"عليش" بعد رحيله عن "نجوم إف إم": انتظروا التفاصيل قريبًا

ابتسام أبو الدهب

تشهد محطة راديو “نجوم إف إم”، انتقالات عديدة وبرامج ومذيعين جدد، وذلك ضمن الخطة البرامجية للعام الجديد 2019، كما شهدت رحيل المذيع خالد عليش من المحطة، والذي كان يقدم برنامجي “معاك في السكة”، و”في الموقف”.

كشف “عليش” عن سبب رحيله، خلال توضيح كتبه عبر حسابه الشخصي على موقع التواصل الاجتماعي “فيسبوك”، قائلًا “لكل اللي بيسأل واللي مهتم واللي مش مهتم أنا ليه مش في نجوم إف إم السنة دي (موسيقى أيام السادات في الخلفية)، للأسف و ببالغ الحزن والأسى مش هاكون ضمن فريق نجوم إف إم السنة دي، يعني مفيش معاك في السكة ولا موقف ولا هلي في ٢٠١٩”.

أضّاف “عليش”: “أسباب كتير هي السبب في القرار ده منها الميعاد الصعب جدًا، وخصوصًا إني بشتغل حاجات تانية منها إني بمثل وغيره، بس اللي يعرفني كويس في الشغل يعرف إني بحب التجديد دايمًا ومحبش أقف عند مرحلة معينة من النجاح و خلاص.. نجاحي في نجوم إف إم مكانش معتمد عليا أنا بس، بالعكس أنا كنت جزء صغير جدًا من منظومة اتشرفت إني اشتغلت معاهم من أصغر شخص لأكبر شخص”.

نرشح لك: خريطة إذاعة “نجوم إف أم” في 2019

تابع “عليش”: “لآخر لحظة علاقتنا زي الفل يعني مش ماشي بمشكلة ولا حصلت خناقة، عشان الإشاعات المغرضة.. وكان من أهم أحلامي اللي عافرت كتير عشان أوصله إني اشتغل مذيع في نجوم إف إم …أنا سايبلكم خالد جواد مكاني عشان الوحيد اللي لقيته اسمه خالد، ربنا معاه إن شاء الله ونجوم إف إم كلها في ضهره، (موسيقى حزينة في الخلفية)”.

استكمل: “أنا أسف لكل اللي اتعودوا يروحوا على البرنامج و لكل اللي مزاجه بيظبط مع الهلي بس هي سنة الحياة التغيير.. مش عايز حد يزعل وعايزيكم تقفوا معايا في خطواتي اللي جاية وبلاش عبارات ليه يا معلم تعمل كده ده أنت كنت مكسر الدنيا ولا بصات الشفقة عشان أنا فيا اللي مكفيني”.

اختتم “عليش” حديثه قائلًا: “(موسيقي فرحة في الخلفية)، انتظروا تفاصيل أكتر عن المشروع الإذاعي القادم في الأيام الجاية”.

16 تصريحًا لـ رامي محسن عن تفاصيل برامج “نجوم إف إم” الجديدة في 2019

شاهد: أبرز حفلات النجوم في ليلة رأس السنة