13 سببًا لمشاهدة “أبو العروسة”.. بعيدًا عن بابا وماما
إسلام وهبان – إسراء إبراهيم
حقق الجزء الأول من مسلسل “أبو العروسة”، الذي عرض على شاشة “dmc”، نجاحا كبيرا بعد أن قدم محتوى دراميا، جعل الكثير من الأسر المصرية بمختلف طبقاتها وفئاتها العمرية، تلتف حوله متابعته، الأمر الذي زاد من حماس صناع المسلسل لتقديم جزء ثاني، بدأت حلقاته نهاية ديسمبر الماضي.
المسلسل يسلط الضوء على العادات والتقاليد التي تتميز بها الأسر المصرية، وأهم المشكلات اليومية التي نمر بها، ومحاولة استعادة بعض القيم التي غابت بعض الشيء عن حياتنا الأسرية، لذا يحظى المسلسل بمتابعة كبيرة من العائلة بأسرها، وأصبحنا نلاحظ مجددا اجتماع أفراد الأسرة في تمام الثامنة لمشاهدة المسلسل.
نرشح لك.. رانيا فريد شوقي عن ابنها في “أبو العروسة”: “أشطر مني”
مشاكسات “عبد الحميد” وعائلته، ألقت بظلالها على المشاهدين، وجعلت كثير من الأبناء “يريح دماغه”، ويلجأ لمشاهدة المسلسل عبر “يوتيوب”، بعيدا عن تعليقات وتلميحات (بابا وماما)، وذلك لعدة أسباب سنتناولها فيما يلي:
1- معاملة “عايدة” التي تقوم بدورها الفنانة سوسن بدر، و”عبد الحميد” الذي يقيم بدوره الفنان سيد رجب، ومدى التفاهم الواضح بينهما، بالتأكيد هيجنن (ماما وبابا)، ويبدأ كل منهما في لوم الآخر، فتسمع كلمات من قبيل “شايفة بتفهموا من نظرة ازاي”، أو “يا ميلة بختي”، وغيرها من الجمل اللي أكيد أكيد هتجيب النكد.
2- مامتك مش هتجيب “مايوه” لبابك، لأنه في الغالب ما بيخدهاش مصيف، وهنا ستجد خناقات المصيف والخروجات بدأت وانت أدرى بالباقي.
3- بابا في الغالب بياكل من غير ما يقول لماما الأكل حلو، أو يعرض عليها مساعدة في شغل البيت، ودا هيكون باب خناق لأن “عبد الحميد” راجل ذوق.
4- “عبد الحميد” و”عايدة” دايمًا بيشاركوا مشاكلهم مع بعض، وبيحاولوا يوجدولها حل من غير ما حد فيهم يرمي المسؤولية على التاني، ودا سبب كافي لأن بابا وماما يقولوا لبعض “شوف بياعملها إزاي”، أو “شوفي بتحترمه إزاي ومابتكسرلوش كلمة”.
5- طبعًا البنات مشكلتهم أكبر، لإن ماما هتقارن بين علاقتك بيها وعلاقة “زينة” بمامتها “عايدة”، واللي هي مثال للبنت الهادية اللي بتسمع كلام مامتها وناجحة وبتحاول تفرحها، فهتقولك بردو “يا ميل بختي شوفي البنات بيحبوا أمهاتهم ومفرحينهم إزاي”.
6- وفي الحال التانية، لو إنت شقية زي “هاجر”، فدايمًا هتقولك “شوفي إنت عاملة زي البنت الفاشلة دي، ومابتعرفيش تعملي حاجة”.
7- لو ماعملتوش مفاجأة لمامتك قبل كده، فدا هيبقى باب لأنها تكدركم في البيت، ولو عملتوا مفاجأة بردو هتقدركم.
8- “عايدة” بتقول لـ “هاجر”: “حظه أسود اللي هيتجوزك”، وأعتقد دي كلمة في جينات الأمهات فلما هتصدق تسمعها عشان تقلب عليكي.
9- خوف “عايدة” على “عبد الحميد” طول الوقت، ومحاولتها أنها تخفف عنه دايمًا، وكمان ولاده وإظهارهم لحبهم ليه هيخلي بابا طوال وقت المشاهدة بيخبط كف على كف ويقول “شوفوا بيحبوه إزاي، وبيخافوا عليه قد أيه”.
11- الأسرة المصرية أساتذة في تحليل كل مشهد بشكل يفصلك عن أحداثه، وبيعملوا ده بمهارة عجيبة، عشان كده هتلاقي كل المشاهد الرومانسية في المسلسل، ومحاولة كل فرد إظهار حبه للآخر، هيكون التعليق جاهز عليها “أيه الأوفر دا، الكلام دا ما بيحصلش”.
12- ديكورات المسلسل وملابس الأبطال بالتأكيد ماما مش هتعديها بالساهل وهتلاقي هاني البحيري قاعد معاك في البيت وبيقيم كل قطعة قماش في المسلسل.
13- طبعا أغلبنا بينسى عيد ميلاد بابا أو ماما، فطبعا أنتم عارفين اللي هيحصل مع كل مناسبة أو احتفال.
سنة حلوة عليك وانت معانا.. سنة حلوة عليك وانت ما بينا. 🎂😍😍
الأب، الزوج، الأخ والصاحب اللي زي عبد الحميد بالدنيا كلها ويستاهل كل الفرحة والحب اللي في الفيديو ده اللي مخلينا مبسوطين واحنا بنشوفه بس. 😍❤#أبو_العروسة2 pic.twitter.com/xhFCec9YfM
— dmc (@dmctv) January 16, 2019
عشان كده بنقولك من أولها، عندك حل من اتنين، يا تتفرج على الإعادة وطبعا هتلاقي حد يحرقلك الأحداث أو على يوتيوب وطبعا شركة النت هتزهقك في عيشتك، المهم تهرب من تعليقات بابا وماما.