محمد زين: أنا ورئيس التحرير وعرب وود
“بعدين الصحافة مش هواية يا محمد ”
هذا ما قاله لي رئيس التحرير من يومين أما ” قبلين ” كان وصلة ” بستفة ” لأنني لا أعمل بانتظام أمشي على سطر وأترك سطر.. سطرين.. ثلاثة.. خمسة.. عشرة أسطر .
احتجت يوم كامل للتفكير في هذه الجملة ومر نصف اليوم الثاني وما زلت أفكر فجأة صرخت بأعلى صوتي الصحافة هواية يا أستاذ “محمد عبد الرحمن ” على الأقل بالنسبة لي .
كان هو في هذه اللحظة ضيف برنامج “عرب وود ” على فضائية روتانا سينما تخيلته قطع كلامه عن شهر رمضان وهل من الممكن أن يكون موسما سينمائيا جديدا في صناعة السينما المصرية؟ ونظر إلي ساخطا بقوله
” مين أنت عشان تقول إن الصحافة هواية؟ يا ابني ده أنا اللي علمتك ازاي تعمل موضوع وتنشره”.
“مقلتش حاجة يا ريس دي بس وجهة نظر مالك اتعصبت كدة ليه. كمل كلامك عن السينما وعن ذهاب أغلب النجوم للدراما أنا متفق مع حضرتك تماما في كل حاجة ولما قلت إن سينما البلطجة خلاص هتنتهي بعد الثلاث سنوات الفائتة وكمان مستني عيد الفطر عشان حاجتين مهمين أولاالصيام هيكون خلص الحمد لله وثانيا نشوف المنافسة العنيفة بين النجوم ” أحمد عز، محمد سعد، محمد رمضان”
أستاذ “محمد عبد الرحمن” عايز أقول حاجة صغيرة قبل الحلقة ما تنتهي لو سمحت
” مش أحسن لو كل مهنة تكون هواية قبل ما تبقي لقمة عيش ساعتها الانجاز ممكن يكون قليل لكن هيبقى ممتازويستاهل”
الحلقة خلاص بتخلص ورئيس التحرير بيشرب العصير اتهيألي كدة والله أعلم إنه مسك دقنه وقالي
“أدي دقني لو نشرتلك حاجة عندي”