مينا فريد : 10 بوستات أكيد هتشوفها في رمضان
كل سنة و إنت طيب .. متجمع مع أهلك و أصحابك و حبايبك في شهر بيحبه المصريين كلهم المسيحيين و المسلمين .. شهر اللمة و الفرحة و الخير .. التليفزيون ببرامجه بإعلانته بمسلسلاته بياخد مكان كبير من إهتمامتنا كلنا و كنتيجة لده فيه بوستات هتقراها الشهر ده ع الفيسبوك .. حبينا نجمعها ليك هنا ..
(1) سارة سلامة / فيفي عبده / غادة عبد الرازق / سمية الخشاب /هيفاء وهبي/ علا غانم
لابسين ملابس / بيقولوا ألفاظ لا تليق بالشهر الفضيل.. هتفطرونا ربنا ينتقم منكم
بص يا صديقي قبل رمضان أهو .. الناس دي إنت عارف و متأكد إنهم هيلبسوا براحتهم و إحتمال يبقى فيه كلام براحته ف أرجوك شوف مواعيد عرض المسلسلات دي و ماتشوفهاش …
(2) رامز جلال ده رزل جدا .. و اللي بيعملوا في الناس ده حرام ..
طيب إنت كتبت ده أو قريته رمضان اللي فات و شفت رامز و اللي قبله و برضه شفت رامز و اللي قبل قبله و برضه شفت رامز.. و عارف من البروموهات إيه اللي هيحصل في البرنامج ده و رغم كده بتشوفه .. طب ليه ..كده ؟
(3) إحنا مش بنشوف مسلسلات .. إحنا بنشوف إعلانات و في النص فواصل مسلسلات
ما كلنا عارفين إن الإعلانات دي هي اللي بتصرف على المسلسلات دي .. دلوقتي قدامك حل من إتنين ياتشوف القنوات اللي بتعرض المسلسلات بدون فواصل إعلانية ومش هقول هي إيه عشان مابقاش بعلن عنها بس ممكن تدوّر… يا تستنى كام ساعة و تشوفها ع اليوتيوب و تعمل وصلة لطيفة للتليفزيون و خلاص
(4) باكل كنافة بالمانجه/النوتيلا/الجمبري … ياااي تحفة تحفة
بالهنا و الشفا حضرتك
(5) بتموتوا الصاروخ ليه … البطلة دي تموت ليه في المسلسل
من فضلك راجع أول بوست في المقاله و عموما لو بطلة ماتت في مسلسل هتلاقيها صاحية و بتلعب في التاني .. كل البطلات الحلوين مشاركين في أكتر من مسلسل السنة دي
(6) إعلان كوكاكولا السنة دي أجمد من بيبسي لا بيبسي أجمد … إعلان موبينيل أجمد من إتصالات .. لأ بس فودافون عاملة مفاجأة .. شفت جايبين مين في إعلان شيبسي
الحقيقة إن كل الشركات الكبيرة بتحط ميزانيات ضخمة للإعلانات و تتعاقد مع وكالات إعلانية ضخمة و بتعمد على قوة المشاهدة في رمضان … متوقع إبهار في الأسماء اللي فوق دي و معاهم حديد عز و جهينة
(7) إعلانات الشحاته و مسلسل الجوع و الفقر مستفزة / إعلانات الكومباوندات مستفزة
مفيش مخرج من النوعين دول من الإعلانات و للأسف هي دي البلد دلوقتي و طبقتي و طبقة أغلبنا المتوسطة بتندثر واحدة واحدة .. لو عاوز تفاسير و شرح ممكن تقرا رواية يوتوبيا لأحمد خالد توفيق و هتعرف ليه الإعلانات دي و إحنا بسببها رايحين فين
(8) عادل إمام عجّز أوي
الحقيقة إنه أكيد عجّز .. بس هو هيفضل الزعيم من الثمانينات لدلوقتي و هو محافظ على مكانه في قلوب و إبتسامة أجيال بتسلّم بعضها .. ربنا يديه طولة العمر بس طبيعي تبان عليه علامات السن ماتستغربش مش كل الناس عمرو دياب
(9) إيه كمية الشحاتين دي
ماتحسسنيش إن رمضان اللي فات قضيته في فرنسا .. من أيام جدي و الشحاتين ده موسمهم اللي بيتكاثروا فيه .. مفيش جديد يا صديقي
(10) برامج الكاميرا الخفية دي مضروبة
الإتهام ده بيتوارث من ايام إبراهيم نصر .. الحقيقة إن أغلب النجوم نفسهم بيطلعوا بعدها يقولوا إنها مضروبة و متمثلة خصوصا اللي مش معمولة مع راجل الشارع العادي و رغم كده برضه بتتشاف و بنسب مشاهدة كبيرة … لو عاوز تعمل نفسك مش واخد بالك و تضحك و تتبسط شوفها مش عاوز خلاص.
و كل سنة و إنتوا طيبين وبصحة و فرحة… لما تلاقي بوست من دول إفتكروا إنكم قريتوها الأول في إعلام.أورج