بسبب أزمة كورونا.. أحمد مالك: تايه ومتلخبط
شارك الفنان أحمد مالك، جمهوره بعده تدوينات كشف من خلالها عن شعوره تجاه الأزمة التي تمر بها العديد من الدول، من بينهم مصر، بسبب انتشار فيروس كورونا المستجد.
نشر مالك التدوينات، عبر حسابه الشخصي على موقع “تويتر”، كتب فيها الآتي: “كنت ناوي أكتب حاجة فيها هزار عن الفلوس والحالة المادية، بس لاحظت إني مش في أزمة قوية زي ناس فعلا حياتها ممكن تكون في خطر بسبب الوضع الحالي، بعدين فكرت في الوضع الحالي، أنا حاسس إني معنديش حاجة أقولها أو أعملها، ومش قادر حتى أقول لنفسي أعمل إيه”.
تابع: “حاسس إني تايه ومتلخبط، بس حاسس إني مش لوحدي، وده شعور غريب بشكل حلو، حاسس إني عايز أفضل ساكت وأتفرج، مش عايز أجري، مش عايز أخد كورس أونلاين، مش عايز أعمل أي تحدي، مش عارف عايز أو مفروض أعمل إيه، أنا بعترف إني مش فاهم حاجة”.
استكمل: “عارف إن كلامي ممكن يميل للضلمة بس حاسس إن دي مش مشكلة ومش مفروض تخوفني، حاسس إن دي مرحلة نادرة الإنسانية بتعدي بيها وكلنا جزء منها، العالم في حالة صمت، صمت له صوت أنا مستغرب ومستمتع بقوته، أنا معنديش حاجة مضطر أعملها أو أقولها غير إني أتأمل اللحظة دي وألاقي نفسي وسطيها”.
اختتم: “مش عارف لو العالم هيتغير أو لا بعد اللي بيحصل، بس أكيد هنفهم حاجة جديدة وحتى لو مفهمناش أكيد هنحس.. أتمنى الخسارة تكون خفيفة علينا ومتحمس لليوم اللي هنحتفل فيه بمرور كل ده”.
