوا … مش معقول مفيش مسلسلات بتقطع فيها الكهربا خالص … شوية واقعية يا جماعة من فضلكم.
و بكده خلصت النقط اللي عندي .. تقدروا تضيفوا ليها اللي حابينه أكيد فاتت عليا حاجات .