أيتن عامر ترد على انتقادات حلقتها مع منى الشاذلي
هبة الله حسين
علقت الفنانة أيتن عامر على منتقدي حلقتها مع الإعلامية منى الشاذلي والتي أذعيت مساء أمس، من خلال حسابها الرسمي على موقع تبادل الصور والفيديوهات “إنستجرام”.
وكتبت “عامر” من خلال منشورها عبر حسابها ردًا على الهجوم، قائلة: “أيوه في مشاكل أهم وأعمق من المشكلة بتاعتي اللي تناولتها النهاردة الأستاذة منى الشاذلي، ولكن خلينا نشوفها بشكل تاني ليه منقولش أن تجربتي دي ممكن تبقى حافز لناس كتير نفسها تخس وظروفها المعنوية أو المادية مش مساعدها خصوصًا أن دكتور أحمد عمر وافق أنه ينزل الأنظمة الغذائية كاملة دون أي مقابل”.
نرشح لك.. شاهد: أيتن عامر تروي قصة حبسها في “الأسانسير”
أضافت: “ليه منقولش أن دي تجربة فعلية تخلي الناس اللي بيتضحك عليها باسم عمليات التكميم وتحويل المسار وبيبقي عندهم استعداد يبيعوا دهبهم ويعملوا جمعيات عشان يعملوا العملية مع أن من الممكن منضرش صحتنا ونخش أوض عمليات ونعمل دايت وتخس ومنتكلفش كل الفلوس دي”.
واختتمت: “ليه الحلقة دي متكونش بتهون على كل واحدة لسه مخلفة ووزنها زايد، وعندها اكتئاب وبتوريها أنها مش لوحدها اللي بيحصلها كده، وأني كممثلة لا أتميز عنها بشئ سوى الإرادة وأشجعها تبدأ معايا، بلاش هجوم بلا داعي، أنا مش هقدر أحل مشاكل الكون ولا مشكلة الغلاء، لكن ممكن أكون مصدر إلهام بنات كتير واساعدهم على الوصول لحلم صغير، لأن هو ده االلي هقدر عليه، وأخيرًا يارب الحلقة تكون عجبتكوا”.
يُذكر أن الفنانة أيتن عامر حلت مساء أمس ضيفة في برنامج “معكم” مع الإعلامية منى الشاذلي عبر الفضائية”cbc”، للتحدث عن تجربتها في اتباع نظام غذائي صحي لرغبتها في إنقاص وزنها وذلك بعد الحمل والولادة.