قصة الصورة الوحيدة لحمزة الشبراويشي صاحب كولونيا 555

بعد نفاذ الكحول الطبي من الصيدليات، اتجه الكثيرين للبحث عن بديل آخر وهو كولونيا 555، لاحتوائها على نسبة كحول كفيلة بتطهير الأيدي والأسطح من فيروس كورونا المستجد.

بعد أيام.. تداول رواد مواقع التواصل الاجتماعي، صورة لحمزة الشبراويشي، صاحب كولونيا 555، إلا ذلك الأمر دفع الكاتب عمر طاهر، لنشر الصورة الأصلية للشبراويشي، موضحًا قصته الحقيقية التي يجهلها البعض.

علق طاهر على الصورة التي نشرها للشبروايشي، عبر حسابه الشخصي، على موقع “فيسبوك”، كاتبًا: “تحذير: بوست فيه شبهة تفاخر، كل اللي في الشغلانة بتاعتنا يعرف وقع كلمة انفراد صحفي بالذات الحقيقي منه، و الحمد لله الواحد لحق ينجز شوية انفرادات بس فيه انفراد بعينه بحبه جدا، رغم إنه مابقاش بتاعي خلاص وبقى ملكية جماعية”.

تابع: “صورة الراجل اللي ورا كولونيا الـ 555، حمزة الشبراويشي من يوم ما ظهر لحد 2018 ماكنش حد يعرف شكله في مصر، ولا صورة و لو جماعية له، وكنت وأنا شغال بحث عنه لـ كتاب صنايعية مصر بتخيل له شكل مختلف كل شوية، لحد ما لقيت حد من عيلته وبعد انتهاء البحث عن المعلومة والتاريخ سألته عن أي صورة لحمزة الشبراويشي، كان سؤال تأدية واجب وأنا عارف إنه صعب يكون عند حد من الجيل التالت صورة قديمة كدة”.

أردف: “لكن كان حظي حلو، كان فيه مشكلة وحيدة إن الصورة المتاحة متعلقة في برواز في بيت من بيوت العائلة، تم البحث عنه وتحديده، وتمت بعد مناهدة طويلة عملية نقل الصورة بالبرواز لمكان عمل قريب الشبراويشى لتصويرها بالموبايل، فكرت في أي طريقة تطلع جودة أفضل من تصوير بالموبايل بس ماكنش متاح غير موبايل سامسونج قديم موديل 2010 وتم التصوير، نص فرحة بالصورة اكتملت لما مراتي أخدتها وعملت لها معالجة وطلعتها صورة أبيض وأسود بتبرق”.

استكمل: “ثم تكرمت وأعادت الروح لصور تانية وصلت بنفس الطريقة ونفس الحالة برضه وكانت صور ناس مصر معرفش شكلهم برضه زي الخواجة تومي خريستو، بتاع شيكولاتة كورونا، علوي الجزار، شاي الشيخ الشريب و كوكا كولا، وغيرهم، ثم حدث إن صورة الشبراويشي اتحركت من الكتاب لفيس بوك، ثم أصبحت ملك للناس و خلاص بقت مصر كلها عارفه شكل حمزة الشبراويشي”.

اختتم: “بيني وبين نفسي أنا عارف إنه انفراد صحفي بس هو مابقاش كده خلاص، لما بشوفها متشيرة في أي مكان بحارب شعور الغيظ الصحفي المشروع بتاع إن أي كاتب أو صحفي يحب يشوف اسمه على معلومة جابها، بس بتجاوز الغيظ ده بسرعة واتبسط بإحساسي بفكرة إني قدمت خدمة ما لشخص حمزة الشبراويشي ولأرشيف صور مصر، الصورة الأصلية في البرواز”.

نرشح لك: بعد نقص الكحول الإيثيلي.. تعرف على سعر كولونيا 555