مش حاسمة بس ملبن.. قمة البليلة وهفك الشوق

محمد رضا هلال مباراة القمة بين الأهلي و الزمالك 

علي طريقة كوميك الفنان سامي مغاوري “غبية بس ملبن” , تنطلق يوم السبت المقبل مباراة القمة بين الأهلي و الزمالك رقم 117 , والتي بلا أدني شك ستكون استثنائية في الاثارة بالرغم من أنها لن تكون حاسمة في سباق الفوز بلقب الدوري هذا الموسم أي كانت نتيجتها, إلا أنها ستكون “ملبن” في طعم وحلاوة تحفيلها علي جمهور المنافس لما سبقها من متغيرات كثيرة علي مدار الموسم .

الزمالك لو فاز سيفرق عن الأهلي خمسة ” أبناط ” كما يقول الكابتن فاروق جعفر, وهم متصدرين المسابقة منذ بدايتها، فمش هتكون قضية كبيرة لأن دايما الرد الأهلاوي سيكون “لسه بدري”, خاصة أن الزمالك كان فارقًا بـ11 نقطة من قبل في نفس الموسم، و الأهلي قلل الفارق لنقطتين قبل المواجهات المباشرة بينهما، مع العلم أن الزمالك لسه ملعبش قدام ولاد العم الاسماعيلي وده ماتش مش مضمون للزمالك تماما.

تعالي بقي أقولك الأهلي لو فاز هيرسخ ايه في عقلية كل زملكاوي, وده أنا عن نفسي متوقعه بشدة بإذن الله..
أولا .. موضوع “ركبك اللي بتخبط” من وقت ما كان الأهلي في المركز الأخير ده أمر مفروغ منه أصلا, والموضوع تعدي الركب لأعضاء تانية في جسم الزمالك عمالة تخبط و الأهلي هيفتح لها يوم 30 بمشيئة الله.

ثانيا.. “الشوق اللي هفك” بقاله شهور ومستني الأهلي يطلع لك فوق ده , انا شخصيا متوقع أنه لما يحصل يوم السبت هيشهد الفيس بوك كم تاريخي من account deactivate للزملكاوية، لأنهم مش هيستحملوا الشوق اللي هيضرب في وشهم.

ثالثا.. مراهم التسلخات اللي عادة بيقبل عليها الزملكاوية بعد ماتشاتهم مع الأهلي، قد تتعدي مرحلة المراهم إلى إقبال تاريخي علي حبوب التشنجات, وأتمني الصيدليات تكون عاملة حسابها في كمية حلوة من دلوقت, لأنها هتبقي تشنجات يمكن قياسها بمقايس ريختر والعياذ بالله .

رابعا.. موضوع جنش بوفون , وعلاء مالديني , وساسي مودريتش ده تحطه لامؤخذة في بلاعة ذكرياتك الأليمة , ومعلش تعالي علي نفسك واعتبر الزمالك بيلعب في الدوري الروماني بدل الليجا عشان واسعة شوية , ولا أقولك بلاش الروماني كمان عشان أخر مرة الزمالك لاعب فيها فريق روماني اتغلب سبعة .

خامسا .. بعد ما كنت كزملكاوي بتعتبر مباراتك مع بيراميدز منافسة قوية علي فريقين بيتنافسوا علي قمة الدوري , هتكون مباراتك معاهم الدور الثاني حاسمة في بقاءك بالمركز الثاني, لأنك لو خسرتها يا دوبك تلحق تلعب في الكونفدرالية زي أخر سنتين كده, وبالتالي هتفقد مركزك المفضل التاريخي بالدوري للموسم الثالث علي التوالي.

سادسا.. الأهلي من شهرين وهو متأخر عنك فارق 8 نقاط, كان عنده ثقة أنه هيوصل للحظة دي, ومن هنا أطلقت جماهيره الهتاف التاريخي ” كده كده يا زمالك الدوري في الجزيرة .. عامل فيها بطل وهو بتاع بليلة ” , عشان كده نصيحة بقي من دلوقت لو خطفت رجلك لهايبر هتلاقي بليلة سريعة التحضير هايلة, يا دوبك تلحق كزملكاوي تجيب لك علبتين وتسخنهم من دلوقت, صدقني هيعملوا معاك شغل حلو أوي بعد الماتش.

أخيرا.. هذا المقال ما هو إلا هزار مع حبايبنا الزملكاوية وكلنا هنقعد جنب بعض في شهر يونيو نشجع منتخبنا في أمم أفريقيا, أضحكوا وهزروا و انبسطوا , و اللي يفوز يفوز واللي يخسر يخسر.. مجرد ماتش وهيخلص ومليون مبروك للي يكسب, بعد الماتش نقعد كلنا مع بعض وناكل بليلة برضه, وإحنا بنضحك ومفيش حاجة مستاهلة تزعلنا من بعض.

مباراة القمة بين الأهلي و الزمالك

نرشح لك: الزمالك يعلن عن مفاجأة بشأن أزمة كهربا

شاهد| يوم مش عادي في ضيافة الإعلامية سالي عبد السلام