باسم يوسف : الميديا في العالم العربي مش بتسمع للشباب - E3lam.Com
في مداخلة هاتفية أجراها مع الإعلامي محمود سعد خلال برنامج “أخر النهار” الذي يُعرض على قناة النهار، أوضح الإعلامي الساخر باسم يوسف أن هناك ثلاث حفلات للإيمي الاولى البرايم تايم، والثانية الداي تايم، و الثالثة هي حفل جوائز إيمي العالمية و هي للإنتاج التلفزيوني من خارج أمريكا و يتم الاحتفال بها في نيويورك، قدمها قبلي جون أوليفر ومات لوكاس مضيفاً “عشان لما حفل سبتمبر ييجي ومايلاقونيش، أنا بقى في حفل نوفمبر”، مؤكداً على سعادته لتقديمه الحفل.
وعن ذيع موهبتك قال يوسف “أنا ابتديت على الإنترنت، واذا كانت الظروف مش سامحة دلوقتي ان الواحد يعمل برنامج، فأنا شايف إن أحسن حاجة الواحد يعملها انه يدي نفس الفرصة اللي انا خدتها لناس تانية”
و تابع “ذيع موهبتك هيبقى بداية إن الناس تعرض موهبتها على اليوتيوب زي ما أنا أخدت فرصتي، وأنا بشجع أى حاجة بتطلع ع اليوتيوب، فاتمنى إن الفترة الجاية اننا نساعد الشباب إنهم يطلعوا ويظهروا موهبتهم، لأن الميديا ف العالم العربي مش بتسمع للشباب”
ذيع موهبتك ….. رحلة تبدأ من “كُشك”
أما عن تقديمه لبرامج أخرى قال “العروض اللي بتيجي لينا دلوقتي مش على المستوى وفيها إلهاء أكتر، ومش ده اللي الناس منتظراه مننا”
و أضاف باسم “درست للطلبة في هارفارد علاقة الكوميديا والسخرية بالسياسة في العالم العربي، و دي لعبتنا طبعاً، لحد ماجت على دماغنا”
واختتم حديثه قائلاً “كل واحد عايز يصدق اللي هو عايزه، في ناس صدقت ان البرنامج اتوقف عشان ماحدش كان بيتفرج عليه، وفي ناس صدقت إن مفيش حد ممكن يوقفك، خلي كل واحد عايش على الفكر اللي يريحه …… الواحد مش ضامن حاجة، الواحد ماكنش يضمن انه يقوم الصبح يلاقي عليه حكم بـ 100 مليون جنيه”
يُذكر أن أخر مداخلة هاتفية أجراها باسم يوسف لبرنامج مصري كانت مع الإعلامي محمود سعد أيضاً في منتصف يناير الماضي، لتهنئة أبطال فيلم “من ألف إلى باء” أثناء استضافتهم ببرنامج “أخر النهار”